D TagesWoche isch e BaslerZitig für die ganzi Regioon gsi. Si isch jeede Daag online und äimol in dr Wuche am Fritig as Druckusgoob erschine. Si isch 2011 gründet worde, wil d Herusgääber dr Mäinig gsi si, ass s Spektrum vo dr Mäinig z Basel z äng sig und si s wider häi welle bräiter mache.[2] D Erstusgoob isch am 28. Oktober 2011 uusechoo.[3]
D Basler Schurnaliste Urs Buess und Remo Leupin si Co-Schefredakter worde und häi e sibzäächöpfigi[4] Redakzion gläitet, e Hufe von ene si ehemooligi Schurnaliste vo dr «BaZ» gsi.[5] Am 17. Mai 2013 isch dr Dani Winter Chefredakter worde.
E Redakzionskrise isch entstande, wo am 25. Septämber 2013 meerere Schurnaliste kündet worden isch[6]. S Verdraue in Schefredakter Dani Winter isch chlii gsi und d Lüt häi sich an Dächtelmächdel vo dr Gschäftsfüerig gstoosse.[7][8][9]
Au s Abkomme vo dr DaagesWuche mit em Fluughaafe Baasel-Mülhuuse und em Flughafe Chloote, wo die bäide Flughääfe 11'500 Exemplar (50.8% vo dr Gsamtuflaag[10]) jedi Wuche gratis verdäilt häi, isch as broblematisch aagluegt worde. D Idee drhinder isch gsi, ass eso d Uflaag gröösser wurd, und d Zitig hööcheri Briis für d Inserat chönn verlange. D Baasler Staatsaawaltschaft het druf gegen d DaagesWuche afo ermiddle.[11]
Am 5. Novämber 2018 het d Schtiftig für Medievielfalt bikannt gää, ass d DaagesWuche iigstellt und d Neue Medien Basel AG liquidiert wurde, well die für en Erhalt notwändigi Steigerig vo den Iinaame im „schwierige schurnalischtische Umfäld“ nit mööglich gsi sigi. Die letschi Usgoob isch denn am 16. Novämber 2018 erschine. Vo dr Iischtellig sinn bi dr Zitig 18 Bersoone betroffe, insgsamt 30 Bersoone bi dr AG.[12] D Schtiftig het aagchündigt, e nöi Initiative mit jäärlig ainere Million Frangge z underschtütze, so dass scho 2019 e nöis Mediebroduggt für d Regioon Basel lanciert wärde khönni.[13]
↑Iso Ambühl: «Das grosse Netzwerk der Anthroposophen - Sanfte Medizin, Bankgeschäfte ohne Gier, Naturkosmetika, kreative Schulen: Die Anthroposophie ist in Basel präsent», Artikel des «Sonntag» vom 1. April 2012.
↑Informazione vom lokale Sänder TeleBasel vom 5. Februar 2014.
↑Sendung von TeleBasel vom 5. Februar 2014, aufgerufen am 11. April 2014.
