Waltraud Burtsche
D Waltraud Burtsche (* 1939 z Fryburg as Waltraud Zähringer) isch e dytschi Hoteliere un alemannischi Dialäktdichteri.
Lääbe
[ändere | Quälltäxt bearbeite]D Waltraud Zähriger isch uf em Buurehof vu ihre Großeltere z Oberbärge am Chaiserstuel ufgwachse. Anne 1951 sin d Elltere mit ere uf Bihl umzoge. Dert isch si uf s Gimnasium gange un het 1960 s Abitur gmacht. Ihre Frynd Roland Burtsche isch au vum Chaisestuel gsii un het z Sulzburg Metzger glehrt un 1956/1957 as Chochsmaat uf em Bananefrachter MS Quadriga gschafft. Derno het er im „Gustav Adolf“ z Hamburg Choch glehrt. Zäme sin si 1960 uf Nordamerika uusgwanderet, dr Burtsche aafangs uf Kanada, d Zähringer in d USA uf New York, wu Unkel vun ere gläbt hän. Aafangs het si im e Huushalt gschafft, derno het si bi re Bank aagfange, bi dr First National City Bank of New York. Si het an dr Wall Street gschafft, speter an dr 5th Avenue. Drotz ass si schnäll ufgstiige isch – si het schließli in dr Styyrabdailig vu dr Bank gschafft -, isch si no aim Johr wider retuur uf Dytschland gange, wel s Haimweh z groß woren isch. Dr Roland Burtsche het aafangs z Kanada gschafft, derno isch er in d USA gange, wel in dr Nechi vu syre Freindin het welle syy. Anne 1964 isch au är uf Dytschland retuur chuu un het as Chuchischef im „Hotel am Notschrei“ aagfange.
D Waltraud Zähringer het zerscht am Dolmetscher-Inschtitut z Haidelberch studiert, drno an dr Universitet Fryburg un schließlig an dr Fryburger PH. 1966 het si as Lehreri fir Änglisch an dr Mittelschuel z Achere gschafft.
Im Johr 1967 hän si un dr Roland Burtsche ghyrote. Us dr Eh sin drei Dechtere firigange, Kirsten, Heidi un Birgit.
Si hän zäme s „Hotel zum Markgrafen“ z Betzige gfiert, ab 1970 dr „Glai Meyerhof“ in dr Rothuusgass z Fryburg, s „Café Herzog“ un dr „Rotskäller“ im Kornhuus am Minschterblatz. Anne 1979 hän si Colombi-Hotel z Fryburg gchauft un umböue. Vu 1975 bis 2000 hän si derzue au no s Café „Schwarzes Kloschter“ un d Restaurant „Wolfsehehli“ un d "Tessiner Stube" gfiert.
Zum Familienunternäme vu s Burtsches ghere au no s „Hotel Stadt Fryburg“ in dr Brysacher Stroß, d „Chloschtermihli“ z Offnadinge, s „Colombi-Chalet“ un e Catering-Service. Anne 2014 hän si s Unteräme an ihri Dechtere ibergee.
Im Johr 2014 hän si insgsamt 270 Mitarbaiterne un Mitarbaiter ghaa, im Lauf vu dr Johr hän s Burtsches rund 790 Lehrling uusbildet. S „Colombi-Hotel“ drait s Gietezaiche „Leading Hotels of the World“, syt 1983 het s e Stärn-Reschtaurant din.
D Waltraud Burtsche schrybt Gedicht im Chaiserstieler Dialäkt, wu si bi verschidene Glägehaite als vordait.
Weblink
[ändere | Quälltäxt bearbeite]- Waltraud Burtsche uf LEO-BW
- Joachim Röderer: Stabwechsel im "Colombi" – Burtsche-Töchter übernehmen Hotelunternehmen, Badische Zeitung, 30. Oktober 2014
- Joachim Röderer: Hintergrund: Ein Leben als Gastgeber, Badische Zeitung, 27. Dezämber 2014
- Joachim Röderer: Rückkehr trotz Green Card. Die Auswanderungs-Geschichte der Colombi-Hoteliers, Badische Zeitung, 27. Dezämber 2014