S Bläsischuelhuus

s Bläsischuelhuus zur Zit vo dr Sanierig 2013

Dialäkt: Baseldütsch

S Bläsischuelhuus stoot an dr Müllhäimerstrooss 94 im Mattyskwardier z Baasel. Es isch äini vo säggs Chläibaasler Kwardierschuele, und umfasst as sogenannti Brimarstuefe dr zwäijöörig Kindergaarde und die säggsjöörigi Brimarschuel mit öbbe 350 Brimarschüelerinne und -schüeler und 120 Mäitli und Buebe im Kindergaardenalter. Si wärde vo öbbe 75 Leerchreft underrichdet.

S Bläsischuelhuus isch äins vo de Baasler Kulturgüeter, wo für d Region vo Bedütig si, stoot aber nid under Dänggmolschutz.

S Bläsi isch 1882/83 vom Kantonsbaumäister und Regierigsroot Heinrich Reese im Stiil vom Historismus baut worde, wo an dr Spootrönessans und am Manierismus aagläänt isch. Es het uf drei Stögg vierezwanzig Klassezimmer ghaa mit eme bräite Middelgang zwüschene und zwäi Iigäng. Im lingge Flüügel vom Geböid häi d Mäitli gleert und im rächte d Buebe. Im Estrig vom Middelbau het s Sääl für d Handarbetsschuel ghaa. Die vorderi und die hinderi Fassaade si fast gliich gsi. Us Gsundhäitsgründ het mä d Klassezimmer gege Südoste usgrichdet.

2010 het mä e baar Umbaute gmacht, für dass s Geböid au für Behindereti zuegänglig sig. Mä het e Rollstuel-WC iibaut und e Lift im Hauptgang und an dr Front e nöije Iigang. 2013/14 isch s Geböid umfassend saniert worde.

Kwelle

• Eric Bertels: Hindernisfreies Bauen bei schützenswerten Gebäuden und Anlagen - Beispiel Kanton Basel-Stadt uf docplayer.org (ursprünglig uf proinfirmis.ch im Februar 2013)
• Schulhaus Bläsi / 2013–2014 über d Renowazioon 2013/14 uf ffbk.ch
• Das Bläsi-Schulhaus lässt die Reize seiner alten Bausubstanz aufblitzen Ardikel vom 23. Juni 2014 in dr BZ

Weblingg

• d Website vom Bläsischuelhuus

47.5681757.592493