Violanda Lanter

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen

D Violanda Lanter (* 1. Jänner 1964 z Sissach, Schwyz, haimetbräächtigt z Stainach SG un syter 1996 z Ruggäll) isch e schwyzerisch-liachtaschtaanischi Bolitikeri (VU). Syter 2013 isch si Abgoordneti im liachtaschtaanische Landdaag.

Lääbe[ändere | Quälltäxt bearbeite]

D Violanda Lanter isch e Doochter vum Unternämer Rudolf Lanter un syre Frau Isolde geb. Büchel. Si isch z Ruggäll mit drei Gschwischter ufgwagse. Vu 1976 bis 1984 isch si uf Liachtaschtaanisch Gimnaasium gange, wu si d Matura gmacht het. Vu 1984 bis 1999 het si an dr Universiteet St. Galle Räächtswisseschaft studiert un 1990 mit eme lic. iur. HSG abgschlosse. No Griichts- un Aawaltspaktika z Rorschach un z St. Galle 1990–1992 het si 1993 e st.-gallisch Aawaltspatänt iberchuu. Vu 1993 bis 1994 het si z Winterthur bi dr Chrankeversicherig KFW Winterthur as Laiteri vum Räächtsdienscht gschafft. Anne 1994 isch si retuur uf Liachtaschtaa gange un het deert aafangs as Jurischti bi dr Prokurationsaastalt z Vaduz gschafft un ab 1996 bis 2000 derno as Laiteri vum Räächtsdienscht bi dr LGT Treuhand z Vaduz. Vu 2000 bis 2004 isch si Verwaltigsrootsbresdiänti vu dr Liachtaschtaanische Chraftwäärch gsii. Ab 2005 het si derno bis 2011 as Jurischti fir dr Klaus Tschütscher gschafft, wu Stellverdrätter vum Regierigsschef gsii isch, bzw. ab 2009 Regierigsschef.

Anne 1996 het d Violanda Lanter di liachtaschtaanisch Staatsbuurgerschaft iberchuu.[1]

Am 10. Oktober 2018 het si dr Dytsch Hagen Pöhnert (* 1963) ghyroote, dr Diräkter vum Schafuuser Energyunternäme SH Power. Us ere eerschte Ee mit em Foorschtunternämer Paul Koller (* 1962) het si zwai Chinder, e Suun un e Doochter. Si läbt z Ruggäll.

Bolitik[ändere | Quälltäxt bearbeite]

D Violanda Lanter isch Mitgliid vu dr Vaterländische Union. Vu 1999 bis 2003 isch si fir iri Bartei im Ruggäller Gmairoot ghockt. Bi dr Landdaagswaal im Februar 2013 isch d Lanterin zum eerschte Mool in Landdaag gweelt woore. Vu 20913 bis 20167 isch si deert Vizebresidänti vum Landdaag gsii. Derzue isch si in sällere Legislatuurpreiood Mitgliid un Laiteri vu dr liachtaschtaanischi Delegazioon bi dr Interbarlemäntaarische Unioon gsii. Bi dr Landdaagswaal im Februar 2017 isch si wider in Landaag gweelt woore. Vu 2017 bis 2018 isch si Frakzioonssprächeri vu dr VU-Landdaagsfrakzioon gsii. Syter 2017 isch si Mitgliid vu Barlemäntaarische Versammlig vu dr OSZE un vu dr liachtaschtaanische Delegazioon bi dr Internazionaale Barlemäntarier-Kummissioon Boodesee.

Sunschtig Engaschmänt[ändere | Quälltäxt bearbeite]

  • 1997–2001 Vorstandsmitgliid vum Verein Frauenhaus Liechtenstein
  • syt 2013 Vorstandsmitgliid vum Verein Familienhilfe Liechtenstein
  • syt 2016 Stiftigsrootsmitgliid vu dr «Unus-Pro-Multis Martin Hilti Stiftung» z Schaa

Weblink[ändere | Quälltäxt bearbeite]

Fueßnote[ändere | Quälltäxt bearbeite]

  1. Politische Persönlichkeit einbringen Artikel im Liechtensteiner Vaterland vom 28. Dezember 2012