Agilo

Us der alemannische Wikipedia, der freie Dialäkt-Enzyklopedy

De Agilo (lat. Agilo; altgriech᾿Αγέλων; alem. *Agilo ) isch en alemannische Chrieger gsii, wo im römische Heer dient het. Er het e Tochter vom Araxius, emene Fründ vom Julian, ghüroote.

De Agilo isch im Joor 354 as tribunus stabuli im Dienst vom römische Kaiser Constantius II. gstande, isch aber verdöchtigt worde, as er zäme mitem Latinus und em Scudilo de alemannischi König Vadomari voremene römische Öberfall gwarnt hebi. Trotzdem isch er im Joor 360 vom Kaiser Constantius zum magister peditum præsentalis biförderet wore und het denn drufabe am Tigris gege d Perser kämpft. Obwol er de Constantius gege de Julian unterstützt het, isch er nochem Siig vom Julian zume Mitgliid vode Untersuechigskomission vo Chalkedon gwält worde, wo sich gege d Günstling vom Constantius grichtet het. Im Joor 365 ischer zäme mitem Gomoari underem Usurpator Procopius magister militum gsii, isch denn aber 366 zum rechtmässige Kaiser Valens öbertrete und het dem zum Siig vo Nakoleia biitrait.

Quelle[ändere | Quälltäxt bearbeite]

  • Ammianus Marcellinus 14,10,8; 20,2,5; 21,12,16-18; 13,3; 22,3,1; 8,49; 26,7,4-6; 9,7; 10,7.
  • Zosimos 4,8,3