Wikipedia:Treffen der Wikipedianer/Sommertreffen 2009/Protokoll

Us der alemannische Wikipedia, der freie Dialäkt-Enzyklopedy
Hops zue: Navigation, Suech

vom 29.-30. Augste 2009, Hittni

Do gsii sind: de Holder, de al-Qamar, de Strommops, de Melancholie und för ai Stund de DidiWeidmann

Diskussione uf Hochtütsch[Quälltäxt bearbeite]

De Strommops möcht, as, wenn uf hochtütsch dischgeriert werd, druff hiigwese werd, as bi üüs de Tielekt bruucht were söll. Ai Möglichkait isch de Chleber vo de Muettersproch-Gsellschaft. De Holder chlärt ab, wie wiit mer de Chleber bi üüs verwende tööred.Derf verwändet wäre, lueg Datei:Bäpperli.jpg --Holder 08:13, 14. Sep. 2009 (MESZ)

Diskussione wo Tielekt-Wikipedene aagriiffet[Quälltäxt bearbeite]

De Holder empfellt, as mer die Diskussioone aalueget (z. B. die), aber nöd druf reagieret, bsunders, wenn si under jedem Niwo sind. Persöönlich taar natürli jede mitmischle, aber den nöd im Name vo üsere Wikipedia.

Wo stömmer hüt[Quälltäxt bearbeite]

De Holder het e huufe Statistike zaiget mit Zuegriffszaale. Si mached tütli, as meer glese werded und as Artikel wo grad hochbrisant sind, hüüfiger glese werdet (z.B. Waal vom Barack Obama, Tood vom Michael Jackson). S loont sich aso asig Artikel möglichst rasch und guet z schriibe bzw. z aktualisiere.

D Statistike zaiget au, ass de Artikel vo de Wuche no öppe e Monet lang hüüfiger glese werd, as sus. De Tagesartikel vo de tütsche WP het teilwys ou en einigermasse starke Iifluss druf, wie hüüffig en Artikel bi üüs glese wird (Charles Darwin und Schweizerdeutsch sind a söttige Tääg z.B. vill mee glese wore as sus); dä Iifluss isch aber nume für churzi Ziit, d. h. 1 Tag.

Langfrischtig am meischte Nutzeffekt bringet nochwyslich Artikl mit regionale, alemannische Themene und Artikl ze Geografii un Sproche/Dialäkt (lueg do).

E paar Artikel werdet bi üüs hüüfiger bzw. glliichvill moll aaglueget, as wie bi de tütsche WP:

Di durchschnittlichi Gröössi vo de Artikel bi üüs isch äänlich wie bi de tütsche WP!

Im Grosse und Ganze stömmer im Vergliich mit anderne Wikipedene recht guet doo, gegenöber anderne Tielekt-Wikipedene (tütschi, französischi, italienischi Tielekt) sind üsi Artikel düttli gröösser. Die Vergliich säged aber nünt öber d Güeti vom Inhalt uus.

Sproochrainhait[Quälltäxt bearbeite]

D Aafroog öbs e Statistik öber d Sproochrainhait bi üsere WP gitt, mue vernaint werde. Sii loot sich nöd loo messe. Mee hend e Vorlaag Feelerhafts Alemannisch, zur Zitt isch die i kam Artikel iigsetzt.

Aber me chöned e uugfööri Statistik öber d Aazaal Artikel för di verschidnig Tielekt aagee (vu feschte Autore, uuszellt: ca. 70% vo dr Artikel):

  • 53% Schwyzertütsch
  • 42% Südbadisch
  •   2% Elsaassisch
  •   1% Schwööbisch
  •   1% Allgairisch
  •   1% Vorarlbergisch & Liechtestainisch
  •   0,1% Südwalsertütsch

Wikinews[Quälltäxt bearbeite]

De Holder schloot e nois Projekt voor, wo aktuelli Noijigkaite öber de Tielekt veröffetlicht werdet. As Titel isch vorgschlage: Dialäkt-Neuigkeite. Do drii chömed z.B. Veraastaltige rund um de Tielekt, Radiosendige und witters mee. As Vorbild tient di Platttütschi (do) Wikipedia.

Schrecked üsri Regle Noilig ab[Quälltäxt bearbeite]

S isch beschlosse wore, as uf de Siite, e noije Artikel schriibe, d Föf-Satz-Regle driichunnt, aber deför weniger root useghobni Sätz.

Schlimmer as d Regle, wo ase streng bi üüs nöd sind, isch mengisch s Verhalte vo Admistratore, woo grad sofort löschet, statt mindistens di vorgschribne zwee Taag warte. Au isches nöd schlecht, wemmer mitem Erwittere vo Miniartikel, zwoo Wuche warted, bsunders wenns e bsundrige Tielekt isch, wie z.B. bim Artikel Lungere (wo onöd die zwee Taag gwartet wore sind bis zum LA).

D Warnmeldige vom Vandalismusfilter werd entschärft.

5000 Artikel: Pressiecho[Quälltäxt bearbeite]

S Pressiecho isch mit föf Zittige guet gsii, bsunders d Stuttgarter Zittig het e grosse Artikel broocht, denn no St. Galler Tagblatt, s Liechtestaaner Wucheblatt und s Heftli vo de Muettersproochgsellschaft. Anzig d Elsaasser hend nöd uf üsi Pressimittailige reagiert.

Problematischi Binutzer un Striteraie[Quälltäxt bearbeite]

Chleber för mee Liebi i de WP und uf de Welt öberhopt

Me hend au d Situatione vo de momentane “fraiwilig und unfraiwilig problematische” Benutzer un sustige Stritareie aaglueget (z. B. GegenRechts, Problem Taxiarchos vs. Umschattiger, Striit zwische Umschattiger und 80686, Strit um dr Artikel Elsässisch uf dr de:wp bzw. bi üs). Mer sind de Mainig, as Striiteraie nöd i üsi Wikipedia ghööret und die üüs nu schade tüend. Si füered au dodezue, ass hinder em Rugge gschwätzt werd und wege dem d Lüüt schlecht bzw. falsch informiert sind. Wenn gwüssi Persone sich nöd möged schmöcke, sölets da privaat uusträäge und nöd d Wikipedia dodeför missbruuche. Vor alem söled Persone wo nöd striite wönd i Rue gloo werde (z.B. Albärt).

Wie haltemer Zaale aktuell[Quälltäxt bearbeite]

E automatisierti Aktualisierig vo Iiwoonerzaale und dergliiche isch momentan nu schwer z realisiere; drum lömmers lo bliibe. Bi asige Aagoobe sött immer d Jooreszaal i Chlammere aaggee were, da gelt au för Politiker im Amt (z.B. Gmaindspräsidente).

Houptsyte[Quälltäxt bearbeite]

D Houptsyte werd nochem Vorbild vo de Bayrische WP (do) noi gmacht. Gratulatio a de boarische Wikipedia för di glungni noi Hauptseitn!

  • De Tegscht bliibt gliich, werd aber au uf Elsassisch, Schwööbisch und Badisch (em beste e Nideralemannisch) öbersetzt, so asmer vier Houptsyte hend. Da sind die Tielekt, wo au uf uüsem runde Chärtli gnennt werded. Öb mer spööter vellicht no en andere Tielekt (z.B. Südwalsertiitschu) birücksichtige wönd, bliibt offe. Uf e kann Fall wömmer kai Fraktionebildig haa.
  • Au d Kategoriiliste und all ander Teggscht werded öbersetzt.
  • De Wucheartikel isch bi allne gliich und sind au kai aigni Portalverlinkige erwünscht, well mer trotz alem ai Famili sind. Bim Elsassisch und Schwööbisch isch e Link uf Kategorie:Artikel uf Schwäbisch und Kategorie:Artikel uf Elsässisch denkbar, aslang d Aazaal vo de Artikel i dene Tielekt no ase chlii isch.
  • Ainzelprojekt (Wikibuech, Wikiwort etc.) söllet besser zur Geltig choo, z.B. dör aigni Portal, wo uf de Hoptsiite prominent verlinkt werded.
  • d Projektsiite Schatzchästli und Neologisme chömed vo de Hoptsiite ewegg und werded in Wortruum verschobe.

Projekt[Quälltäxt bearbeite]

Die verschidnige Projekt wie Wikiwort, Wikibuech, Wikispruch, Wikiteggscht söled uf de Hoptsiite prominenter verlinkt werde. Zuem söll jedes Projekt en aigni Projektsiite öberchoo, wo as Portal tiened.

Schriibweppewerb 2010[Quälltäxt bearbeite]

De Holder möch d Muettersproch-Gsellschaft aafrööge, öb si amene gmainsame Schriibweppewerb interessiert sind.

Problem als/gsw[Quälltäxt bearbeite]

Blibt wie immer unklar. Wa mitem Aatrag vom Chlämens lauft, wüssemer nöd, do de Chlämens laider nöd choo isch.

Importiere[Quälltäxt bearbeite]

S Importiere verursacht (teilw. lizänzrächtlichi) Problem und bringt u.a. d Statistike dörenand und verfälscht zu alem ane no d Versionsgschicht. Zudem funktioniert si nöd iiwandfrai und isch im grosse und ganze e Murxx.[1], [2]

  • S isch empfole, d Funktion Importiere nüme z bruuche, usser i anzelne Fäll wos abroocht sii cha, wie z.B. Voorlaage.
  • De Öbersetzigshiiwiis mue aineweg drii. De werd ase gstaltet, as e Link uf de Originaltext aifach iigfüegt werde cha, so as d Quelleagoob korrekt isch und de gsetzliche Bistimmige grecht chunt.

Noigstaltig vo de Siite Bsunders glungeni Artikel[Quälltäxt bearbeite]

Dodeför bruuchts kann Meerhaitsbischluss, die Siite cha wie all andere Siite frai gstaltet werde (alefalls ufem Stammtisch nochefrööge). Anzig d Verlinkige uf anderi Projekt sölet bliibe.

Lemmanäme wie Liestal (Bezirk) vs. Bezirk Liestal[Quälltäxt bearbeite]

Do isch momentan e Dörenand, offesichtlich vor alem z Frankriich. Wie die Löösig uusgsie söll, müend d Binutzer selber uusmache. Und zwoor söled die Lemmata je uf Land und Verwaltigsainhait aihaitlich sii. Wenn d Schriiber öber französischi Arrondisements entschaided, s söll Arrondissement Belfort haisse, chöned d Schwiizer sich entschaide, ases Liestal (Bezirk) haisse söll, ooni as drum d Binennig vo de Kantöö gändered were mue. Uuzäligi und unnöötigi Witterlaitige sind nöd erwünscht.

Sustigs[Quälltäxt bearbeite]

  • Di noije Richtlinie und Rotschläg sind nöd bisproche wore.
  • Di noi PDF-/Buechfunktion het no Chinderchranggete und isch drum för üüs no nöd uuswertbar.
  • S Projekt Wikipedia:Artikel Erwytere isch gstorbe und het au nünt broocht.
  • De Melancholie het no öber die noije Lizenze underrichtet: fir Autore ändret sich niez/nit vil (s miessed beide Lizenze beachtet werre [und], im Prinzip aber eifach bloss d GNU-FDL (wil strenger); Nachtrag (fir sealtene Fäll): ma därf jetz aber ou an riine CC-BY-SA-Text nutze (z.B. us'em Internet, muess aageah werre; evtl. aber nit erloubt wenn explizit v2.0 und älter), drfir aber kuine Text meh die riin unter dr GFDL stond); s ändret sich bloss/houptsächlich was fir'd Wyterverwändung: entweder die eine (CC) und/oder die andere Lizenz möglich (falls ou GFDL dr Fall), drbi isch CC primär. @Autore: Freijer hot ma also bi externe Text (Internet, Buech) druf achte miesse, dass dr Text public domain oder unter dr GFDL gsi isch. Jetz därf's des aber numm si (falls bloss GFDL). Jetz muess ma luege ob dr Text public domain oder unter dr CC-BY-SA stoht! Falls zuesätzlich unter dr GFDL, dann blibt's sogar dual.
  • S DialäktWiki schiint iigschloofe z sii.
  • Denebt sind no e paar technischi Chliinigkaite bisproche wore.


Zöri, 1. September 2009 --al-Qamar 13:09, 1. Sep. 2009 (MESZ)
(för noochträglichi Ändrige vom Holder und Melancholie lueg d Versionsgschicht und d Diskussion)