Ermanarich

Us der alemannische Wikipedia, der freie Dialäkt-Enzyklopedy
Hops zue: Navigation, Suech

De Ermanarich (lat. Erminrichus, Hermanaricus) isch um 370 de König vo de Greuthunge gsii. Er isch ane 375 bim Iifall vo de Hune gstorbe.

Famili und Riich vom Ermanarich[ändere | Quälltäxt bearbeite]

De Ermanarich het wie de Theoderich de Gross zum Gschlecht vo de Amaler ghört. Er isch de Soo vom Achiulf gsii und de Vatter vom Hunimund. Sini Brüdere sind de Ansila, de Ediulf und de Vultulf gsii. Er het öber die nordpontischi Steppe nördlich vom Schwarze Meer zwüschet de Flüss Dnjestr und Don gherrscht, aber au Völcher a de Wolga kontrolliert, drunder au d Merier und d Mordwiner [1]. Er het d au d Heruler underworfe, wo uf de Krim am Asowsche Meer glebt hend und d Veneter und d Este, so ass siis Riich bis a d Ostsee ggangen isch [2]. D Forschig ninnt aber aa, as er mee de Handel vo dem grosse Piet kontrolliert het.

Wo d Hune ane 375 i sis Riich iigfalle sind, isch er scho alt gsii, nochem Jordanes 110i, und de hunnischi König Balamber het da gwaltigi Riich chöne schnell underwerfe. De Ermanarich het denn Selbstmord gmacht [3].

De Jordanes allerdings schriibt aber, as de Ermanarich d Sunilda, d Frau vom Först vo de Rosomone, viertle loo heb. Druf abe hend ere sini Brüdere, de Sarus und de Ammius em Ermanarich us Raach e schweeri Wunde gschlage und de Ermanarich sai ab dere Wunde lanf chrank glege und heb drum d Hune nöd chöne im Champf bisige und sai den gstorbe.

Heldesaag[ändere | Quälltäxt bearbeite]

De Ermanarich und im spezielle au d Gschicht vo de Rosomone het i de germanische Heldesaag Iigang gfunde.

de böös Ermenrich[ändere | Quälltäxt bearbeite]

De Ermenrîch werd i de tütsche Heldesaag as zimli schlecht dargstellt. Er isch de König vo Gâlaber (Kalabrie) und vo Püllen (Apulie) gsii und het uf Aaroote vo sim Rootgeber nöd nu d Harlunge, sini Neffe, sondern o si Soo Friderîch umbringe loo und sin andere Neff, de Dietrîch vo Berne vertribe.

Sarus & Ammius[ändere | Quälltäxt bearbeite]

I de Quedlingburger Annale, e Gmisch vo Gschichtsschriibig und Heldesaag wo um 1000 ume gschribe wore isch, werd gsait, as de Ermanricus öber all Gote regiert het und sii Soo Fridericus und sini Neffe Embrica und Fritla umbringe loo heb und as er sii Neff Theodoric us Verona vertribe heb. D Brüedere Hemida, Serila und Adaccaro hend sich am Ermanarich grächt, well er dene si Vater tötet heb, und hend drum em d Händ und Füess abgschnitte.

Noch de Edda isch de Jörmunrekr mit de Svanhildr verhüürotet gsii. De het si aber vo Ross vertrample loo, well sii untroi woren isch. Dere sini zwee Halbbrüedere, de Hamdhir und de Sörli, d Söö vom Jónakr hend sich grächt, indem si em Jörmunrekr d Händ und Füess abghaue hend.

Quelle[ändere | Quälltäxt bearbeite]

  1. Jordanes: Getica 117
  2. Jordanes: Getica 118-120
  3. Ammianus Marcellinus 31,3,1ff.