Tessub

Us der alemannische Wikipedia, der freie Dialäkt-Enzyklopedy
Hops zue: Navigation, Suech
de Tessub mit sinere Frau Hebat, Felshailigtum vo Yazılıkaya.

De Tessub (z Ugarit: tṯb) isch de hurritisch Wettergott und o de Hoptgott. Wo d Hurriter i Syrie iigwanderet sind, isch er mitem Wettergott vo Halpa (Aleppo) verschmulze.

De Tessub isch de Soo und Gegner vom Kumarbi und de Brüeder vom Tasmis und vo de Sauska. Sini Frau isch d Hebat. De Sarruma und d Allanzu sind d Chind vo dem Götterpaar.

De Tessub isch de Gott vom Wetter, wo Sturm, Rege und Gwitter macht und sini Waffe isch de Tunnerkail. Siin Wage werd vo zwee Stiere zoge, em Seri und em Hurri. Im hethitisch-hurritische Felshailigtum Yazılıkaya stoot er uf zwee Berggötter, em Namni und em Hazzi. Er fürt di männlichi Götterprozession aa. Gegenöber von em stoot d Hebat, wo d Prozession vo de Göttine aafüert.