Usschnitt us dr Stadtaasicht vo Basel vom Matthäus Merian em Eltere, 1642.[1] Uf dere Aasicht gseet mä linggs in dr Middi dr Bluemeblatz mit em Salzdurm (Nummere 24). Dr Bluemerain goot vo dört gege rächts paralleel zum Rhii bis zum Schwibbooge, wo zu sällere Zit nume no us zwäi Doorbööge bestande het.
Im Middelalter, bevor die Üsseri Stadtmuure baut worde isch, häi alli, wo dur s Santihannsdoor us dr Stadt uuse häi welle, dur e Bluemerain müesse und für Fuerwärk isch das scho denn grüüslig äng gsi.
In dr Nöizit isch d Strooss aber schliesslig für e Verkeer, wo immer mee gwaggse isch, vil z schmaal worde. Scho 1787 het dorum d Stadt d Hüüser uf dr äinte Site vo dr Strooss, wo denn St. Johannstrasse ghäisse het, ufkauft und lo abrisse,[2] so im Hieronymus de Larechal si Segerhoof, zum dr Bluemerain chönne verbräitere. Dr Christoph Burckhardt het denn was vo sällere Liigeschaft no übrig gsi isch, kauft und au no die nääbedraa, und vom Archidekt Samuel Werenfels dr nöi Segerhoof lo baue. Däm sis Schiggsaal isch aber nid besser gsi as das vom alte Hoof: zwar isch s äins vo de eligantiste Hüüser in dr Stadt gsi und am 13. Januar 1814 si dr Zar Alexander vo Russland und si Brueder dört abgstiige, aber 1935 isch au äär s Opfer von ere Stroossekorrekzioon worde.[3]
Au dr Santihannsschwibbooge, s Innere Stadtdoor, wo am nördlige Ändi vo dr Strooss gstande isch, het d Stadtblaaner immer wider emol beschäfdigt. So isch er in dr zwäite Helfti vom 16. Joorhundert us umbekannte Gründ bis uf die zwäi Doorbööge über d Strooss, wo mä uf em Matthäus Merian em Eltere sinere Stadtaasicht vo 1642 cha gsee, abbroche worde. Spööter het mä s Door wider ufbaut, wiso wäiss niemer me,[4] bis dass es 1873 ändgültig verschwunde isch.
.JPG)
S Drei Köönig vo dr Middlere Brugg us gsee, Bluemerain 8
Dr Urbanbrunne, Bluemerain 24
Dr Siidehoof, Bluemerain 34.JPG)
.JPG)
.JPG)
