Stadtpräsident

E Stadtpresidänt oder e Stadtpresidäntin isch der Scheff bzw. d Scheffyn vo dr politischen Exekutive von ere Stadt.

Für d Funkzioon git’s hüt no wie au i dr Stadtgschicht ganz verschideni Nääme: I teil Länder seit men em – und vo jetz aa chöme doo nume no die männliche Amtsbezeichnige vor – au Bürgermeischter und z Dütschland öppen Oberbürgermeischter, im Liechteschteinischen isch es dr Ortsvorsteher, und früener het i gwüssne Piet d Amtsbezeichnig Gmeindpresidänt gheisse, wa i dr Schwiz i Gmeinde, wo ke Stadt sind, immer no so isch. I dr Schwiiz bruucht me doo und döört au no dr alt mundartlech Name Stadtamme. Uf Französisch isch es dr Maire, uf Änglisch dr Mayor und im Iteliänische dr Sindaco.

I de meischte Fäll wird – ämel i demokratisch organisierte Länder – dr Stadtpresidänt vo de stimmberächtigte Ywooner und Ywoonerinne vo dr Stadt gwählt.

Bi chlinere Stedt chunt’s vor, ass dr Stadtpresidänt di einzigi Person mit der Ufgab vo der Exekutyven und elei dr Leiter vo dr Stadtverwaltig isch, bi de meischte und eerscht rächt bi de Grossstedt het me mit de staatliche Verfassige oder de Gmeindreglemänt sit em Mittelalter do drfüür en Stadtroot vorgsee, wo em Gmeindpresidänt bi dr Arbet hilft. Dr Presidänt isch denn dr Vorsitzendi vom Root.

Dr Presidänt tuet syni Stadt politisch gägen usse verträtte, also bi andere Stedt und Gmeinde und bi hööchere staatliche Stellen und gägenüber privaaten Organisazioone, dr Wirtschaft und de Chile.

Lueg au:

Literatur

Peter Steiner: Gemeindepräsident. In: Historisches Lexikon vo dr Schwiiz.