Yosef Chaim

Us der alemannische Wikipedia, der freie Dialäkt-Enzyklopedy
Dr Yosef Chaim

Dr Yosef Chaim (Ben Isch Chai) (* öbbe 1832 z Bagdad, Osmanischs Riich; † 30. August 1909 z Kafil) isch e sefardische Rabbiner und Kabbalist gsi.

Lääbe[ändere | Quälltäxt bearbeite]

Dr Yosef Chaim isch besser bekannt under em Naame Ben Isch Chai (hebräisch für Soon vom lääbige Maa), wil er under däm Naame e Buech gschriibe het, wo die wöchentlige Toraabschnitt erkläärt und noch ere kabbalistische Iifüerig halachischi, d. h. gsetzgääberischi Entschäidige diskutiert het. In däm Buech git er de kabbalistische Gsetz dr Vorrang vor de Gsetz us dr Gemara. Im Ganze het er 83 Büecher über Halacha, Kabbala, Agada, Drascha, Erkläärige zum Talmud und vil mee verfasst.

Noch em Dood vo sim Vater im Joor 1857 het er däm si Amt vom Chacham (hebräisch für Wiise Maa) übernoo, was im sefardische Juudedum öbbe em Rabbiner im aschkenasische Beriich entsproche het. 1909 het er e zwäiti Pilgerräis ins Häilige Land gmacht, zum s Grab vom Brofeet Ezechiel go bsueche, und uf em Wääg zrugg isch er gstorbe.

Dr Iifluss vom Yosef Chaim isch wit über Bagdad uusegange. Er het zum Bischbil Response für Gmäinde z Wien, in Palestina, z Kalkutta und im Iran verfasst. Bsundrigs in sefardische Gmäinde isch si Iifluss immer no lääbig.

Weblingg[ändere | Quälltäxt bearbeite]

Dä Artikel basiert uff ere fräie Übersetzig vum Artikel „Yosef_Chaim“ vu de dütsche Wikipedia. E Liste vu de Autore un Versione isch do z finde.