Chanukka

Us der alemannische Wikipedia, der freie Dialäkt-Enzyklopedy
Hops zue: Navigation, Suech
Chanukkia z Kazimierz (Krakau)

Chanukka (חנוכה, [xanʊˈkaː] Chanukka?/i ; dt.: „Weijig, Iiweijig“; au: Chanukkah, Hanukkah oder Liechterfest) isch e jüdischs Fest zum Gedänke an d Wiideriiweijig vom zwäite Tämpel, wo dr Serubbabel z Jerusalem im Jahr 164 vor dr Zitewändi het lo baue. Es foot jedes Joor am 25. Daag vom Monet Kislew (Novämber/Dezämber) und isch acht Dääg lang.

Gschicht und Müthe[ändere | Quälltäxt bearbeite]

Chanukka-Fiir uf eme Gmäld us em 18. Joorhundert vom ene umbekannte Mooler in ere Brivatsammlig
Chanukka-Lüüchter

Chanukka erinneret an d Wideriiweijig vom zwäite jüdische Tämpel z Jerusalem im jüdische Joor 3597 (164 v. d. Z.) noch em erfolgriiche Makkabäerufstand vo de Juude z Judäa gege die hellenisierte Juude und makedonische Sürer, wien er im Erste Buech vo de Makkabäer und au im Talmud überliiferet isch. D Makkabäer häi dr Herrschaft vom Riich vo de Seleukide über Judäa en Änd gmacht, häi dr Zeus-Altar, wo d Grieche im Tämpel ufbaut häi, entfärnt und häi dr jüdisch Tämpeldienst wider iigfüert.

D Menora, dr Lüüchter mit de siiben Ärm im Tämpel, häig nie me sölle uslösche. Noch dr Überliiferig het mä wäge dr Erooberig dur d Süürer nume no äi Chrueg vo gweitem Ööl chönne finde. Sovil Ööl het nume für en äinzige Daag glängz. Zum nöis gweits Ööl z mache brucht mä aber acht Dääg. Es sig aber e Wunder bassiert, und s Liecht häig acht Dääg lang brennt, bis mä nöis gweits Ööl gmacht het. An das Wunder erinnere die acht Liechter vom Chanukka-Lüüchter. Je noch dr DRadizioon wo mä re folgt, wird jede Daag äi Liecht mee aazündet, bis am Ändi alli acht brenne, oder me foot mit alle acht Liechter aa und zündet jede Daag äins weniger aa.

Ass dr Lüüchter mäistens nüün Ärm oder Liechthalter het, sött nid düsche: s nüünte Liecht isch dr Diener (hebr. Schamasch). Numr mit däm daf mä die andere aazünde, wemm mä die notwändige Sääge (hebr. Brachot) drüüber gsäit het. As Liechter wärde Cherze oder Ööllämpli brucht. Vilmol wird Olivenööl verwändet, wie bi dr Menora im Tämpel.

Noch dr Entweijig vom Zwäite Tämpel isch s Chanukkawunder zur Wiideriiweijig gfiirt worde (1 Makk 4,36–59 EU; 2 Makk 10,5–8 EU (Septuaginta)) (e Zitaagoob im Nöije Testamänt (Joh 10,22 EU) datiert noch em Fest vo dr Tämpelweijig), bis im Joor 3830 vo dr jüdische Ziträchnig (70 n. d. Z.) dr Tämpel dur d Römer ändgültig zerstört worden isch. Die jüdischi Bevölkerig isch verdriibe worde (Jüdischi Diaspora). Denn häi d Juude Chanukka dehäim afo fiire.

Chanukka-Brüüch[ändere | Quälltäxt bearbeite]

Chanukka isch vor allem e hüüsligs Fest. An de Ööbe vo dr Chanukka-Wuche versammle sich d Familie mit Fründ zum Fiire. S Fiire in dr Gmäinschaft isch üüblig, d Chinder bechömme Gschängg und Süessigkäite. Mä isst vor allem Spiise, wo in Ööl bache worde si wie Berliner (hebr. סופגניות Sufganiyyot) oder Latkes (Härdöpfelblätzli) mit Öpfelmues und Raam und anderi Spezialidääte us dr jüdische Chuchi. Wenn d Liechter aazündet si, singe d Lüt Maos Zur und anderi Chanukkalieder. Früener het mä d Liechter nume in de Hüüser aazündet, erst spööter au in de Synagoge. In dr Litratuur wird s Fest under anderem vom Heinrich Heine erwäänt. In sinere Dänggschrift für e Ludwig Börne beschribt dr Heine e Spaziergang vo de bäide Schriftsteller, wo vo jüdischer Abstammig gsi si, dur die winterligi Frankfurter Juudegass.

Hanukkah Prayer/O Hanukkah/Maoz Tzur

D Chanukkia wird sofort aazündet, wenn s dunkel wird. Drbii bättet mä, singt Lieder und verzellt d Gschicht vo Chanukka. Au s Spiil mit em Dreidel isch beliebt. Das isch e Kräisel mit vier Site. Uf dene stöön vier hebräischi Buechstaabe (Nun Gimel He Schin). Das wird interpretiert as d Aafangsbuechstaabe vom hebräische Satz «E groosses Wunder isch dört bassiert» (hebr.: נס גדול היה שם - Nes Gadol Haja Scham). Z Israel stöön uf de Dräidel hüte d Aafangsbuechstaabe vo de Wörter vom Satz: נס גדול היה פה - Nes Gadol Haja Po «E groosses Wunder isch doo bassiert.» Bim Spiil, wo us em 16. Joorhundert stammt und wo mä für Gäld, Spiilmarke oder anders gspiilt het, si s d Aafangsbuechstaabe vo de Wörter uf Jiddisch נִישט («nüt», das häisst mä macht nüt und dr neggst Spiiler isch an dr Räije), גאנץ («ganz», das häisst mä nimmt alles), האלבּ («halb» - mä gwünnt d Helfti) und שטעל («stell», mä muess iizaale).

En anders beliebts Chanukkaspiil isch «Glogge und Hammer».

Wääred de Dääg vo Chanukka bechömme d Chinder Münze zum Gschängg und wärde ermuetigt, e Däil vom Gäld für wooldäätigi Zwäck zu spände (Zedaka). Vom Bruuch, z Chanukka e Gänsebroote z mache, säit mä as Grund, ass mä s Fett für e Lüüchter chönn bruuche.

Chanukkaliechter en Karlsrueh

Termin vom Chanukkafest[ändere | Quälltäxt bearbeite]

Dr ersti Daag isch immer dr 25. Kislev, aber d Fiir foot immer am Daag vorhär aa, wenn d Sunne undergoot.

  • 2014 (5775): 17. bis 24. Dezämber 2014
  • 2015 (5776): 7. bis 14. Dezämber 2015
  • 2016 (5777): 25. Dezämber 2016 bis 1. Januar 2017
  • 2017 (5778): 12. bis 20. Dezämber 2017
  • 2018 (5779): 2. bis 10. Dezämber 2018
  • 2019 (5780): 22. bis 30. Dezämber 2019
  • 2020 (5781): 10. bis 18. Dezämber 2020
  • 2021 (5782): 29. Novämber 2021 bis 6. Dezämber 2021
  • 2022 (5783): 19. bis 26. Dezämber 2022

Lueg au[ändere | Quälltäxt bearbeite]

Liste vo de jüdische Fest

Litratur[ändere | Quälltäxt bearbeite]

  • Elizabeth Breuilly, Joanne O'Brien, Martin Palmer: Die religiösen Feste der Welt: Wissen Sie, was Ihre Nachbarn bei Chanukka feiern? Warum sie Ramadan halten? Tosa, Wien 2009, ISBN 978-3-85003-343-5.
  • Claudia Emmendörfer-Brößler; Amt für Multikulturelle Angelegenheiten (Hrsg.): Feste der Welt - Welt der Feste: ein interkulturelles Lesebuch. 2., überarbeitete und ergänzte Auflage, VAS Verlag für Akademische Schriften, Bad Homburg vor der Höhe 2012, ISBN 978-3-88864-466-5.

Weblingg[ändere | Quälltäxt bearbeite]

 Commons: Chanukka – Sammlig vo Multimediadateie