Wagerain

Dr Wagerain isch e Bärg im Kanton Aargau.

Es isch ä längzogni Reie vo Hügel kwer dur s aargauische Middelland zwüsche de Tääler vo dr Rüüss uf dr Oschtsyte und vo dr Bünz im Weschte. D Bärgchetti isch öpe 20 Kilometer läng. Im Rüsstaal isch Brämgarte die gröschti Ortschaft, im Tal vo dr Bünz isch s Wohle. Dr Wagerain foot im Süde bi dr Gmeind Muri mit de alte Sytemoräne vom Rüüssgletscher aa und lauft näbem Rüsstaal dure bis uf Otmisinge und Mägewyl. Es het uf de Moränehügel vil grossi alti Schteine, wo Findling vom Gletscher sind. Dr Kanton Aargau het das Gebiet drum deils under Naturschutz gstellt und is Inväntaar vo de nazional wichtige Gletscherlandschafte ytreit. Die bekantischte Schteiblöck sind dr Bättlerschtei und der Ärdmannlischtei. Dä het sogar en eigeti Ysebaanhaltstell, wil ne so vil Lüüt gönd go psueche.

S Maiegrüen isch dr höchscht Bärg vom Wagerain; er isch 589 Meter höch. Dr glych Name het au dr Buurehoof vo Hägglige grad under am Hügel. Uf em flache Gipfel vom Maiegrüen stoot en Uussichtsdurm.

Dr gröscht Deil vom Bärg isch vom Wald tekt. I nes baar Liechtige sind Buurehöf und Wyler; die grössere sind Büschike, Ämet, Rüti, dr Obermatthof, s Oberdorf bi Aristau und Türmele. Einzig d Dörfer Hägglige und Bäsebüre ligge ufem Bärg. Hägglige isch i dr Tuele uf dr Mittagsyte vom Hügel Mäiegrüen.

Under de Moräne lige Schteischichte vo dr Molasse und ganz im Norde vo Chalchschtei. Bi Otmisinge und Mägewyl wird in es baar Schteibrüüch am Rand vom Wagerain sid dr Römerzyt dr Mägewyler Muschlechalchschtei abbout.

Weblink

Wagerain uf dr Website vom Forschtbetriib Wagerain