Wikipedia: Ignorier alli Regle

Us der alemannische Wikipedia, der freie Dialäkt-Enzyklopedy

„Ignorier alli Regle“ heisst nit „brich alli Regle“. S bedytet eifach: Du muesch nit zerscht alli Regle uuswändig lehre, voreb Du do mitschaffe chasch. Un Du muesch di au nit uubedingt an jedi einzelni Regle halte.

Loss di nit vu Regle un Richtlinie abschrecke![Quälltäxt bearbeite]

S git in dr Wikipedia nume vier Grundsätz, wu nit chenne gänderet wäre:

  1. Wikipedia isch e Projäkt zum Ufböu vun ere Enzyklopädii un nyt andersch.
  2. Artikel in dr Wikipedia mien neutral gschribe syy.
  3. Halt di an s gältend Rächt, vor allem an s Urheberrächt.
  4. Reschpektier di andere Benutzer un halt di an d Wikiquette.

Alli andere Richtlinie un Regle chenne im Prinzip au gänderet wäre. Vylmol sin si aber im Lauf vu johrelange Diskussione in dr Wikipedia-Gmeinschaft entstande. Wäge däm git s villicht au kei grosses Inträssi vu andere Benutzer nomol iber die Regle z diskutiere.

Wänn Du di mit ere Regle nit chasch abfinde oder wänn Du si imfall nit chännsch, no muesch Di nit dra halte. Uf dr andere Syte muesch derno aber au akzeptiere, wänn e andere Benutzer Dyyni Byyträg an die Richtlinie aapasst, was au im Einzelfall cha heisse, ass Dyy Byytrag wider ganz ruckgängig gmacht wird.

E Byschpil: In dr Alemannische Wikipedia git s d Regle, ass mer nit einzelni Johreszahle verlinkt. Wänn du des witt mache oder dr Tekscht us dr dytschsprochige Wikipedia ibersetzt hesch un kei Luscht hesch, au no di ganze Links bi Johreszahle uusezneh, no loss es eso, wie Du s fir richtig haltsch! Irgedeber ander wird s derno scho mache, wie s do gängig isch, mach Dir doo kei Chopf driber. Bii muetig!

Wänn Du meinsch, im e konkrete Fall sott e Richtlinie nit aagwändet wäre, no schryb e Begrindig derfir uf d Diskussionsyte vu däm Fall. E Teil Uusnahme sin eso klar un eidytig, ass si nit extra in dr Richtlinie ufgfiert wore sin. D Richtlinie sin eso gschribe wore, ass mer si, wänn mer syy gsunde Mänscheverstand brucht, guet cha aawände – oder ebe au nit.

Wänn Du eini vu dr Richtlinie fir generäll falsch, iberflissig oder sinnlos haltsch, no schryb des uf dr Diskussionsyte vu dr Regle. Wänn Du si uubedingt witt gänderet haa, fang e Diskussion driber uf em Stammtisch aa oder chumm zum Summerträffe.

D Wikipedia isch e Wiki: Vu däne vier Grundsätz abgsäh, wu obe ufgfiert sin, chenne alli andere gänderet wäre!

Sogar dr fir vyli villicht allerwichtigscht Grundsatz, ass di Alemannisch Wikipedia e Wikipedia vu dr alemannische Dialäkt isch, isch scho gänderet wore: Am Aafang isch si ne elsässischi Wikipedia gsii un isch erscht dur e Bschluss vu dr Gmeinschaft zuen ere Wikipedia vu allene alemannische Dialäkt uusgwytet wore!

Vil Freid, Muet, Glasseheit un Unterscheidigsvermege!