Reformationstag

Us der alemannische Wikipedia, der freie Dialäkt-Enzyklopedy
Hops zue: Navigation, Suech
Flugblatt zum erschte Gedänke an d Vereffetlichung vu dr These vum Martin Luther

Dr Reformationsdag wird vu evangelische Chrischte z Dytschland am 31. Oktober im Gedänke an d Reformation vu dr Chilche dur dr Martin Luther gfyyrt. In dr Schwyz giltet dr erscht Sunntig im Novämber as Reformationsdag.

Ursprung un Gschicht[ändere | Quälltäxt bearbeite]

No dr Iberliferig soll dr Mench un Theologibrofässer Martin Luther am Dag vor Allerhailige 1517 an d Dire vu dr Schlosschilche z Wittenberg 95 These uf Latynisch zue Abloss un Bueß aagschlaa haa go ne akademischi Disputation beizfiere. Dodermit het er d Reformation vu dr Chilche yyglaitet. Im Chärn het er d Aasicht bstritte, ass e Erlesig vu dr Sinde dur e Ablass in Form vun ere Gäldzahlig megli sei. Des sei scho dur s Opfer Jesu am Chryz gschääne. Dr Luther het syni These in Briefform an mehreri gaischtligi Wirdedreger un Bischef vum Rych gschickt. Wu d Bischef nit reagiert hän, soll er die 95 These an d Schlosschilche z Wittenberg aagschlaa haa. Eb dr Thesenaaschlag wirkli stattgfunde het, isch aber nit zwyfelsfrei nogwise.[1]

Scho im Reformationsjohrhundert finde sich verainzelti Johresfyre. Zerscht sin au dr 10. Novämber oder dr 18. Februar (em Luther syy Geburts- un Dodesdag) as Gedänkdäg gfyrt wore. Derzue het dr 25. Juni as Dag vu dr Augschburger Konfession as Feschtdag gulte. Dr Kurfirscht Johann Georg II. vu Sachse het 1667 dr 31. Oktober feschtgsetzt, wu sich derno in dr maischte Länder duregsetzt het.

Liturgi[ändere | Quälltäxt bearbeite]

Dr Gottesdienscht zum Reformationsdag findet, dert wu dr Dag nit e gsetzlige Fyrtig isch, als am Oobe vum 31. Oktober statt. S Thema isch weniger s Gedächtnis vum Thesenaaschlag, derfir meh d Lehr vu dr Rächtfertigung vum Sinder ellai dur dr Glaube, wu fir dr Luther dr Uusleser un dr Chärn vu dr Reformationsbewegig gsi isch. D Epistelläsig vum Dag isch wäge däm Röm 3,21–31 LUT, Evangelium Mt 5,2–10 LUT.

S Lied vum Dag isch Nun freut euch, lieben Christen g’mein, em Luther sy „Erzähllied“ vu syre reformatorische Entdeckig (EG 341), oder Ist Gott für mich, so trete gleich alles wider mich vum Paul Gerhardt (EG 351). Chuum e Reformationsgottesdienscht hert uf ohni s Luthers Ein feste Burg ist unser Gott.

Di liturgisch Farb isch Rot, d Farb vum Hailige Gaischt un vu dr Chilche.

Gsetzligi Fyrtig[ändere | Quälltäxt bearbeite]

Dr Reformationsdag isch e gsetzlige Fyrtig in dr dytsche Bundesländer Brandeburg, Mecklenburg-Vorpommern, Sachse, Sachse-Anhalt un Thüringe. Z Bade-Wirttebärg isch dr Dag schuelfrei, z Nidersachse hän evangelischi Schueler uf Aadrag d Megligkait, fir d Duur vun eme Gottesdienscht vum Unterricht freigstellt z wäre. In andere Länder mit eme evangelische Bevelkerigsaadail het dr Dag vilmol e bsunderi gsetzligi Stellig, wu mit dr Stille Däg verglychbar isch.

Ußer z Dytschland isch dr Reformationsdag e gsetzlige Fyrtig z Slowenie un z Chile[2]. In dr Schwyz fyre di reformierte Chilche am erschte Sunntig im Novämber dr Reformationssunntig. Im in dr Hauptsach katholische Eschtrych isch dr Dag kai gsetzlige Fyrtig. Evangelischi Schueler hän am 31. Oktober aber schuelfrei un evangelische Arbetnämmer isch dr Bsuech vum Gottesdienscht megli.

Dr Reformationsdag fallt uf s nämlig Datum wie Halloween, s git aber kai inhaltlige Bezug zwische däne beede.

Weblink[ändere | Quälltäxt bearbeite]

Fueßnote[ändere | Quälltäxt bearbeite]

  1. Diskussion iber dr Thesenaaschlag noch em Fund vun ere Notiz im Nooloss vum Luther-Assischtänt Georg Rörer anne 2007 in dr Bibliothek vu dr Friedrich-Schiller-Universitet Jena, Hat Martin Luther am 31. Oktober 1517 seine 95 Thesen an Wittenberger Kirchentüren geschlagen, oder ist dies eine Legende?, abgruefe 29. Oktober 2008.
  2. ekd.de: Reformationstag – Gesetzlicher Feiertag


Dä Artikel basiert uff ere fräie Übersetzig vum Artikel „Reformationstag“ vu de dütsche Wikipedia.

E Liste vu de Autore un Versione isch do z finde.