Britische Inseln

Us der alemannische Wikipedia, der freie Dialäkt-Enzyklopedy
Hops zue: Navigation, Suech
d Laag vo de Britische Insle

Di Britische Insle sind e Inselgruppe im Weste vo Europa. Si bistönd us de Insle Groossbritannie, Irland, Man, Anglesey, Wight, de Hebride, de Shetlandinsle, de Orkade und de Scilly-Insle. Politisch tailt sich hütt d Inselgruppe is Verainigte Königriich (UK) und i d Republik Irland. D Gruppe umfasst öppe 6000 Insle und hend e Flächi vo 315'134 km².

Umgee wered die Britische Insle vom Atlantik, de Nordsee und em Ärmelkanal. S Irische Meer degege litt zwöschet Irland und Grossbritannie.

Gschicht[ändere | Quälltäxt bearbeite]

Di Britische Insle sind bikannt wege de vile grossartige vorhistorische Megalithbaue, wie Stonehenge. D Noofolger vo de Megalithkultur sind d Kelte gsii, wo vo Gallie her iigwanderet sind. Si hend de südlich und de mittler Tail vo Grossbritannie und au grossi Tail vo Irland bisidlet und di alti vorindoeuropäischi Bivölkerig zruggdrängt. D Römer hend im 1. Johrhundert n.Chr. nume de südlichi und de mittleri Tail vo Grossbritannie is Römische Riich chöne iiglidere. Zum Schutz gege d Stämm z Schottland het de Chaiser Hadrian de 113 km langi Hadrianswall errichte loo, wo quer öber d Insle lauft. Im 5. Jh. sind germanischi Stämm, Sachse, Angle und Jüte iigfale und hend nodisno di keltischi Bivölkerig zruggdrängt. Doch ischnes nöd glunge Cornwall, Wales, Strathclyde, Schottland und Irland z erobere. En Intermezzo hend d Wikinger bildet, wo e zittlang öber e Tail vo de Britische Insle gherrscht hend, em Danelag (865-954). Ane 1169 isch Irland und 1282 Wales zu de englische Chrone cho und 1707 au Schottland, wo sit 1603 e Personalunion mit England bildet het. Erst 1949 isches Irland glunge, en unabhängigi Republik z were, nume Nordirland isch bi de englische Chrone blibe, wa bis hüt zu starche politische, zum Tail bluetige Spanige, gfüert het.