Cäcilia von Rom

Us der alemannische Wikipedia, der freie Dialäkt-Enzyklopedy
Hops zue: Navigation, Suech
D Skulptur vo dr häilige Cäcilia isch us Marmor. Dr Stefano Maderno het se für d Chille Santa Cecilia z Trastevere gmacht, und si zeigt, wie me ane 1599 bim Umbou vo dr Chille im Sarg dr nid verwääst Liib vo dr Häilige gfunde het. Dr Papscht Clemens VIII. isch sälber die wundersami Sach go aaluege.

D Cäcilia vo Rom (* um 200 n. Chr. z Rom; † um 230 z Rom) isch e christligi Häiligi, Jungfrau und Märtyrere vo dr früeje Chille. Si isch d Patronin vo dr Chillemuusig, vo de Orgelebouer und au suscht vo de Inschtrumäntemacher, vo de Sänger, de Musiker und de Dichter. Iiri Attribut si d Orgle oder d Giige, s Schwärt (as Zäiche fürs Martyrium) und d Rose.

D Legände[ändere | Quälltäxt bearbeite]

Noch dr Überliiferig het sich d Jungfrau Cäcilia em Heer Jesus Christus versproche. Iiri Eltere häi sä aber mit em häidnische Jüngling Valerianus verhürootet, und mit däm het si denn in ere Josephsehe gläbt. D Cäcilia het iire Maa Valerianus und däm si Brueder Tiburtius zum Christedum bekeert. Wäge iirem Glaube si die bäide Brüeder an dr Begraabig vo hiigrichtete Christe drbii gsi, was verbote gsi isch. Mä het sä denn uf gheiss vom Präfekt Almachius im Gfängnis iigsperrt und hiigrichdet. Wo mä die Aaghörige vo de Hiigrichtete verfolgt het, isch mä uf d Cäcilia gstoosse. Die het iiri ganzi Dienerschaft bekeert, bevor mä sä in häisses Wasser het lo iidauche. Das het ere aber nüt gmacht. Wo dr Hänker denn brobiert het, iire dr Chopf abzschloo, isch s em nid glunge dr Chopf vom Körper z drenne. Si het denn no drei Dääg lang gläbt und iiri Riichdümer under de Arme verdäilt. Dr Bischof Urban het se i dr Katakombe begrabe.

d Santa-Cäcilia-Chille z Rom

Cäcilie-Chile[ändere | Quälltäxt bearbeite]

Im 5. Joorhundert isch im Stadtdeil Trastevere vo Rom e Chille für d Cäcilia gsi. Wo men öpe ane 822 i dr Calixt-Katakombe der Liichnam vo dr Cäcilia gfunde het, isch er under em Papscht Paschalis id Chille vo Trastevere brocht worde, und me het über em nöie Grab vo dr Häilige d Basilika Santa Cecilia in Trastevere bout.

Anderi Chile, wo dr häilige Cäcilie gweit sind, git s z Mihlhause, z Öschtringe und z Mosbach in Baade-Württebärg, z Rengschburg und an anderne Oort.

Dr Fiirtig[ändere | Quälltäxt bearbeite]

Dr 22. Novämber isch sid em 6. Joorhundert dr Dag, wo i dr Chille für s Aadänke ad Cäcilie vorgseh isch.

D Cäcilia und d Chillemusigg[ändere | Quälltäxt bearbeite]

Sid em 14. Joorhundert gilt di häilig Cäcilie als öper wichtigs für d Musigg i dr Chille. Vil Komponischte häi Musiggstück gmacht zum se z eere, zum Bischpiil dr Henry Purcell, dr Jeremiah Clarke, dr Joseph Haydn, dr Maurice Greene, dr Georg Friedrich Händel und dr Benjamin Britten.

Litratuur[ändere | Quälltäxt bearbeite]

  • Friedrich Wilhelm Bautz: Caecilia. In: Biographisch-Bibliographisches Kirchenlexikon (BBKL). Band 1, Hamm 1975, Sp. 840–841.
Adaptionen

Weblingg[ändere | Quälltäxt bearbeite]

 Commons: Hl. Cäcilia – Sammlig vo Multimediadateie
Information icon.svg Dä Artikel basiert uff ere fräie Übersetzig vum Artikel „Cäcilia_von_Rom“ vu de dütsche Wikipedia.

E Liste vu de Autore un Versione isch do z finde.