Weisser Sonntag

Us der alemannische Wikipedia, der freie Dialäkt-Enzyklopedy
Hops zue: Navigation, Suech
Erstkommunion-Chind am Wysse Sunntig

De Wyssi Sunntig (lat. Dominica in albis) isch immer de Sunntig noch Ostere und mit em goht d Osteroktav z end. De früesti Termin vom Wysse Sunntig isch de 29. März, de spöötist Termin isch de 2. Mai.

Bedütig[ändere | Quälltäxt bearbeite]

I de katholische Konfessione send d Bezeichnig 2. Sunntig vo de Osterzyt oder Wysse Sunntig üblich.[1] De Ursprung vom Name „Wysse Sunntig“ isch nöd ganz klar. Wohrschindli häts mit de wysse Taufgwänder z tue, wo i de früene Cherche vo de Taufte, vo de Osternacht bis zu dem Sunntig trait worde sind. I de evangelische Liturgii bezaichnet me de Sunntig noch de Eröffnigswort vo dem Gottesdienst als Quasimodogeniti (Wie die Neugeborenen).

I de katholische Läseordnig isch als Evangelium i allne drei Lesejohr Joh 20,19–29 vorgseh. Di erste Läsige brichted vom Läbe i de Urgmaind. Di zwaite Läsige betoned d Hoffnig för di Gläubige, wo i de Überwindig vom Tod dur Christus isch.

I de katholische Cherche isch de Wyssi Sunntig tradizionell de Tag för di fyrlich Erstkommunion vo de Chind. Wägem Priestermangel müend d Pfarreie sich underenand abspräche und en andere Termin, meist en spöötere Sunntig, wähle.

Am 30. April 2000 hät de Papst Johannes Paul II. für di katholisch Cherche festglait, as a däm Tag de „Barmherzigkaitssunntig“ gfyred wärde söll. Er hät demit en Wunsch vo de polnische Ordensschwöster Maria Faustyna Kowalska (1905–1938) erfüllt. Er hät si a däm Tag heiliggsproche.[2]

Lueg au[ändere | Quälltäxt bearbeite]

 Allmänd (Commons): Erstkommunion – Sammlig vo witere Multimediadateie

Ainzelnochwys[ändere | Quälltäxt bearbeite]

  1. Vgl. bi Schott - zur Tagesliturgii Websyte vom Benediktinerkloster Beuron
  2. Heiligsprechig vo de Maria Faustyna Kowalska – Predigt vom Johannes Paul II. (Über d Bedütig vom Barmherzigkaitssunntig). Libreria Editrice Vaticana (30. April 2000). Abgrüeft am 6. April 2012.