Burkhard Zibol

Dialäkt: Baseldütsch

Dr Burkhard Zibol (au Burkart etc, * vor 1375; † 1. August 1433 z Baasel und in dr Kartause begraabe) isch e Baasler Politiker am Aafang vom 15. Joorhundert gsi.

Dr Burkhard Zibol isch dr Soon vom Bürgermäister Jakob Zibol und däm sinere erste Frau gsi. 1395 het er d Agnes vo Eptige ghürootet, wo 1430 gstorbe isch und denn d Sophia vo Rotbärg, d Dochder vom Hans Ludman vo Rotbärg. Er isch mit em Konrad zer Sunnen, Arnold vo Rotbärg und Bernhard vo Rotbärg verschwöögeret gsi. Mit sine Chinder isch s Gschlächt vo de Zibol z Baasel usgstorbe.

Wie si Vater het au dr Burkhard in dr Baasler Politik mitgmischt und het däm si Sturz wäge dr Rhiifälder Affääre 1409 politisch überläbt. Vo 1414 bis 1427 und vo 1430 bis 33 isch er as Achtburger im Root gsässe. Vo 1414 bis 1421 isch er Sibner gsi und vo 1427 bis 1430 Oberstzumftmäister.

Dr Zibol isch e Gönner vom Kloster vo de Kartüüser gsi, wo dank dr Schänkig vo sim Vater im Chläibaasel gründet worde isch. Noch sim Dood het si Witwe d Kartause, s Stäinekloster und s Elisabethekloster witer understützt. Dr Familiesitz im Schalerhof am Rhiisprung het si dr Stadt verkauft, wo dört s Kollegium vo dr Uniwersidäät iigrichdet het.

Kwelle

• Samuel Schüpbach-Guggenbühl: Zibol, Burkhard. In: Historisches Lexikon vo dr Schwiiz.