Alain-Foechterle-Erich-Dilger-Brugg
D Alain-Foechterle-Erich-Dilger-Brugg isch e Brugg, wo übere alt Rhy und d Gränze zwüsche Dütschland und Frankrych goot. Si isch es Bouwärch, wo im Turismus-Programm «Zwöi Ufer, drü Brugge – tuusig Sache zum entdecke»[1] vom Oberelsass und vom Markgräflerland dienet.
D Brugg isch für die diräkti Strooss zwüschem elsässische Dorf Fassene und em baadische Haarde gmacht worde. D Bouzyt isch vo 2005 bis 2006 gsi.
Es het i däm Abschnidd vom Oberrhy vorhäär zwüsche de Brugge vo Neueburg und Briisech, wo öpe 25 Kilometer von enander wägg sind, kei Stääg gha zum vo dr dütsche uf die alsässischi Syte und umkeert z goo. Bim Wasserchraftwärch vo Fassene und dr doplete Schleuse grad näbedra isch aber scho vorhär d Stross übere elsässisch Sytekanal vom Rhy und is Naturschutzpiet vo dr Auelandschaft ggange. Mit dr Alain-Foechterle-Erich-Dilger-Brugg, wo übere alt Lauf vom Rhy öschtlech vom Rhysytekanal goot, het me jetz d Lücke zuetoo.
Bi Haarde foot die churzi Strooss zu dr Brugg a dr Uuffahrt 64b vo dr Rhytaalautobahn a. D Strooss goot numme öpe 200 Meter wyt dur s Waldgebiet vom Hardt zwöispuurig mit eme Welostreife näbedra bis vore Bruggechopf. Dört wird si äng, wil’s uf dr Brugg nur no ei Fahrspuur für Pkw het, wo d Fahrrichtig jewyle mit Ample freiggä wird. Über die Brugg törfe Fahrzüüg bis 3,5 Donne und uff ere eigete Spuur Fuessgänger und Welo goo.
D Brugg isch 210 Meter lang. Si isch us Staal gmacht und het föif Fälder und stoot uf Pfyyler, wo a den Ufer drissg und im Fluss füfzg Meter wyt usenand sind.
Bi Fassene heisst d Strooss, wo zum Chraftwärch und de Schleuse und dr Rhyburgg gott, hütt Europastrooss. Si zweigt bi dr Induschtryzone vo Fassene vo dr elsässische Hauptstrooss D52 ab, wo em Sytekanal vom Rhy noogoot.
Wo die nöji Rhybrugg fertig gsi isch, het me se am 20. Mai ane 2005 ygweit. Dr domolig französisch Presidänt Jacques Chirac isch persönlig is Elsass cho für die Fyyr.[2] D Brugg het am Afang Hardtbrücke Erich Dilger gheisse. Dr Erich Dilger isch dr Bürgermeischter vo Haarde gsi, bis er ane 2001 gstorben isch, und zue sym Gedächtnis het d Brugg dr Name übercho.[3]
Ane 2008 isch dr Name vo dr Brugg lenger worde, wo me au dr Name vom früenere Fassener Bürgermeischter Alain Foechterlé (im Ampt vo 1989 bis 2008) drygschribe het. Dr Foechterlé und dr Dilger sind die gsi, wo 1993 d Partnerschaft zwüsche dene beide alemannische Gmeinde agfange händ.[4]
Lueg au
[ändere | Quälltäxt bearbeite]Kwelle
[ändere | Quälltäxt bearbeite]- ↑ Website vo Zwöi Ufer, drü Brugge – tuusig Sache zum entdecke (Memento vom 11. Augschte 2013 im Internet Archive) (2rives3ponts.eu)
- ↑ Die neue Hardtbrücke Erich Dilger (Memento vom 20. Augschte 2017 im Internet Archive) under Infrastruktur uf hartheim.de
- ↑ Erinnerung an einen Grenzüberschreiter (Memento vom 3. April 2016 im Internet Archive) Artikel vom Otmar Faller uf badische-zeitung.de vom 3. Augste 2011
- ↑ Freundschaft ohne Grenzen (Memento vom 31. Augschte 2018 im Internet Archive) uf rheinbruecke.org
Weblinggs
[ändere | Quälltäxt bearbeite]
Commons: Alain-Foechterle-Erich-Dilger-Brücke – Sammlig vo Multimediadateie| Di nögscht Brugg flussufwärts: Rhybrugg Nöieburg–Chalampé |
Bruggene öber de Rhy | Di nögscht Brugg flussabwärts: Rhybrugg Brisach–Neuf-Brisach |