Lothar I. (Frankenreich)

Us der alemannische Wikipedia, der freie Dialäkt-Enzyklopedy
Hops zue: Navigation, Suech
Lothar I.
Römische Kaiser und König vo Italie
Lothar I.jpg
Bild vom Lothar in eme Evangeliar vo ihm
Regierigsziit As Kaiser: 817-855;
As König vo Italie: 818-855
As König vom Mittelriich: 843-855
Chrönig Vo siim Vater: 817, Aache;
Vom Papst Paschalis I.: 5. April 823, Rom
Uf d Wält cho 795
Gstorbe 29. September 855
Dodesort Prüm
Begrabe Prüm
Vorgänger Ludwig dr Frommi
Dronfolg Noch dr Lex Salica: Si Riich isch under allne siine Söhn ufdeilt worde
Nochfolger Ludwig II. as Kaiser, Lothar II., Karl
Verhürotet mit Irmingard vo Tours
Nochkomme Ludwig II., Lothar II., Karl
Kgl. Huus Karolinger
Vater Ludwig dr Frommi
Mueter Irmingard vo Hesbaye

Dr Lothar I. (* 795; † 29. September 855 z Prüm) isch e fränkische König und Kaiser gsi, d. h. währed dr Herrschaft vo siim Vater zerst Mitkaiser vom römische Riich.

Läbe[ändere | Quälltäxt bearbeite]

Dr Lothar isch as dr eltist Sohn vom Ludwig em Fromme und siiner Frau, dr Irmingard 795 uf d Wält cho. Er isch im Juli 817 bi dr Deilig vom Riich Mitkaiser worde, nochdäm er sit em August 814 Bayre regiert het. Er het sich Mitti Oktober 821 z Diedehofe (Thionville) mit dr Irmingard vo Tours verhürotet, dr Dochter vom Graf Hugo vo Tours. 822 het er Italie übercho und e Johr spöter het en dr Papst Paschalis I. an dr Ostere, am 5. April 823, zum Kaiser krönt.[1]

Im Novämber 824 het er d Konstitution erlo, wo d Rächt vom Kaiser und vom Papst z Rom und im Chillestaat festgleit het. Wo aber dr Ludwig dr Frommi em Karl em Kahle, em Sohn vo siiner zweite Frau, dr Judith, im August 829 Alemannie ge het, hai siini drei Söhn vo siiner erste Frau sich gegen ihre Vater erhobe und hai en 830 abgsetzt. Dr Ludwig isch aber wider befreit worde und dr Lothar het 831 d Regäntschaft verlore.

Bim ene neue Ufstand 833 si beidi Parteie Ändi Juni scho uf em Rotfäld bi Colmar sich gegenüber gstande, bis dr Ludwig alli Understützig verlore het und am 30. Juni zwunge gsi isch, sich z erge und faktisch abzdanke. Es isch en öffentligs Schuldbekenntnis cho und d Verbannig vo dr Judith und deren ihrem Sohn Karl in e Chloster. S Colmarer Rotfäld isch wäge de Eid, wo dört broche worde si, bald num no as Lugifäld bezeichnet worde.

Dr Lothar isch jetzt sicher gsi, ass si Herrschaft über s ganze Riich gsicheret siig, doch siini Brüeder hai sich jetzt gegen ihn zsämme mit ihrem abgsetzte Vater Ludwig und hai dä am 1. März 834 z Saint-Denis wider uf e Dron gsetzt. Dr Lothar, wo noch Burgund gflüchtet isch, het sich im Juni 834 z Blois müesse underwärfe; er het nume Italie as Underkönigriich döfe bhalte, und het s Land, ohni dass dr Ludwig zuegstimmt het, nit döfe verlo.

Bi dr neue Deilig vom Riich noch em Pippin siim Dod het men em Lothar wider verge und er het usser Italie Austrasie ohni Bayre (Juni 839) übercho. Noch em Vater siim Dod im Juni 840 het dr Lothar die volli Anerkennig as Kaiser beasprucht. Aber dr Ludwig und dr Karl hai en bi Fontenoy im Burgund am 25. Juni 841 gschlage. Im Verdrag vo Verdun vom 10. August 843 het dr Lothar usser dr Kaiserwürde und Italie Burgundie und d Länder zwüschen em Rhii, dr Maas und dr Schelde bis an d Nordsee übercho, mit de beide Hauptstedt Rom und Aache, das isch s sogenannte Mittelriich gsi.


Währed er z Aache bliiben isch für zum si Macht z befestige, hai d Araber 848 siini italiänische Provinze verwüestet, und d Normanne d Küste vo dr Nordsee plünderet. Dr hoch Klerus het sich e sälbständigi Stellig errunge, und die grosse Vasalle hai noch em Lothar siim Vorbild mit Willkür und Gwalt gherrscht.

Er isch schwer chrank gsi, won er im Septämber 855 in dr Deilig vo Prüm si Riich under siinei drei Söhn ufdeilt het:

Noch siiner Abdankig het er sich schliesslig in d Abtei Prüm in der Eifel zruggzoge, won er e baar Däg druf, am 29. Septämber 855, as Mönch gstorben isch und wo men en au begrabe het. Siini Chnoche si 1721 bim Neubau vo dr Abteichille in dr neu Hochaltar umbettet und 1860 widergfunde worde.

1874 het me mit dr finanzielle Understützig vom Kaiser Wilhelms I. e neus Grabmol baut. In d Grabplatte isch d Grabinschrift vom Hrabanus Maurus iigmeisslet:

Continet hic tumulus memorandi Caesaris ossa, Hlotharii, magni principis atque pii. Qui Francis, Italis, Romanis praefuit ipsis, Omnia sed sprevit, pauper et hinc abiit. Nam bis tricenos monachus sic attigit annos, Et se mutavit, ac bene post obiit. III. Cal. Octob.

Freiji Übersetzig: In däm Grab si d Chnoche vom unvergesslige Kaiser, Lothars, em grosse und gottesfürchtige Herrscher, wo über d Franken, d Italier, und sogar d Römer gregiert het, het aber doch alles verschmäht und isch as Arme furtgange. As Mönch isch er jo grad no Sächzgi worde. Er het sich gänderet und isch drnoch selig gstorbe am 29. Septämber. (855).

Uf e Lothar goht dr latiinisch Spruch Tempora mutantur zrugg.

Rezeption[ändere | Quälltäxt bearbeite]

In de Quelle, wo si Gschicht verzele, wird dr Lothar meistens beschriibe wien er vom Ehrgiiz driibe und ohni Staatsräson gsi siig. Dä negativi Ruef wird au vo vile wüsseschaftlige Undersuechige ufgriffe und widerge. Drbii sött me nit vergässe, ass d Hauptquelle us sällere Ziit alli us em Umfäld vom Lothar siine Brüeder, em Karl und em Ludwig, stamme. Es isch kei Gschichtswärk entstande, oder wenigstens nit überliiferet worde, vo öbberem, wo im noochgstande isch, und wo wohrschiinlig positiver usecho wer. S traditionell negative Bild vo däm Herrscher dörft im nit grächt wärde.

Nochkomme[ändere | Quälltäxt bearbeite]

Mit dr Irmingard het dr Lothar nüün Chinder gha:

  • Ludwig II. (* wohrschiinlig 825; † 875), Mitkaiser
  • Helletrud (Hiltrud) (* wohrschiinlig 826; † noch 865/866), ∞ Graf Berengar († vor 865/866)
  • Bertha (* wohrschiinlig 830; † noch 7. Mai 852, wohrschiinlig 877), vor 847 Äbtissin vo Avenay, villicht Äbtissin vo Faremoutiers
  • Ermengarde (Irmgard) (* wohrschiinlig 826/830), 846 entfüehrt, ∞ Giselbert vo Maasgau, Graf im Maasgau (Reginare), 866 Graf im Lommegau, d Hürot 849 anerkennt
  • Gisla (* wohl 830; † 860), 851–860 Äbtissin vo San Salvatore z Brescia
  • Lothar II. (* wohrschiinlig 835; † 869), König vo Lothringe, ∞ I 855 Teutberga, Dochter vom Graf Boso vo Arles (Bosonide)
  • Rotrud (dauft 835/840 z Pavia), ∞ um 850/851 Lambert II. vo Nantes, Graf vo dr Bretonischen Mark, Graf vo Nantes (Widone), X 1. Mai 852
  • Karl (* wohrschiinlig 845; † 25. Januar 863 im Chloster St-Pierre-les-Nonnains, hüte Lyon), König in Burgund
  • Karlmann (* 853)


Literatur[ändere | Quälltäxt bearbeite]

  • Geschichtsverein Prümer Land e.V. (Hrsg.): Lothar I., Kaiser und Mönch in Prüm – Zum 1150. Jahr seines Todes. Prüm 2005, ISBN 3-931478-19-X.

Weblingg[ändere | Quälltäxt bearbeite]

Fuessnote[ändere | Quälltäxt bearbeite]

  1. http://www.newadvent.org/cathen/11514a.htm
Vorgänger Amt Nochfolger
Ludwig dr Frommi König vo Lotharingie
814–817
Lothar II.
Bernhard König vo de Langobarde
822–855
Ludwig II.
Ludwig dr Frommi Römische Kaiser
823–855
Dä Artikel basiert uff ere fräie Übersetzig vum Artikel „Lothar_I._(Frankenreich)“ vu de dütsche Wikipedia.

E Liste vu de Autore un Versione isch do z finde.