Stoupa

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
Stupa

Stupa (noigriech. Στούπα) isch en Ort uf de Halbinsle Mani uf de Peloponnes z Griecheland. Er isch früenner e Fischerdörfli gsii miteme chliine natürlich Hafe. Wege de Sandstränd bim Dorf hets es sich zomene chliine Feriedorf gmuuseret.

Bergwerch vo Pastrova[ändere | Quälltäxt bearbeite]

Nördlich vom Ort liged am Hang d Bergwerch vo Pastrova (Παστροβά), wo em griechische Schriftsteller Nikos Kazantakis ghöört hend. De het am Berg Athos de Georgios Zorbas gcheneglernt und de öberschwetzt as Vorarbaiter i siim Bergwerch uf de Mani z schaffe. Allerdings hend die beede kan Erfolg ghaa. Die Episoode isch denn driisg Joor spööter s Vorbild vom grüemte Romaan Alexis Sorbas wore, wa aber z Kreta spillt, i de Haimet vom Kazantakis. Im Dorf isch e Büste vom Kazantakis uufgstellt.

Gschicht[ändere | Quälltäxt bearbeite]

Süüdlich vom Dorf isch e Hügel mit de Reste vom antike Stettli Leuktron oder Leuktra (altgriechΛεύκτρον Λεῦκτρα). Di ältiste Fund stamed us de mykenische Zitt, wie Scherbe und d Reste vomene Chuppelgrab zaiget. D Fund us de Antiki gönd vo de Klassische Epoche bis i di röömischi Chaiserzitt. Nume wenig Fund sind gmacht wore, Muurwerch und anderi Chliiund i de Felder südwestlich vom Hügel, au Inschrifte.

De Pausanias het im 2. Joorhundert n. Chr. de Ort bsuecht un bischribe. Deno isch uf de Akropolis e Tempel vo de Göttin Athena gstande. De wichtigst Gott isch aber de Asklepios gsii, wa dör en Inschrift us de Röömerzitt bistetigt werd. Anderig Götter, wo do vereert wore sind, sind de Apollon Karneios und d Ino. S hett ono e hailige Hain miteme Tempel för de Eros ggee, wo nochem Bischriib bsunders lauschig gsii si mue. De Pausanias verzellt ono, ass bimene Waldbrand e Statue vom Zeus Ithomatas förechoo sai, und as da vo de Messenier as Biwiis agluegt woren isch, as Leuktra vo alters her zo Messenie ghört hebi.

D Venezianer hend öber de antike Akropolis e Festig baut. De Ort hett denn Leutro ghaiise.