Titisee

Us der alemannische Wikipedia, der freie Dialäkt-Enzyklopedy


Titisee

Karte vom Titisee

Date
Name: Titisee
Lag: Südschwarzwald
Fläche 1,3 km²
maximali Diefi: 40 m
Zueflüss: Seebach
Abflüss: Gutach
Höchi iber NN: 845 m
Grösseri Städt am Ufer: Titisee-Neistadt
Besunderheite: Bekannter Kurort

Dr Titisee isch e See im südliche Schwarzwald z'Bade-Württeberg. Er bedeckt e Flächi vu 1,3 km² un isch durschnittlich 20 Meter dief. Sie Entstehig verdankt er im Feldberggletscher. Im Pleistozän bildeti Moräne düen hüt si Ufer begrenze. Dr Usfluss vum See uf 840 Meter Höchi isch dr Guetach gheisse Oberlauf vu dr Wutach. Am Nordufer lit dr glichnammig Kurort, wo Deil vu dr Stadt Titisee-Neistadt isch.

Veriisig[ändere | Quälltäxt bearbeite]

Dr Titisee brücht sehr lang, bis er im Winter gfriert. Säll lit am Wind, wo d'Wasseroberflächi fast immer in Bwegig haldet. Demit dr See zum Iislaufe freigäbe werre ka, muess d'Dicki vum Kerniis mindistens 16 cm betrage. Kerniis, au Kompaktiis gnennt, isch stabil un enthaldet so guet wie keini Luftblose.

Bestoht d'Ussicht uf Freigabe, so werre däglich Messige dur dr Bauhof vu dr Stadt Titisee-Neistadt an 3 bis 4 Messpunkte durgfüehrt. Sott e Freigab möglich un vu dr Verantwortliche abgsägnet worre si, no werre immer nur bestimmti abgränzti Beriiche vum Sees freigä, nie aber dr ganz See.

Sälli Regelige bestehn ca. sit em Afang vu dr 1980er Johre, noochdem devor e Unfall gschähe isch: Domols isch dr See as Start- un Landebahn fer Chleiflugzüg benutzt worre. Um sällie z'rüme, isch e Bulldog mit Schneepflueg igsetzt worre. Dr Bulldog het d'Iisdecki durbroche un isch mitem des Fahrer im Titisee versunke.

Namme[ändere | Quälltäxt bearbeite]

Dr Namme Titisee isch relativ ald. Ersti urkundlichi Ufzeichnige vu anno 1050 finde sich im Kloster Allerheilige z'Schaffhuse, wo dr Namme Titinsee erwähnt wird. Au dr Namme Dettesee wird in ere Urkunde us dr Pfarrei Saig erwähnt, wo vu anno 1111 stammt. Ugfähr ab 1750 isch dr Name in dr hüttige Form benutzt worre.

Parallel zue sällere etymologische Herkunft existiert e witter, eher legandäri Erklärig. Denooch sott dr römisch Kaiser Titus, as Feldherr, in dr Gegend am Titisee glageret ha. Debi sott ihm dr See so scheen gfalle ha, dass er ihm si Namme gä het. Säll isch au dr Grund, worum hütt dr grob Noochbau vu ere römische Galeere uf em Titisee verkehrt.

Dä Artikel basiert uff ere fräie Übersetzig vum Artikel „Titisee_(See)“ vu de dütsche Wikipedia. E Liste vu de Autore un Versione isch do z finde.