Birsstadt

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
Dialäkt: Baaseldütsch

D Birsstadt isch e informelle Zämmeschluss vo Gmäinde im undere Baaselbiet, wo gmäinschaftlig Ruumblaanig wäi betriibe.

Drzue ghööre d Baaselbieter Gmäinde Birsfälde, Muttez, Münchestäi, Riinach, Arlese, Ääsch und Pfäffige und s soledurnische Dornach, wo alli im undere Birsdaal ligge.

Die Gmäinde si hüte so zämmegwaggse, ass si e praktisch e gschlosseni Siidlig worde si, wo hüte fast 90'000 Iiwooner drin lääbe. Es isch der Südoschtdeil vo der Agglomerazioon vo Baasel.

Wil d Vorschaue vom Bevölkerigswaggsdum vorussääge, ass im Baaselbiet vor allem die Gmäinde noch bi Basel in dr Zuekumft no mee wärde waggse, häi si sich entschlosse, dr Ruum gmäinsam z blaane. Under anderem wäi si e Gliichgwicht finde zwüsche de mööglige Arbetsblätz und de Duusige vo Woonige, wo wäge de unkoordinierte Zooneblään fääle.

Am Brojekt schafft s ETH Studio Baasel mit, wo sich uf vier Pünkt konzentriert:

  • dr öffentlig Vercheer mit ere Ringdramlinie, wo s Gebiet zun ere äinzige Siidlig wurd zämmeschliesse
  • Kweerverbindige zwüsche de Gmäinde, wo bis hüte z churz cho si, wil sich dr Vercheer in dr Region uf Richdig Baasel konzentriert, und wo zu Bulewaar sölle usbaut wärde
  • eme Park in dr Middi und
  • dr punktuelle Verdichdig vo dr Siidlig.[1]

Weblingg[ändere | Quälltäxt bearbeite]

Fuessnoote[ändere | Quälltäxt bearbeite]

  1. Schub für die Birsstadt (Memento vom 6. Mai 2018 im Internet Archive) Artikel uf hochparterre.ch vom 5. Augschte 2013