Andrea Nahles

d Andrea Nahles (2019)

D Andrea Maria Nahles (* 20. Juni 1970 z Mendig) isch e dytschi Bolitikeri un hitig Bresidänti vu dr Bundesaastalt fir Boscht un Telekommunikation. Vu April 2018 bis Juni 2019 isch si Vorsitzeri vu dr SPD gsii un vu Septämber 2017 bis Juni 2019 au Vorsitzeri vu dr SPD-Bundesdagsfraktion. Vum Dezämber 2013 bis Ändi Septämber 2017 isch si Bundesminischteri fir Arbet un Soziales gsii. Derzue isch si vu 2009 bis 2013 Generalsekretäri vu dr SPD gsii, vu 1995 bis 1999 Bundesvorsitzeri vu dr Jusos un vu 2007 bis 2009 stellverdrättendi Bundesvorsitzeri vu dr SPD.

Läben un Beruef

D Andrea Nahles isch as Doochter vun eme Muurermaischter im rhyland-pfälzische Landchrais Mayen-Koblenz in dr Vulkaneifel ufgwachse. Anne 1989 het si am Megina-Gymnasium Mayen s Abitur gmacht, in dr Abizytig het si as Beruefswunsch „Huusfrau oder Bundeschanzleri“ aagee. An dr Rheinische Friedrich-Wilhelms-Universitet z Bonn het si Bolitik, Philosophi un Germanischtik studiert un bim Jürgen Fohrmann e Magister Artium in dr Fächer Neieri un Elteri Germanischtik un Bolitikwisseschaft gmacht.

In dr Zyt vu ihrem Studium isch si Mitarbaiteri vun eme Bundesdagsabgordnete gsii. Anne 2004 het si am Germanistische Seminar e Dokterarbet iber „Walter Scotts Einfluss auf die Entwicklung des historischen Romans in Deutschland“ aagfange. Mit ihrem Wideryyzug in dr Bundesdag anne 2005 het si d Arbet an ihre Promotion yygstellt.

D Nahles wohnt z Weiler uf eme Buurehof, wu scho ihri Urgroßeltere gläbt ghaa hän. Wäge eme Huftlyyde noch eme Uufall isch si schwärbehinderet (GdB 50).

Ihre Läbespartner isch vu 1997 bis 2007 dr VW-Arbetsdiräkter un ehmolige Audi-Vorstand Horst Neumann gsii, Syt 2009 isch d Nahles mit em Chunschthischtoriker Marcus Frings zämme, am 18. Juni 2010 hän si ghyrote. Am 18. Jänner 2011 het si ne Doochter uf d Wält brocht. Aacht Wuche no dr Geburt het si wider aafange schaffe.

Bolitik

Bartei

D Andrea Nahles isch scho as Gymnasiaschti mit 18 Johr in d SPD aadrätte, anne 1989 het si z Weiler dr SPD-Ortsverain grindet. E baar Johr lang isch si Vorsitzeri vum Juso-Unterbezirk Mayen-Koblenz gsii, vu 1993 bis 1995 derno Vorsitzeri vu dr Jusos Rhylnad-Pfalz. Anne 1995 isch si zue dr Bundesvorsitzeri vu dr Jusos gwehlt wore. D Tageszeitung hetderzue gschribe: „Die neue Juso-Chefin, die gern auch auf ihre frauenpolitische Arbeit verweist, legt Wert auf die Feststellung, dass sie keinem der beiden großen Lager – ,Stamokap‘ und ,Reformsozialisten‘ – innerhalb der Jusos angehört. Allerdings wurde sie am Wochenende mit den Stimmen der traditionalistischen Linken gewählt, deren Kandidat, Ex-Juso-Chef Thomas Westphal, nicht mehr angetreten war“.

Mitglied im SPD-Barteivorstand isch si syter anne 1997, syt 2003 ghert si em SPD-Bresidium aa. Sie het d Brojäktgruppe Burgerversicherig vum SPD-Barteivorstand glaitet. Syt 2000 waisch si Grindisgvorsitzeri vum Forum Demokratischi Linki 21 gsii, wu as Zämmeschluss vu SPD-Line an d Stell vum Frankfurter Chrais getreten ist. Dä Vorsitz het si am 15. Februar 2008 an dr Björn Böhning ibergee. Vu 2002 bis 2003 het si im IG Metall-Verbindigsbiro Berlin gschafft.

Scho bi dr Diskussion um d Agenda 2010 isch si zue dr wichtigschte barteiintärne Kritiker vu dr Bolitik vum Gerhard Schröder zellt wore.

Am 31. Oktober 2005 het si si im Barteivorstand in ere Kampfabstimmig um d Nominierig zue dr Generalsekretäri mit 23 zue 14 Stimme gege dr Kajo Wasserhövel duregsetzt, wu vum domolige Barteivorsitzer Franz Müntefering vorgeschlaa woren isch. Wäge däm het dr Müntefering nimi fir dr Bartievorsitz kandidiert. D Nahles isch vu Dail vu dr SPD heftig kritisiert wore, si het schließli uf d Landidatur zue dr Generalsekretäri verzichtet un het au s Amt vu dr stellverdrättende Barteivorsitzeri abglähnt, wu si vum Matthias Platzeck derfir vorgschlaa woren isch.

Im Mai 2007 isch d Nahles zämme mit em Peer Steinbrück un em Frank-Walter Steinmeier vum SPD-Barteivorstand fir s Amt vu dr stellverdrättende Barteivorsitzeri nominiert un am 26. Oktober 2007 vu 74,8 % vu dr Barteidagsdelegierten in des Amt gwehlt wore.

Am 30. Juni 2009 het dr Chanzlerkandidat vu dr SPD, dr Frank-Walter Steinmeier, d Nahles in sy Schattekabinett fir d Bundesdagswahl 2009 ufgnuu un het ere d Zueständigkait fir Bidlig iberdrait.

Vum 13. Novämber 2009 bis Ändi 2013 isch d Nahles Generalsekretäri gsii. D Nahles het s Amt vum Hubertus Heil no dr verlorene Bundesdagswahl ibernuu. Sieisch uf em Barteidag z Dresden mit 69,9 % vu dr Stimme gwehlt un anne 2011 in däm Amt fir zwai wyteri Johr mit 73,2 % vu allene Delegiertestimme bstetigt wore. Anne 2013 isch si mit 67,2 % widergwehlt wore. No ihre Beruefig zur Minischteri fir Arbet un Sozials isch d Yasmin Fahimi aafangs 2014 zue dr neie SPD-Generalsekretäri gwehlt wore.

Abgordneti

D Andrea Nahles isch vu 1998 bis 2002 Mitglid vum Dytsche Bundesdag un isch s wider syter anne 2005 Dert isch si vu 1998 bis 2002 un vu 2005 bis 2007 stellverdrättendi Sprächeri vu dr Fraktionsarbetsgruppe Arbet un Sozialornig bzw. Arbet un Sozials gsii; syt em Novämber 2007 isch si d Sprächeri vu sällere. Syt em Jänner 2008 ghert si au em Vorstand vu dr SPD-Bundesdagsfraktion aa. D Nahles isch alliwyl iber d Landeslischt Rhyland-Pfalz in dr Bundesdag yyzoge.

D Nahles isch Mitglid vu dr Barlemäntarische Linke un dr Dänkfabrik in dr SPD Bundesdagsfraktion, eme Zämmeschluss vu linke SPD-Abgordnete.

Syt 1999 ghert d Nahles em Chraisdag vum Chrais Mayen-Koblenz aa.

Bundesminischteri fir Arbet un Sozials

Vum 17. Dezämber 2013 bis zum 28. Septämber 2017 isch d Andrea Nahles Bundesminischteri fir Arbet un Soziales gsii.

SPD-Fraktionsvorsitzeri

No dr Bundesdagswahl isch d Nahles am 27. Septämber 2017 zue dr Vorsitzeri vu dr SPD-Bundesdagsfraktion gwehlt wore.

SPD-Vorsitzeri

Am 13. Februar 2018 het dr Martin Schulz sy Ruggdtitt as Barteivorsitzer verchindet. S SPD-Bresidium het derno d Nahles as Noofolgeri vorgschlaa. Am 22. April 2018 isch d Nahles uf eme usserordelige Barteidag z Wiesbaden mit 414 Stimme (66,35 %) zur Barteivorsitzeri gwehlt wore, ihri Gegekandidati, d Flensburger Oberburgermaischteri Simone Lange, het 172 Stimme (27,6 %) iberchuu.

Noch em fir d SPD schlächte Ergebnis bi dr Europawahl 2019 het d Nahles am 2. Juni 2019 ihre Ruggzug vu ihre Ämter as Bartei- un Fraktionsvorsitzeri aagchindet.

Gsellschaftligi Ämter

D Nahles isch vu 2000 bis 2004 as Verdrätteri vu dr SPD Mitglid im ZDF-Färnsehrot gsii. Si isch Mitrusgeebernvu dr Zeitschrift für sozialistische Politik und Wirtschaft (spw). Syt 2004 isch d Nahles Vorsitzeri vum Ferderverain Willy-Brandt-Zäntrum Jerusalem un Vorsitzeri vum Byrot vu dr Barteischuel im Willy-Brandt-Huus. Derzue isch si Mitglid vu d Gwerkschaft IG Metall, dr gmainnitzige Europäische Sunnenenergyverainigung Eurosolar un vu Attac.

Schrifte

• Frau, gläubig, links. Was mir wichtig ist. Pattloch Verlag, München 2009. ISBN 978-3-629-02239-4
• Die Kamera sieht alles – Wie frau sich in Polit-Talkshows verhalten sollte. In: Sascha Michel, Heiko Girnth (Hrsg.): Polit-Talkshows – Bühnen der Macht. Ein Blick hinter die Kulissen. Bouvier, Bonn 2009. ISBN 978-3-416-03280-3, S. 174–176

Weblink

 Commons: Andrea Nahles – Sammlig vo Multimediadateie

• Website von Andrea Nahles
• Biographie beim Deutschen Bundestag
• Andrea Nahles uf abgeordnetenwatch.de

Fueßnote

Dä Artikel basiert uff ere fräie Übersetzig vu dere Version vum Artikel „Andrea_Nahles“ vu de dütsche Wikipedia. E Liste vu de Autore un Versione isch do z finde.