Donald Trump
Dr Donald John Trump ([ˈdɒnəld d͡ʒɒn trʌmp]; * 14. Juni 1946 z Queens, New York City) isch e US-amerikanische Unternämer un vom 20. Jänner 2017 bis am 20. Jänner 2021 dr 45. Bresidänt vu dr Verainigte Staate gsii.
Vu 1971 bis 2017 isch er Chief Executive Officer (CEO) vu dr Trump Organization gsii, eme Mischkonzärn. As Tycoon in dr Immobilien- un Unterhaltigsbranche isch dr Milliardär dur sy extrovertiert Verhalten ufgfalle, sy Name isch e dyyri Marke. Är isch in Färnseesändige wie The Apprentice ufdrätte, was en no populärer gmacht het, un hite ghert er zue dr bekannteschte Gschäftslyt in dr Verainigte Staate.
Am 8. Novämber 2016 het er d Bresidäntschaftswahl gege di demokratisch Gegekandidati Hillary Clinton gwunne.[1] Am 3. Novämber 2020 het er di aagsträbt Widerwahl gege de demokratisch Useforderer Joe Biden verlore.
Familie un Uusbildig
[ändere | Quälltäxt bearbeite]Dr Donald Trump isch s viert vu fimf Chinder vum Immobilienunternämer Frederick Trump Jr. (1905–1999) un syre Frau Mary Anne MacLeod (1912–2000). Si het vu Tong uf dr schottische Isle of Lewis gstammt.[2] Uf dr Vatersyte sin syni Großeltere Friedrich Trump un Elisabeth Christ vu Kallstadt in dr Pfalz (dodmol Dail vum Chenigrych Bayern) yygwanderet.[3] In eme Interview het dr Trump aagee, är sei stolz uf „des dytsch Bluet“.[4] Anne 1987 het er sym autobiografische Buech The Art of the Deal dergege no gschribe, sy Großvater diei vu Schwede stamme, ne Fiktion vu sym Vater us dr Zyt vum Zweete Wältchrieg.[5]
Vu 1956 bis 1959 isch dr Trump Schueler an dr Kew-Forest School z New York gsii. 1959 het er no Chlage vu dr dertige Lehrer un em Gfiel vum Vater, är heb d Kontroll iber sy Suhn verlore,[6] uf d New York Military Academy z Cornwall-on-Hudson gwächslet, e Privatinternat im US-Bundesstaat New York mit ere vormiliterische Uusbildig.[7] Dert het dr Trump großi sportligi Laischtige zaigt un het 1964 dr Highschool-Abschluss gmacht. Derno het er Wirtschaftswisseschaft studiert, vu 1964 bis 1966 an dr Fordham University z New York un vu 1966 bis 1968 an dr Wharton School z Philadelphia. In syre Studiezyt isch dr Trump nit ufgfalle, nit persenli un nit bolitisch, an dr allgegewärtige Demonschtratione gege dr Vietnamchrieg het er nit dailgnuu. Näb em Studium het er aagfange, mit eme Startkapital vum Vater vu 200.000 $ billigi marodi Hyyser ufzchaufe, z saniere un dyyr wyterzverchaufe.[8] Sy Studium het er 1968 mit em Bachelor abgschlosse. Derno isch er dur e Attescht vum Dokter nit zum Wehrdienscht mit eme meglige Yysatz im Vietnamchrieg yygruefe wore.[9] Noch em Trump syne aigene Aagobe heb si um Chnochesporn an aire oder boode Färse ghandlet, wu si speter wider zruggbildet hebe.
Anne 1977 het er s tschechisch Model Ivana Marie Zelníčková ghyrote. Us dr Eh sin d Sihn Donald Jr., gnännt Don, (* 1977) un Eric (* 1984) un d Dochter Ivanka (* 1981) firigange. 1990 isch d Eh gschide wore.[10] Vu 1993 bis 1999 isch er mit dr amerikanische Schauspileri Marla Maples ghyrote gsii, mit ihre het d Dochter Tiffany (* 1993). 2005 het er s slowenisch Model Melania Knauss ghyrote. Ihre gmainsam Suhn Barron William isch 2006 uf d Wält chuu. Syni beede erschte Sihn Don und Eric un sy Dochter Ivanka schaffe hite in wichtige Positione im Familienunternäme The Trump Organization. D Ivanka Trump schafft derzue au no as Model. Dr Trump isch achtfache Großvater.[11]
Dr Trump ghert dr presbyterianische Marble Collegiate Church aa, wu Dail vu dr Reformed Church in America isch.[12] No aigene Aagobe verzichtet er vollständig uf dr Konsum vu Zigarette un Alkohol. Dr Dod vu sym eltere Brueder Fred, wu 1981 an dr Folge vu dr Alkoholchranket storben isch, heb en in däre Haltig gsterkt.[13] Em Trump sy Schweschter Maryanne Trump-Barry isch Bundesrichteri am United States Court of Appeals.[14]
Unternämerkarriere
[ändere | Quälltäxt bearbeite]
Em Trump sy Vater isch mit em Böu vu Mietskasärne in dr New Yorker Stadtdail Brooklyn, Queens un Staten Island zum Multimillionär wore.[15] Dr Donald Trump het im Unternäme vum Vater gschafft un het s 1974 ibernuu. Är het syni Gschäft derno uf Manhattan konzentriert, wun em d Stadt wäg dr schlächte Wirtschaftslag großi Styyrnooläss aabote het. Är het zum Byschpel fir d Ibernahm vun eme Hotel (hite: Grand Hyatt New York) vu dr fascht bankrotte Stadtverwaltig e Styyrnooloss iber 40 Johr iberchuu. Au speter het er si als furt ähnligi Styyrvordail verschafft.[16] No dr Finanzkrise het dr Trump syt 2011 au in Aktien inveschtiert.[17] S Unternämen isch hit in dr Trump Organization zämegfasst. Sy Name dient au as Marke fir Chlaider, Parfym, Gsellschaftsspil un anders.[18] Syt 1999 het er mit em Trump Model Management e Modelagentur.
Dr Trump het Böu- un Hotelleryprojäkt in Stedt vu dr USA un in andere Länder realisiert bzw. derfiir sy Name gee. Ellai z New York City het er näb em Hauptsitz vu sym Unternäme, em Trump Tower, dr Trump World Tower böue un s Trump Building umböue loo. E Trump International Hotel and Tower git s z Chicago, z Las Vegas, z New York, z Honolulu, z Toronto un z Vancouver. Näb em zum Hotel umgnutzte Old Post Office Pavilion z Washington, D.C. un eme Projäkt z Rio de Janeiro het s Unternäme vum Trump bis 2016 d Zahl vu dr Hotell uf zwelf uusböue.[19] Blän fir Las Vegas, Dubai,[20] Philadelphia,[21] Berlin, Frankfurt am Main un Stuegert[22] sin ufgschobe oder abbroche wore.
Näbe dr Yyname us dr Immobilie het er Spiilbanke un anderi Freizytgschäft, in dr Hauptsach z Atlantic City (New Jersey), wu in dr Holdinggsellschaft Trump Entertainment Resorts verwaltet wäre. Ab em Änd vu dr 1980er Johr isch s Unternämme allmee in Schwirigkaite grote.[23] Viermol isch wäge Zahligsuufähigkait vu syne Casino Glaibigerschutz no Kapitel 11 US-Handelsgsetz brucht wore (1991, 1992, 2004 un 2009).[24] Dr Trump het dodruf unter anderem d Helfti vum Casino Taj Mahal un vum Plaza-Hotel mieße verchaufe, derzue 1991 sy Jacht Trump Princess un 1992 d Fluggsellschaftt [Trump Shuttle.[25] Anne 2009 het er si us em Casinogschäft vollständig zruggzoge, duet aber do allno Lizänze vu sym zugchreftige Name verchaufe.
1984/85 het em s American-Football-Team New Jersey in dr 1982 vum Trump mitgrindete United States Football League ghert, des Team git s hite nimi. 1988 het er as Beroter fir dr Mike Tyson dr Boxkampf geg dr Michael Spinks organisiert[26] 1989/90 het er versuecht, mit dr Tour de Trump e Etapperännen in dr Verainigte Staate z etabliere. Dr Trump het 18 Golfbletz, unter anderem z Puerto Rico, z Dubai, z Irland un z Schottland.[27] Uf em Trump National Golf Club z Kalifornie het 2015 dr PGA Grand Slam of Golf solle stattfinde, wäge rassischtische Uusage vum Trump isch s Turnier aber zum erschte Mol syt 30 Johr uusgsetzt wore.[28]
Mediekarriere
[ändere | Quälltäxt bearbeite]Dr Trump het 16 Biecher unter sym Name vereffetligt, wu as Rotgeberschurnalismus vu Verhandligs- un Gschäftspraxis handle.[29] Sy Buech The Art of the Deal vu 1987 isch 51 Wuchen in dr Bestsellerlischt vu dr New York Times gstande un isch bis zue aire Million mol verchauft wore.[30]
Dr Trump het in e Hufe Film Cameo-Ufdritt ghaa, unter anderem in Mein Geist will immer nur das Eine … (1991), Kevin – Allein in New York (1992), Hart aber herzlich – Geheimnisse des Herzen (1995), Wer ist Mr. Cutty? (1996), Studio 54 (1998), Zoolander (2001), Ein Chef zum Verlieben (2002), Kindsköpfe 2 (2013), derzue au in dr un Färnsehserie Der Prinz von Bel-Air, Die Nanny un Sex and the City.
Vu Novämber 2003 bis April 2004 isch in dr USA di erscht Stapfle vu dr Färnsehsändig The Apprentice („Dr Lehrling“) glofe, wu dr Trump e Mitarbaiter fir sy Firma gsuecht het. Dr Siger het en Ai-Johres-Verdrag mit eme Ghalt vu 250.000 US-Dollar iberchuu. D Sändig isch vu 26 Millione Zueschauer aagliuegt wore un isch fir dr Sänder NBC zum Quotenerfolg wore. Fir dr Trump het si ne große Popularitetsgwinn brocht. Bis 2015 sin insgsamt 14 Stapfle uusgstrahlt wore.
Ab Juni 2004 het er in Radiosändig Trumped e baar Johr all Dag Jahre s Gschääne vum Dag kommentiert.
Im Jänner 2007 het er e Stärn uf em Hollywood Walk of Fame iberchuu.[31]
Em Trump ghert d Miss Universe Organization zäme mit em Medienunternäme NBCUniversal,[32] wu all Johr d Miss-Universe-, Miss-USA- un Miss-Teen-USA-Wettbewärb veraastaltet.[33]
Im Merz 2007 isch dr Trump im Raame vun ere sognännte Battle of the billionaires-Storyline regelmäßig bim World Wrestling Entertainment RAW ufdrätte. Hegschtpunkt vu däne Veraastaltige isch e „Fehde“ gege dr WWE-Bsitzer Vince McMahon gsii, wu Wrestler fir si gegen enander aadrätte sin. Au im Juni 2009 isch er in e Wrestling-Storyline vorchuu. Anne 2013 isch er in d WWE Hall of Fame ugfgnuu wore.[34]
Bolitik
[ändere | Quälltäxt bearbeite]
Dr Trump het syt dr 1980er-Johr als furt sy Mainig zue bolitische Theme in dr Effetligkait verchindet. Anne 1987 het er si as Aahänger vu dr Republikaner regischtriere loo, isch 1999 zue dr Independence Party, eme Ableger vu dr Reform Party, gwächslet, 2001 zue dr Demokrate un 2009 wider zue dr Republikaner. Syni Barteispände het er bis 2012 fascht glych an di boode große Barteie verdailt.[24] Derzu het er dr Clinton Foundation 100.000 US-Dollar gspändet un het langi Zyt gueti Beziehige zue dr Hillary Clinton bflägt.[35]
Är het scho vor 2015 e baar Mol effetli mit em Gedanke gspiilt, as US-Bresidänt z kandiere, nämli 1988, 2000, 2004 un 2012.[36]
Im April 2011 het er dr Bresidänt Obama ufgforderet, sy Geburtsurkund z vereffetlige, un het si dodermit an d Spitz vu dr verschwerigstheoretische Birther-Bewegig gsetzt, wu d Legitimitet vum Obama as Bresidänt aazwyyflet.[37] Im Septämber 2016 het er si vu däre Theory dischtanziert.[38]
Im Novämber 2012 het dr Trump uf Twitter gschribe, „s Konzäpt vu dr globalen Ufwermig sei vu un fir d Chinese gschaffe wore, go dr US-amerikanische Produktion d Konkurränzfähigkait z nee.“[39] Ändi Septämber 2015 het dr Trump gsait, är diei nit an di anthropogen global Ufwermig glaube un dr Klimawandel diei er fir e natyrli Phänomen halte.[40]
Em Trump sy bolitischi Positione sin friejer dytli wyter links gläge wie dr republikanisch Mainstream. Är het si zum Byschpel fir e allgmaini Chrankeversicherig uusgsproche, derfir ass d Styyre hecher wäre un fir s Rächt uf Abdryybig,[41][42] 2004 isch er gege dr Irakchrieg gsii[43] un dr Demokrat Bill Clinton het er en erfolgryche, dr Republikaner George W. Bush dergege dr schlächscht vu allne US-Bresidänte gnännt.[44]
Bresidäntschaftskandidatur 2015/2016
[ändere | Quälltäxt bearbeite]Am 16. Juni 2015 het dr Trump verchindet, ass er bi dr Vorwahle vu dr Republikaner fir d Bresidäntewahl am 8. Novämber 2016 wett kandidiere.[45] Är het versproche, är wett s mit dr wältwyte Wirtschaftsgroßmächt ufnee, d Zuewanderig yygränze un as erfolgryche Gschäftsmann usserhalb vu dr Washingtoner Machtzirkel agiere.[46] Sy Wahlkampfslogan isch „Make America great again“ („Mach Amerika wider großartig“) gsii, e Slogan, wu scho dr Ronald Reagan anne 1980 bruucht ghaa het.
Im Wahlkampf het er mit rächtspopulistische un umstrittene Paroole d Ufmerksamkait vu dr ganze Wält uf si zooge. Unter anderem het er iber d Hispanics, d Yywanderer vu Latynamerika, gsait, si brächte Drogen un Kriminalitet in s Land, „si sin Vergwaltiger, un Dail, nimmi i aa, sin au nätti Lyt“.[47] No Kritik vum US-Senator John McCain an ihm[48] het dr Trump ihm abgsproche ne Held z syy, wel er si im Vietnamchrieg heb gfange nee un foltere loo.[49] D Fox-News Moderatori Megyn Kelly het er wäge ihre herte Froge kritisiert, är heb „s Bluet us ihre Auge un vu sunscht naime driefe sää“, was as sexistische Hiiwys uf Uukontrollierthait wäge dr Menstruation ufgfasst woren isch.[50] Mitte Augschte 2015 het dr Trump in eme Positiionsbabyr gforderte, ass alli 11 Millione illegal Yygwanderete sollen uusgwise un d Gränze zue Mexiko dur e Muure, wu d Mexikaner solle zahle, gsicheret wäre.[51] Am 8. Dezämber 2015 het dr Trump international fir Ufsää gdsorgt, wun er noch em Terroraaschlag z San Bernardino gsait het, ass „e große Dail vu dr muslimische Bevelkerig“ e Hass uf d Amerikaner hebe, wäge däm het er e temporär Yyraisverbot fir alli Muslim gforderet.[52] Des Yyraisverbot soll nit nume fir Flichtling, Tourischte un Studänte gälte, nai, au fir Burger vu dr USA, wänn si im Uusland gsii sin un wider yyraise wän.[53]
Dr Trump het dr russisch Bresidänt Putin fir syni Fähigkaite as Staatsschef.[54][55] E guet Verhältnis zwische ihm un em Putin sei au guet fir d USA.[56]
In ere Färnsehdebatte am 6. Februar 2016 het er gsait, är wett im Kampf gege dr Terrorismus d Foltermethod Waterboarding wider yyfiere un no vyl Schlimmers („a hell of a lot worse“).[57]
Derwylscht er si anne 2000 no fir sterkeri Kontrolle bim Waffebsitz gsii isch,[58] het er si im Wahlkampf 2015 fir s Rächt uf Waffebsitz uusgsproche un gege jedi Gsetzverscherfig.[59][60] No dr Pariser Terroraaschleg vum Novämber 2015 het er fir Ufsää gsorgt, wun er dr stränge Waffegsetz z Frankrych e Mitschuld an dr hoche Opferzahl gee het. „Hätte d Mänsche Waffe drait, wär s andersch glofe“, het er bim e Wahlkampfufdritt z Texas gsait.[61]
Mit syre aggressive Rhetorik het dr Trump fir massivi Kritik im Establishment vu dr aigene Bartei gsorgt. Gege d Skepsis vu dr maischte bolitische Bschauer het er s barteiintärn Bewärberfäld ab Ändi Juli 2015 in Umfroge konschtant aagfiert un zwische Februar un Juni 2016 het er si in dr Mehzahl vu dr Bundesstaate duregsetzt. Am 19. Juli 2016 isch dr Trump uf em Nominierigsbarteidag offiziäll zum Bresidäntschaftskandidat vu dr Republikaner gwehlt wore.
E baar Zytige hän mit ihre Tradition broche un hän si im Wahlkampf gege dr Trump uusgsproche, zum Byschpel d New York Times[62], d USA Today[63] un d Washington Post.[64] Am 8. Oktober 2016 het d Washington Post e Video vu anne 2005 publiziert, wu dr Trump obszön iber Fraue gschwätzt het. Des Video het heftigi Protescht uusglest.
Am 8. Novämber 2016 het si dr Trump gege di maischte Umfroge un Wahlprognose gege d Clinton chenne duresetze. Im sognännte „Rust Belt“ im Mittlere Weschte het er in traditionäll demokratische Staate wie Michigan, Wisconsin un Pennsylvania d Meehait gwunne. Derzue het er d Abstimmige in dr klassische Swing States wie Florida, Ohio un Iowa gwunne. Am Oobe vu dr Wahl het er in syre Red zum Siig z New York gsait, är wett „dr Bresidänt vu allne Amerikaner“ syy.[65] Wie in dr Verfassig vorgsää isch dr Trump am 20. Jänner 2017 veraidigt wore.
Presidäntschaft
[ändere | Quälltäxt bearbeite]I syneren Amtszyt als amerikanische Presidänt het dr Donald Trump i der Regierig und Verwaltig vo den USA zimli vill zunderobsi broocht. Mit anderne Länder het er brobiert e deal uuszhandle wo wien er glaubt het besser wäär für Amerika, die grosse internazionalen Organisazioone schyynen en nit z inträssiere. Am Brexit z Ängland het er Fröid. Zwöimol isch er id Schwiiz choo, uf s WEF z Davos.
Wun er ins Amt yygfiert woren isch, isch er dr eltscht US-amerikanisch Bresidänt in dr Gschicht gsii un dr erscht, wu nie vorhär e bolitisch oder militeerisch Amt ghaa het. Sy uugwehnlige Regierigsstil, vor allem syni aggressiv Kommunikation iber Twitter, het zue vyl nationale un internationale Kontroverse bydrait. In syre Amtszyt het er Dekret zue dr Bschränkig vu dr Yywanderig – vor allem us muslimische Länder - unterschribe, het d Gränzmuure zue Mexiko uusböue, het sy Land us em Pariser Klimaabchuu un em Atomabchuu mit em Iran zruggzoge, het Jerusalem as Hauptstadt vu Israel anerkännt, het persenligi Bezieige zum Kim Jong-un, em Diktator vu Nordkorea ufgnuu un s Fridesabchuu zwische Israel un dr Verainigte Arabische Emirat unterstitzt. In dr Wirtschaftsbolitik het er d Styyre fir Unternäme massiv gsänkt un het e Handelschrieg aagfange, wu vor allem gege China grichtet gsii isch. Bis zue dr Covid-19-Krise hän d USA unter syre Bresidäntschaft trotz ere Rekord-Staatsverschuldig e gueti wirtschaftligi Entwicklig gnuu.
Wu Mitti Augschte 2017 e junge Neonazi noch eme Ufmarsch vu Rächtsextreme z Charlotteville sy Auto in e Gruppe vu Gegedemonschtrante glänkt het un doderby e 32-Jehrigi umbrocht un 19 Mänsche verletzt het, het dr Trump verchindet, bodi Syre seie fir d Eskalation verantwortli un s gääb uf boode Syte gueti Lyt.
D Republikaner hän, vor allem wel s dr republikanisch Meehaitsfierer im Senat Mitch McConnell firschidribe het, in dr Amtszyt vum Trumps iber 250 Richter*ne an Bundesgricht gruefe.[66]
Am 5. Februar 2020 isch er in eme Amtsenthebigsverfahre vu dr republikanische Meehait im Senat freigsproche wore, wu vu dr Demokate yyglaitet woren isch, wel er in eme Telefonat mit ukrainische Bresidänt Wolodymyr Zelensky vu däm soll gforderet haa, ass d Ukraine Matrial gege dr Schwigersuhn vum Joe Biden sammlet, wu si as demokratische Bresidäntschaftskandidat abzaichnet het.[67]
Mit dr COVID-19-Pandemy sin d USA in aini vu dr schwärschte Gsundhaitskrise vu ire Gschicht grote, mit iber 300.000 Dode bis Ändi 2020 un massive wirtschaftlige Schäde. Em Trump sy Krisemanagement isch arg kritisiert wore. Är het d USA derno us dr Wältgsundhaitsorganisation (WHO) zruggzoge.
Im vu dr Pandemy bregte Bresidäntschaftswahlkampf 2020 isch dr ehmolig demokratisch Vizebresidänt Joe Biden gege dr Trump aadrätte. Bi dr Wahl am 3. Novämber 2020 het dr Trump dytli gege dr Biden verlore, het aber s Wahlergebnis nit anerkännt, stattdäm het er iberall verzellt, dr Wahlsiig sei em gstoole wore un des sei dr grescht Bedrug in dr Gschicht. Är het iber sächzg juristischi Yysprich gege s Ergebnis yygee, wu aber fascht alli abgwise wore sin un dr Ibergang im Bresidäntenamt verzegeret hän. Am 6. Jänner 2021, wu dr Kongräss zämechuu isch go s Ergebnis offiziäll verchinde, het dr Trump syni Aahänger in ere Reed zum Marsch zum Kapitol ufgruefe. Ass syni Aahänger derno s Kapitol gstirmt hän, isch as Versuech vun eme Butsch aagluegt wore un het zue heftige Reaktion gege ihn gfiert, au in syre Bartei. Di maischte vu syne Social-Media-Konte, unter anderem uf Twitter, sin gsperrt wore un e zwait Amtsenthebigsverfahre gege ihn isch yyglaitet wore, wu aber vum Senat abgwise woren isch. Bi dr Amtsyyfierig vum Biden isch er nit derby gsii, s erscht Mol in dr Gschicht vu dr USA syter anne 1869.
Au no syre Bresidäntschaft het er allno ne große Yyfluss in dr Republikanische Bartei, mer goht dervu uus, ass er bi dr Bresidäntschaftswahle 2024 wider kandidiert.
Schrifte
[ändere | Quälltäxt bearbeite]- The Art of the Deal Warner Books, 1987, mit em Tony Schwartz as Ghostwriter, ISBN 978-0-345-47917-4
- Surviving at the Top, 1990, ISBN 978-0-394-57597-1
- The Art of Survival, 1991, ISBN 978-0-446-36209-2
- The Art of the Comeback, 1997, mit dr Kate Bohner, ISBN 978-0-8129-2964-5
- The America We Deserve, 2000, mit em Dave Shiflett, ISBN 1-58063-131-2
- How to Get Rich, 2004, ISBN 978-0-345-48103-0
- The Way to the Top: The Best Business Advice I Ever Received, 2004, ISBN 978-1-4000-5016-1
- Think Like a Billionaire: Everything You Need to Know About Success, Real Estate, and Life, 2004, ISBN 978-0-345-48140-5
- The Best Golf Advice I Ever Received, 2005, ISBN 978-0-307-20999-3
- Why We Want You to be Rich: Two Men – One Message 2006, mit em Robert Kiyosaki, ISBN 978-1-933914-02-2
- Think Big and Kick Ass in Business and Life, 2007, mit em Bill Zanker, ISBN 978-0-06-154783-6
- The Best Real Estate Advice I Ever Received: 100 Top Experts Share Their Strategies, 2007, ISBN 978-1-4016-0255-0
- Trump 101: The Way to Success, 2007, ISBN 978-0-470-04710-1
- Never Give Up: How I Turned My Biggest Challenges into Success, 2008, ISBN 978-0-470-19084-5
- Think Like a Champion: An Informal Education in Business and Life, 2009, ISBN 978-0-7624-3856-3
- Midas Touch: Why Some Entrepreneurs Get Rich – and Why Most Don't, 2011, mit em Robert T. Kiyosaki, ISBN 978-1-61268-095-8
- Time to Get Tough: Making America No. 1 Again, 2011, ISBN 978-1-59698-773-9
- Crippled America: How to Make America Great Again, 2015, ISBN 978-1-5011-3796-9
- Great Again: How to Fix Our Crippled America, Threshold Editions, New York 2015, ISBN 978-1-5011-3796-9.
Litratuur
[ändere | Quälltäxt bearbeite]- Wayne Barrett: Trump: The Deals and the Downfall. HarperCollins, New York 1992, ISBN 0-06-016704-1.
- Gwenda Blair: Donald Trump: Master Apprentice. Simon & Schuster, New York 2005, ISBN 0-7432-7510-1
- Michael D’Antonio: The Truth About Trump. St. Martin's Griffin, New York 2016, ISBN 978-1-250-10528-8.
- Jerome Tuccille: Trump – Die Innenseite einer amerikanischen Karriere. Wilhelm Heyne, München 1992.
Weblink
[ändere | Quälltäxt bearbeite]
Commons: Donald Trump – Sammlig vo Multimediadateie- Donald J. Trump. Biography. In: Trump.com (Website vom Trump sinere Undernäämensgrubbe, änglisch).
- Wahlkampfsite zur US-Bresidäntschaftswaal 2016
- Profil bi Askmen.com (änglisch).
- Profil bi Who2.com (änglisch).
Fuessnoote
[ändere | Quälltäxt bearbeite]- ↑ Donald Trump gewinnt die US-Wahl 2016, Spiegel Online.
- ↑ Auslan Cramb: Donald Trump Flies to Western Isles to Visit Mother’s Home. In: The Daily Telegraph. 9. Juni 2008 (englisch).
- ↑ Gwenda Blair: Donald Trump: Master Apprentice. Simon & Schuster, New York 2005, ISBN 0-7432-7510-1, S. 5 f. (Memento vom 30. Novämber 2016 im Internet Archive); Roland Paul: Der Amerika-Auswanderer Friedrich Trump aus Kallstadt und das Scheitern seiner Rückwanderung. In: Pfälzer Heimat. Band 67, 2016, S. 15–21.
- ↑ Hannelore Crolly: Donald Trump, King of Kallstadt. In: Die Welt. 24. Augschte 2015.
- ↑ Donald J. Trump, Tony Schwartz: Trump. The Art of the Deal. Ballantine, New York 1987, S. 66.; doderzue Andrew Kaczynski: Trump Mocks Warren’s Native American Heritage Claim, But Falsely Claimed His Family Was Swedish. In: BuzzFeed. 17. Augschte 2015.
- ↑ Michael D'Antonio: „Sei ein Killer“, Weltwoche 22/2016.
- ↑ Heike Buchter, Kerstin Kohlenberg, Thorsten Schröder, Eva Schweitzer: Das größte Ego Amerikas. In: Die Zeit. 19. Mai 2016, abgruefen am 19. Juni 2016.
- ↑ Matt Viser: Even in College, Donald Trump Was Brash. In: The Boston Globe. 28. Augschte 2015.
- ↑ Steve Eder, Dave Philipps: Donald Trump’s Draft Deferments: Four for College, One for Bad Feet. New York Times, 1. Augschte 2016.
- ↑ Barron, James. Trumps Get Divorce; Next, Who Gets What? , 12. Dezember 1990.
- ↑ About Donald J. Trump, donaldjtrump.com
- ↑ Eugene Scott: Church Says Donald Trump Is Not an ‘Active Member’. In: CNN. 28. Augschte 2015 (englisch).
- ↑ Jason Horowitz: For Donald Trump, Lessons From a Brother’s Suffering. In: The New York Times. 2. Jänner 2016.
- ↑ Jason Horowitz: Familiar Talk on Women, From an Unfamiliar Trump. In: New York Times. 18. Augschte 2015.
- ↑ Tracie Rozhon: Fred C. Trump, Postwar Master Builder of Housing for Middle Class, Dies at 93. In: The New York Times. 26. Juni 1999.
- ↑ Jillian Kay Melchior: Donald Trump Has Mastered the Art of the Tax Break. In: National Review. 19. Augschte 2015.
- ↑ Jeff Cox: Trump Changes Gears, Now Buying Bluechip Stocks. In: CNBC. 11. Augschte 2011; Eamon Javers: Looks Like Trump Can Pick Some Stocks. In: CNBC. 16. Juli 2015
- ↑ Alex Frangos: Trump on Trump: Testimony Offers Glimpse of How He Values His Empire. In: The Wall Street Journal. 18. Mai 2009.
- ↑ Eugene L. Meyer: A Trump Makeover for Washington’s Old Post Office. In: The New York Times. 27. Mai 2014.
- ↑ Claire Ferris-Lay: Trump Stays Mute on Dubai Tower Cancellation. In: ArabianBusiness.com. 3. Februar 2011.
- ↑ Jacob Adelman: New Owners See Ill-fated Trump Tower Phila. Plan as Template to Develop Site. Archivlink (Memento vom 20. Oktober 2015 im Internet Archive) In: Philly.com. 16. Mai 2015.
- ↑ Donald Trump bekennt sich zu seinem Tower in Stuttgart. In: Die Welt. 23. Juli 2002.
- ↑ Janice Castro: Trump Trips Up. In: Time. 6. Mai 1991.
- ↑ 24,0 24,1 Debra J. Saunders: Donald Trump and the GOP Primary of Horrors. In: SFGate.com. 11. Juli 2015.
- ↑ Chris Isidore: Everything You Want to Know About Donald Trump’s Bankruptcies. In: CNN. 31. Augschte 2015.
- ↑ Dave Anderson: Sports of The Times; Trump: Promoter Or Adviser? In: The New York Times. 12. Juli 1988.
- ↑ Brentley Romine: PGA Tour: Donald Trump Announces he Will Run for President in 2016. In: Golfweek.com. 16. Juni 2015.
- ↑ PGA cancels Grand Slam of Golf at Trump National in Los Angeles. In: ESPN. 3. September 2015, abgruefen am 21. März 2016 (änglisch).
- ↑ About Donald J. Trump. In: DonaldJTrump.com.
- ↑ Linda Qiu: Is Donald Trump’s ‘Art of the Deal’ the Best-Selling Business Book of All Time? In: Politifact.com. 6. Juli 2015.
- ↑ Nele Husmann: Donald Trump ist jetzt offiziell ein Star. In: Die Welt. 21. Jänner 2007.
- ↑ Tom Kludt, Brian Stelter: Trump: NBC, Univision Abandoned ‘51 Wonderful Girls’. In: CNN. 30. Juni 2015.
- ↑ Corporate Info Archivlink (Memento vom 7. Novämber 2016 im Internet Archive) bei MissUniverse.com.
- ↑ Donald Trump Announced for WWE Hall of Fame. In: WWE.com. 25. Februar 2013.
- ↑ Nick Gass: Donald Trump Has Spent Years Courting Hillary and Other Dems. In: Politico. 16. Juni 2015.
- ↑ Allen Cooper: Donald Trump and White House Bids. A Long History of Not Running. In: USA Today. 15. Juni 2015
- ↑ Glenn Kessler: A Look at Trump’s ‘Birther’ Statements. In: The Washington Post. 28. April 2011.
- ↑ nytimes.com 16. September 2016: Donald Trump Clung to ‘Birther’ Lie for Years, and Still Isn’t Apologetic
- ↑ Twitter: Donald J. Trump @realDonaldTrump.
- ↑ Klimawandel: Trump kritisiert Papst Franziskus. In: Frankfurter Rundschau. 25. September 2015.
- ↑ Nate Cohn: The Trump Campaign’s Turning Point. In: The New York Times. 18. Juli 2015
- ↑ Dan Balz: Trump’s Attack on McCain Marks a Turning Point For Him — And the GOP. In: The Washington Post. 19. Juli 2015.
- ↑ Steve Eder: In Fact | Donald Trump Opposed Iraq War — but After It Started. In: The New York Times. 16. Septämber 2015.
- ↑ Carl Cannon: Why Donald Trump Didn't Run as a Democrat. In: RealClearPolitics. 21. Juli 2015.
- ↑ Reid J. Epstein, Heather Haddon: Donald Trump Enters 2016 Presidential Race. Reality-TV Personality and Real-estate Developer is 12th Candidate to Join Republican Race. In: The Wall Street Journal. 16. Juni 2015.
- ↑ Annie Karni, Adam B. Lerner: Trump says he's running for president, really. In: Politico. 16. Juni 2015.
- ↑ Marc Pitzke: Wahlkampf der Dumpfbacken. In: Spiegel Online. 9. Juli 2015.
- ↑ Ryan Lizza: John McCain Has a Few Things to Say About Donald Trump. In: The New Yorker. 16. Juli 2015
- ↑ Stephen F. Hayes: Trump GOP Candidacy Blows Up. In: The Weekly Standard. 19. Juli 2015 (englisch).
- ↑ Andreas Ross: Gegen die Schwerkraft. In: Frankfurter Allgemeine Zeitung. 9. August 2015.
- ↑ Immigration Reform That Will Make America Great Again. Archivlink (Memento vom 29. Septämber 2015 im Internet Archive) In: DonaldJTrump.com.
- ↑ Ansgar Graw: Trump „klingt mehr wie der Führer eines Lynchmobs“. In: Welt.de. 8. Dezämber 2015.
- ↑ Trump doubles down on vow to bar Muslims In: Fox News Channel 8. Dezämber 2016.
- ↑ Jeremy Diamond: Donald Trump lavishes praise on 'leader' Putin. In: CNN 5. März 2016.
- ↑ n-tv Nachrichtenfernsehen: Republikaner schämen sich für Trump. In: n-tv. 19. Dezember 2015, abgruefen am 6. Mai 2016.
- ↑ Trump akzeptiert Putins Komplimente – „im Namen unseres Landes“. In: Spiegel Online. 20. Dezember 2015, abgruefen am 6. Mai 2016.
- ↑ Donald Trump: I’d Bring Back ‘A Hell of a Lot Worse than Waterboarding’. In: The Guardian. 7. Februar 2016.
- ↑ Donald Trump on Gun Control. 2000 Reform Primary Challenger for President. In: OnTheIssues.org..
- ↑ Protecting Our Second Amendment Rights Will Make America Great Again. Archivlink (Memento vom 7. Jänner 2016 im Internet Archive) In: DonaldJTrump.com.
- ↑ Charlotte Alter: Donald Trump Says Gun-Free Zones Are ‘Target Practice for Sickos’. In: Time. 28. Oktober 2015.
- ↑ „Hätten die Menschen Waffen getragen, wäre es anders verlaufen“ In: Frankfurter Allgemeine Zeitung 15. Novämber 2015.
- ↑ nytimes.com 24. Septämber 2016: Hillary Clinton for President
- ↑ usatoday.com / The Editorial Board 30. September 2016: USA TODAY's Editorial Board: Trump is 'unfit for the presidency'
- ↑ Editorial Board: “The clear and present danger of Donald Trump”. In: The Washington Post, 30. Septämber 2016.
- ↑ Staatsmännisch und versöhnlich - Trumps Rede, Tagesschau, 9. Novämber 2016
- ↑ Der Mann hinter Donald Trump. In: Der Spiegel. Abgruefen am 1. November 2020.
- ↑ Roland Nelles, Marc Pitzke: Freispruch für Trump. Sechs Lehren aus dem Impeachment-Debakel. In: Spiegel, 6. Februar 2020.
|
Dä Artikel basiert uff ere fräie Übersetzig vu dere Version vum Artikel „Donald_Trump“ vu de dütsche Wikipedia. E Liste vu de Autore un Versione isch do z finde. |