Bied (Les Ponts-de-Martel)

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
d Dolyne bi Les Ponts-de-Martel, wo der Grand Bied im Moorbode verschwindet

Der Bied oder au Grand Bied isch e Fluss im Bärgtaal Vallée des Ponts im Kanton Nöieburg. Er ghört zum Yzugsgebiet vo der Aare und do dermit au vom Rhy.

Der Bärgbach isch zwölf Kilometer läng. Sini Kwelle het er bim Dorf La Sagne am Bärg Rochers Bruns uf der Höchi vo 1255 Meter über Meer. Er flüsst dur en grosse Deil vom Pont-Taal gäge Südweschte. Em Bach noo lauft e Deil vo der Gmeindgränze zwüsche Les Ponts-de-Martel und Brot-Plamboz.

Der chly Fluss chunt dur ne wyti Moor- und Rietlandschaft, wo e Deil dervo hüt Naturschutzpiet isch. Bim Dorf Les Ponts-de-Martel goot der Bied in e töifi Dolyne im vercharschtete Chalchbode abe; bis dohi isch er uf 983 Meter über Meer abegloffe. Erscht öppe vier Kilometer wyter im Südweschte und zwöihundertsibezg Meter tüüfer chunt er bo Noiraigue im Val-de-Travers bin ere zwöite Kwelle, wo Source de la Noiraigue heisst, wider us em Jurabärg use, der Dorfbach vo Noiraigue, wo eigentlech der underlauf vom Grand Bied isch, heisst La Noiraigue, und dä Bach mündet gly drufabe unden am Dorf uf der Höchi vo 720 Meter in Fluss Areuse, wo zum Nöieburgersee abelauft.

S Wort “bied” chunt us der frankoprovenzalische Sprooch und bedüütet uf Düütsch «Kanal» und au «Bach». Es isch i der Wälschschwiiz und de romanische Nochberregione en wyt verbreitete Gwässername. Me cha dervo meh bim Wälschschwiizer Mundartwörterbuech, em GPSR, vo der Uni Nöieburg nochelääse.[1]

Weblink[ändere | Quälltäxt bearbeite]

 Commons: Bied (La Sagne) – Sammlig vo Multimediadateie

Fuessnoote[ändere | Quälltäxt bearbeite]

  1. Lueg im Artikel Bief bim Glossaire des patois de la Suisse romande online