Stalinismus

Dä Artikel behandlet d Ströömig vom Marxismus-Leninismus, wo uf e Stalin zruggoot. Für anderi Bedütige vom Begriff lueg doo.

Dr Stalinismus isch e Ströömig im Marxismus-Leninismus, wo uf e Josef Stalin zruggoot.

dr Josef Stalin, um 1942

Dr Begriff

Ursprünglig het dr Begriff Stalinismus in de spöötere 1920er Joor in dr Sowjetunion d Uffassige vo dr Meerhäit in dr KPdSU, wo vom Josef Stalin aagfüert worde isch, de Bolschewiki, im Kampf um die politischi und theoretischi Noochfolg vom Lenin bezäichnet, hauptsächlig as Geegesatz zum Trotzkismus. Dr Stalin sälber het dennzumol dr ‚Stalinismus‘ ironisch as e bsundrigs energischi Verdäidigung vom Leninismus bezäichnet. Dr Begriff Marxismus-Leninismus isch au uf e Stalin und sini Ideologii zruggzfüere.

1934, um e 55. Geburtsdaag vom Stalin ume, si im ene Prawda-Ardikel vom Karl Radek d Ideä und d Politik vom Stalin zun ere äigeständige Läistig erkläärt worde. D Formle vom Marxismus-Leninismus-Stalinismus het sich denn duuregsetzt. Das isch under anderem zum Usdruck choo, wo usglääseni Reede und Schrifte vom Stalin zerst zämme mit e baar Wärk vom Lenin in „Lenin-Stalin“ - Ausgewählte Werke in einem Bande veröffentligt worde si. 1938 isch si Schueligswärk Geschichte der Kommunistischen Partei der Sowjetunion (Bolschewiki), kurzer Lehrgang vom Zentraalkomitee vo dr KPdSU uusegee worde. Das het si Schrift Über Dialektischen und Historischen Materialismus enthalte, wo e Witerentwigglig vom Leninismus hätt sölle sii. 1946 isch sogar e Gsamtusgoob vo de Wärk vom Stalin in sächzää Bänd vom Marx-Engels-Lenin-Instidut bim Zentralkomitee vo dr KPdSU (B) uusegee worde.

D Theorii

Grundstäi vo dr stalinistische Theorii si d Entwigglig vom Sozialismus in äim Land und d Verscherfig vom Klassekampf bi dr Entwigglig gsi. Die Verscherfig vom Klassekampf isch brucht worde, zum Repressioone und stalinistische Süüberige z legitimiere. Si Ideologii, wo überhaupt nüt drvo het döfe in Froog gstellt wärde, gältet hüte as e mechanischi Rezepzioon vom Gedankeguet vom Marx, Engels und Lenin. Iire äinzig Zwäck isch s gsi, politischi Verfolgige vo sogenannte Renegate, d. h. „Verrööter“ vo dr räine Leer, z rächtfertige.

D Entstalinisierig

Noch dr persöönlige Kritik am Stalin uf em XX. Bardeidaag vo dr KPdSU und dr Entstalinisierig wo denn in de sozialistische Länder und de kommunistisch Barteije aagfange het, isch au dr theoretisch Biidraag vom Stalin zum Marxismus-Leninismus nöi iigschetzt worde. Dr Naame vom Stalin isch nüm im gliiche Schnuuf mit de Nääme vom Marx, Engels und Lenin gsäit worde, und s bropagandistische Viererbordret, wo denn üüblig gsi isch, isch uf e Marx, Engels und Lenin reduziert worde. Die chinesischi kommunistischi Bardei aber het sich witer uf e Stalin berüeft, und dr Mao Zedong het bostuliert, ass sibzig Brozänt vom Gedankeguet und vo dr Braxis vom Stalin seer «guet» gsi sige – bsundrigs im Zwäite Wältchrieg, drissig Brozänt aber schäädlig. Zum sich vo dr „rewisionistische“ UdSSR abzgränze, si Blakaat erschiine, wo as fümfts Bordret daas vom Mao Zedong vorcho isch.

Under westlige Intellektuelle het dr Stalinismus noch em Dood vom Stalin nume seer weenig Aahänger ghaa, au wenn sich groossi Däil vo dr Lingge nit vom Stalinismus distanziert het, wo dr Stalin no gläbt het. Noch dr 68er-Studäntebeweegig häi sich in Westöiropa sogenannti K-Grubbe bildet. Das si churzlääbigi Splittergrubbe gsi, wo sich zum Däil au uf e Stalin berüeft häi.

Litratuur

• Werner Hofmann: Was ist Stalinismus? in: Stalinismus und Antikommunismus. Zur Soziologie des Ost-West-Konflikts. Frankfurt am Main: Suhrkamp 1967.
• Hannelore Horn: Der Stalinismus und seine Ursachen. In: Uwe Backes/Eckhard Jesse (Hrsg.): Jahrbuch Extremismus & Demokratie, 9. Jahrgang, Baden-Baden 1997, S. 65-96.
• Ulf Wolter: Grundlagen des Stalinismus. Die Entwicklung des Marxismus von einer Wissenschaft zur Ideologie, Berlin 1975
• Stalinismus und das Ende der ersten Marx-Engels-Gesamtausgabe (1931–1941). Dokumente über die politische Säuberung des Marx-Engels-Instituts 1931 und zur Durchsetzung der Stalin'schen Linie am vereinigten Marx-Engels-Lenin-Institut beim ZK der KPdSU aus dem Russischen Staatlichen Archiv für Sozial- und Politikgeschichte Moskau. Argument, Hamburg 2001 (darin Kurzbiografien S. 398-434), ISBN 3-88619-684-4 (Beiträge zur Marx-Engels-Forschung. Neue Folge. Sonderband 3).

Weblingg

• Leo Trotzki: Die verratene Revolution – Was ist die Sowjetunion und wohin treibt sie? (1936)
• Bruno Rizzi: The Bureaucratisation of the World (1939) – Rizzi betont gegen Trotzki die Herrschaft der Klasse der Bürokraten
• Pereira: [1]- Entwicklung der Partei in den zwanziger Jahren und das Verhältnis zu den "Rechts Abweichlern"

Fuessnoote

Dä Artikel basiert uff ere fräie Übersetzig vum Artikel „Stalinismus“ vu de dütsche Wikipedia. E Liste vu de Autore un Versione isch do z finde.