Hurriter

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen

D Hurriter sind e bronzezittlichs Volch im Alte Orient gsii. Si hend i de Berge glebt, wo Mesopotamie im Norde abgrenzt hend und sind nodisnoo i Syrie iidrunge. Abem 14. Joorhundert v.Chr. hett di hurritischi Kultur afange e starche Iifluss uf d Hethiter uusüebe. De hethitisch König Hattusili III. und d Königi Puduhepa hend de hethitisch Staatskult regelrecht noch hurritischem Vorbild umgmodlet und i de Nööchi vo de hethitische Hoptstadt Hattusa im Felshailigtum Yazılıkaya s hurritische Pantheon in Fels inemaissle loo.

D Hurriter wered i Ost- und Westhurriter underschide. D Osthurriter hend nordöstlich vom Tigris a de Abhäng vom Zagros glebt, di wichtigsti Städt sind Nuzi und Arrapha gsii. D Westhurriter hend z Syrie gwonnt, wo si meriri chliini Königriich gründet hend. Au s Riich Mitanni isch hurritisch gsii, d König aber hend altindischi Näme ghaa.

S Hurritische isch en nödindogermanischi Sprooch, wo nume schlecht verstande werd, well chuum Bilingie vorhande sind. Hurritischi Tegscht sind vor alem z Ugarit am de Chüste vom Mittelmeer, z Alalah z Syrie, z Emar am Euphrat und i de hethitische Hoptstadt Hattusa gfunde wore.