Gotthardmassiv

S Gotthardmassiv isch es Gebirgsmassiv i de Schwiiz zwüsched de Kantön Graubünde, Tessin, Wallis und Uri. S Gotthardmassiv häd sin Name vom St. Gotthardpass.

S Gotthardmassiv häd e wichtigi Rolle im Transitvercheer. I de Nord-Süd-Richtig sind de St. Gotthardpass (2108m) und de Lukmanierpass (1984m) im Gotthardmassiv. I de Oscht-Wescht-Richtig sind s de Oberalppass (2044m) und de Furkapass (2431m).

Als geographischi Gränze vom Gotthardmassiv gälted s Gadmentaal, de Suschtepass (2240m), s Mäietaal und s Maderantertaal im Norde, im Weschte de Grimselpass (2165m) won s vom Aaremassiv tränne tuet und de Nufenepass (2440m). Im Süüde sind s s Bederettotal und d Leventina, im Oschte de St. Bernhardinpass (2066m).

En Bäärg won Gotthard ghäisst gits nöd. Rächts und linggs vom Pass sind de Pizzo Centrale und d Fibbia. Di högschte Gipfel vom Gotthardmassiv sind de Dammastock (3630m), de Pizzo Rotondo (3192m) der Oberalpstock (3328m) und s Riiwaldhorn (3402m).

Vom hydrologische Standphunkt här isch es intressant zum Wüsse, das i dem Gebirgsmassiv di europäischi Wasserschäide zwüschet em Mittelmeer und de Nordsee isch. Die vier groosse Flüss vo de Schwiiz, de Rii, d Roone, d Rüüss und de Tessin (Fluss)Tessin händ iri Quäle da obe. D Stei sind Gneis. De Stei isch elter als di untere Stei, wil sich bim Gotthard di geologische Schichte überenand gschobe händ.