Agnes vo Ungarn

D Agnes vo Ungarn, wo öppen im Joor 1281 uf d Wält cho und am elfte Juli 1364 z Chönigsfälden im Aargau gstoorben isch, isch e habsburgischi Prinzässin, Königin vo Ungarn und d Leiterin vom Chlooschter Chönigsfälde gsi.

Si isch d Dochter vom Habsburger König Albrächt und däm synere Frou Elisabeth gsi. Anne 1296 het si dr ungaarisch König Andreas ghürootet, wo aber scho füüf Joor drufabe gstorben isch.

Anne 1308 isch iire Vater, dr König Albrächt, i der Nööchi vo dr Rüüss und em Doorff Windisch tötet woorde. D Königinwitwe Elisabeth het dodrufabe ufem Fäld zwüsche Windisch un dr Stadt Brugg, im habsburgischen «Eigeamt», es Chlooschter lo boue, zum Aadänken a König Albrächt, iire Maa.

D Agnes isch anne 1317 i das Chlooschter bi Windisch choo. Si isch nit sälber Chlooschterfrou woorde, me het sen aber als Leiterin vom ganze Konvänt und em Chlooschterbetriib lo schaffe. D Habsburgerin het d Gschäft vom Chlooschter guet gfüert, es het e bedüütendi Grundherrschaft im Aargau gha; s «Eigenamt» mit de Döörffer ringsume isch in Bsitz vom Chlooschter cho.

Under dr Agnes isch die gootischi Chlooschterchile mit de prächtige Bildfäischter gmacht worde.

I der Schwiizer Gschicht dänkt me gäärn a d Agnes vo Chönigsfälde, will si als gschydi Frou au bi den Äiggnosse öppis gulte het; wenn s bi dene wider mol Striit gää het, was immer wider vorchoo isch, isch me zu säbere Zyt gäärn uf Chönigsfälde bi dr Habsburger Chlooschtervorsteherin go Root hole.

Literatur

Martina Wehrli-Johns: Agnes von Ungarn In: Historisches Lexikon vo dr Schwiiz.
Eduard Widmoser: Agnes von Österreich. In: Neue Deutsche Biographie (NDB). Band 1, Duncker & Humblot, Berlin 1953, ISBN 3-428-00182-6, S. 96.
Constantin von Wurzbach: Habsburg, Agnes (Königin von Ungarn). In: Biographisches Lexikon des Kaiserthums Oesterreich. Bd 6. Verlag L. C. Zamarski, Wien 1856–1891, S. 137 (uf Wikisource).

Weblink

Commons: Agnes vo Ungarn – Sammlig vo Multimediadateie