Anne 1983 het d Michela Figini an dr Ski-Juniore-WM z Sestriere d Bronzemedallie im Riiseslalom gwunne, doderfir het si d Stiftig Schweizer Sporthilfe as Schwyzer Noowuchsathleti vum Johr 1983 uuszaichnet. In dr 1980er Johr het d Spezialischti fir di schnälle Diszipline zue dr sterkschte Skirännlaiferne zellt. Si het 26 Ainzelränne gwunne, dodervu 17 Abfahrtslaif, 1985 un 1988 dr Gsamtwältcup, viermol dr Ainzelwältcup in dr Abfahrt un aimol dr Super-G-Wältcup. Im Riiseslalomwältcup 1984/85 het si mit 110 Pinkt glych vyl ghaa wie d Marina Kiehl un au ai Siig meh in däre Saison, aber d Zahl vu dr Strychresultat het dr Uusschlag gee, wu d Kiehl mit 53 gegeniber 33 vorne glägen isch.
Bi dr Wältmaischterschafte het si 1985 z Santa Caterina in dr Abfahrt Gold gholt, zwai Johr speter het si bi dr Wältmaischterschafte z Crans-Montana d Silbermedallie in dr Abfahrt un im Super-G gwunne.
D Chrenig vu ihre Laufbahn isch dr Siig in dr Abfahrt bi dr Olympische Spiil 1984 z Sarajevo gsii, wu si d Maria Walliser un d Olga Charvátová uf dr zweet un dr dritt Blatz het chenne verwyse. Bi dr Olympische Spiil 1988 z Calgary het si im Super-G hinter dr Sigrid Wolf d Silbermedallie gwunne. No Differänze mit em Jan Tischhauser, em Schwyzer Nationalmannschaftstrainer, isch si anne 1990 zrugdrätte.
Hite läbt d Figini, wu no ihre Karriere au as TV-Kommentatori gschafft het[1], z Lugano. Si isch ghyrote mit em Sportschurnalischt Alberto Tettamanti. Us dr erscht Eh mit em Italiener Ivano Camozzi, eme ehmolige Skirännlaifer vu dr 1980er Johr, stamme zwai Chinder, d Dochter Valentina und dr Suhn Marco.
D Michela Figini het in dr Saison 1984/85 un 1978/88 dr Gsamtwältcup gwunne. Derzue cheme fimf Siig in Disziplinewärtige (viermol Abfahrt, aimol Super-G).
↑"Sport-Bild & Audi präsentieren die Ski-WM '93 - Alles über die spannenden Rennen vom 3. bis 14. Februar in Morioka (Japan)", Sport-Bild vum 3. Februar 1993, S. 31ff, 34
Dä Artikel basiert uff ere fräie Übersetzig vu dere Version vum Artikel „Michela_Figini“ vu de dütsche Wikipedia. E Liste vu de Autore un Versione isch do z finde.
Schwiz
