St. Galler Rheintal

Sanggaller Rhintl

Laag vom Rhintl im Kanton Sanggalla

S Sanggaller Rhintl fangt uugföör bi Sennwald im Süüda aa und hört denn im Noorda öppa mit Rhinegg uf. Es liit uf de leangga Site vom Rhii, mit Uusnahm vo Tippilzou, wo dor d Regulierig vom Rhii a Insle wora ischt.

D Schrägsailbrugg öber da Rhii uf Tippilzou

Gschicht

Es hed amol a Republik Rhintl gee, dia isch denn aber wenig spöter in nöi gründete Kanton Sanggalla integriert wora.

Geografii

geologisch

S Tal isch entschtanda will d Platta zwüschad da zwo Bergreiha in Joormilliona zwe Kilometer wit abgsunka sin. Do dura isch s Rhintl zumana recht flacha Tal wora, wo denn uf beidna Sita dur recht schnell aastigandi Hügl abgränzt wird. S Rhintl isch recht erdbebagföördat, weils uf zwo verschiidana Plattana lit. Allpot ghört mer widar achli vo chlinna Erdbeba, wo d Lüt denn aber nöd amol gross kspörid.

politsich

Im Norde isch de Bodesee s Ändi vom Sanggaller Rhintl. Drum het d Gmaind Taal mit em Flughafe Sanggale-Alterhii früener, wos im Kanton Sanggalle no Bezirk ge het, zum Bezirk Underrhintl ghört. Hüt fangt de Waalkrais Rhintl mit Rhinegg a.

Im Süüde isch es a kli schwiriger zum säge, wo as s Sanggaller Rhintl ufhört. De alt Bezirk Oberrhintl isch bis und mit Rüthi, wo bis 1994 no offiziell Rüthi (Rheintal) ghaisse het, gange. Rüthi isch au hüt no di südlichst Gmaind im Waalkrais Rhintl. Rhii ufwärts schlüsst denn de Waalkrais Werdeberg a. D Raststett a de Autobahn A13 uf Höchi Bugs isch früener mit 'Werdenberg' aagschribe gsi, hüt stoht döt 'Raststätte Rheintal'. De Waalkrais Werdeberg goht bis uf Trüebbach, e Dorf i de Gmaind Wartau, ufi. Dänn chunnt s Sargaserland oder anderst gsait, s Sanggaller Oberland, und da isch aidütig nüme im Rhintl.

Landwertschaft

Durch da, dass s Rhintl aso flach isch, rentiert sich s Buure recht guat im Rhintl. Durch da Föö, wo öppa usam Tessin is Rhintl blosat, ischs Klima meist recht mild.

Dur di günstiga geografischa Begebeheita wird im Rintl vil Landwertschaft betriba. E bekannts Produkt ischt da Ribelmais, me seit em o Törgga, und es git o scho Ribelpier vo da Sunnabröi. Es anders Produkt isch s Rapsöl, wo au im Rhintl produziert werd. Dur s milda Klima chönid o Wiitruba im Rhintl aabaua wöra. Aso isch o s Doarf Rebstoa zu sim Nama cho. Mittlerwila werd aber o döt numma sövil Wii abaua.

D Burg Nöi-Altstetta ob Lüchige

Sehenswördigkaite

S bekanntischt Städtli näbet Rhinegg isch de ehemolig Bezirkshoptort Altstetta, wo jede Donnstig Maart ischt. Dänn häts fascht i jedem Dorf a Schloss oder a Burg. Di ainte send no bewohnt, di andere nu no a Ruine. Im Kobelwaald obe chamme ine Höhli ini, go Kristall aluege.

Dialekt

Da Dialekt voda Rhintaler isch vor allem im Mittelrhintl gspickt vo Wörter mit Doppellut, da Endig vo vilna Verba uf -a und em weiche "k"-Lut (wie Kuchikäschtli). Aber au im Rhintl gond toals Dialäkt starch usanand, anderersiits verschmelzid dia Sprochana bald amol zumn oanheitlicha Dialekt im Rhintl, du da früazitig Kontakt mit da andara. Da Dialekt vom undera Rhintl ghöert zum Niideralemannischa.

Blick vo Kobelwaald uf Oberriet abi

Gmoandsfusione

D Rhintaler Gmoanda sind aso starch am Wachsa, dass sie fascht scho mittanand verschmolza send. Das, und o di wirtschaftlich Lag, füert dezua, dass diversi Rhintaler Gmoanda öberleggid, zum fusioniera.

Kernkraftwerchbau

Was immer wider beschprocha werd, wär as Kernkraftwerch bi Rüthi, wo aber bi da Bevölkerig uf grossi Ableenig stosst. O weils aso nöch bi Östriich isch, wörda d Östriicher woll interveniera, wenn s Projekt wörklich wör realisiert wera. Es isch scho ida 70er-Joor amol aso wit gsi, isch aber nöd baue wora.

Weblink

 Allmänd (Commons): Rhintl – Sammlig vo witere Multimediadateie

 Allmänd (Commons): Werdabärg – Sammlig vo witere Multimediadateie

• St. Galler Rheintal - das Chancental Site vom Verein St. Galler Rheintal
• myrheintal.ch Internetsite vo de Zytige Rheintalische Volkszeitung und Der Rheintaler