Gang vu guete Absichte uus

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
E Fass AGF

Gang vu guete Absichte uus oder Unterstell gueti Absichte (engl. assume good faith, kurz AGF) isch e Grundprinzip vu dr Wikis, wu vu dr Wikimedia Foundation betribe wäre, au vu dr Alemannische Wikipedia. Mir gehn dervu uus, ass di meischte Benutzer em Projäkt wän hälfe un nit schade. Sunscht wär e Projäkt wie d Wikipedia vu Aafang aa sinnlos.

Wänn Du also vernimftigerwys dervu chasch uusgoh, ass e fählerhafte Yytrag guet gmeint isch, derno tue ne verbessere oder ruckgängig mache ohni Kommentar wie „Vandalismus“.

E mänkmol giltet halt dr Satz: S Gegeteil vu guet isch guet gmeint.

Dänk bi Meinigsverschideheite dra, ass dr ander villicht glaubt, dr Wikipedia dur syni Handlige z hälfe. Nutz d Diskussionssyte go Dyy Standpunkt erkläre un gib em andere d Megligkeit, des au z mache. Doderdur chenne Missverständnis un Eskalatione in Konflikt vermide wäre.

Gib bsundersch bi Neje Achtig druf, ass Du geduldig mit ene bisch, wel si mit dr Regle un em Konsäns in dr Alemannische Wikipedia nonig vertröut sin. E Nejling meint vilicht, ass syy Verhalte aagmässen isch. Probläm chemme normalerwys dohär, ass Lyt d Regle nit chänne oder falsch verstehn. S git s au vilmol, ass e Neje d Aasicht vertritt, mir sotte unseri Verfahrenswyse ändere, ass si zue dr Erfahrige passe, wu är naime anderscht scho gmacht het, z. B. uf dr dytschsprochige Wikipedia. E Verhalte, wu us ere sonige Sichtwys use entstoht, isch nit bes gmeint.

Gang vu guete Absichte uus zilt uf dr Zwäck vun ere Handlig – nit uf d Handlig sälber. Au guetwilligi Mänsche mache Fähler, un Du sottsch sonigi Fähler natyrli au korrigiere. Du sottsch keini schlächte Aktione toleriere, Du sottsch aber nit eso ufträtte, wie wänn die Fähler mit Absicht gmacht wore wäre. Verbessere d Fähler, aber schimpf nit. S git Benutzer, wu villicht e anderi Meinig hän wie Du. Un au wänn si sich irre, heisst des no lang nit, ass si des Projäkt vun ere Alemannische Wikipedia wän kaputt mache. S isch nie notwändig andere Benutzer e besi Absicht z unterstelle, au wänn die offesichtlig schynt - alli Gegemaßnahme (d. h. Reverts un Sperrige) chenne immer uf s Verhalte un mien nie uf dr Zwäck bezoge wäre.

Wänn Du vu andere erwartsch, ass si au bi Dir vu guete Absichte uusgehn, no zeig au gueti Absichte: erklär Dyni Handlige iber d Zämmefassig un imfall iber d Diskussionsyte.

Wänn mer in ere Usenandersetzig nimi vu guete Absichte uusgoht, no cha s syy, ass mer aafangt, dr ander persenlig aazgryffe ohni ass mer s sälber merkt. Derno verlageret sich dr Konflikt vun ere sachlige uf e persenligi Ebeni, des cha derzue fiere, ass dr ander au anderi Handlige vu Dir uf eimol as beswillig aasiht.

Wänn Du lenger bi dr Wikipedia mitmachsch, no cha s syy, ass Du emol mit eme andere Benutzer iber irgedebis gstritte hesch. Au wänn Du beleidigt bisch: trag em andere sonigi Sache nit noch. Du chasch Beleidigunge au verzeje, Du chasch au sälber „Excusez“ sage un e Stryt us dr Vergangeheit eifach syy loo. Nit alles isch immer eso gmeint gsi, wie Du s verstande hesch, villicht isch s jo eifach e Missverständnis gsi ...

Wänn mer bi me andere Benutzer nimi vu guete Absichte uusgoht, no cha s au syy, ass mer dr neutral Standpunkt us dr Auge verliert. E neutrali Darstellig sott im Idealfall derzue fiere, ass dr Artikel vu allene cha akzeptiert wäre. Wänn eber Dyni Bearbeitig ruckgängig macht, isch s villicht dodra gläge, ass er Dyy Byytrag nit neutral gfunde het. Iberleg dir, wurum är dr Artikel villicht fir nit neutral ghalte het. Versuech villicht au emol, syy Standpunkt in Dyni Darstellig z integriere.

Fähler z verbessere (au wänn Du si fir Absicht haltsch), isch besser wie eberem e Lug z unterstelle; e Berichtigung wird Dyy Gegeniber villicht besser chenne aaneh. E neje Satz, wu Du weisch, ass er falsch isch, z verbessere, isch besser wie ne eifach wider z lesche.