Lischte vo Gmeind- und Stadtpresidänte vo Lieschtel

Das isch e (bis jetz no unvollständigi) Lischte vo Gmeind- und Stadtpresidänte vo Lieschtel.

Z Lieschtel, dr Hauptstadt vom Baselland, isch der Stadtpresidänt der Vorsitzendi vom Stadtroot.

Gschicht

Sit em Mittelalter het e Schultheiss für d Gschäft vo de Stadtbürger gluegt; der erscht, wo me vonnem in ere Urkunde öpis list, isch anne 1273 erwäänt, er het Hermann gheisse.

Im Ancien Regime, also bis anno 1798, het’s i dr Stadt als Leiter vo dr Verwaltig zwee Schultheisse gää, der «alt Schultheiss» un dr »nöi Schultheiss», all Joor het s Amt vom einte zum andere gwächslet; meischtens sind das Basler Stadtbürger gsi, sid em 17. Joorhundert isch der eint e Bürger vo Lieschtel gsi. Dr Basler Root het d Lüüt für das Amt bestimmt.

Mit der zäntralistische helvetische Staatsverfassig vo anno 1798 isch d Amt vom stedtische Schultheiss verschwunde. D Stadt Lieschtel isch e Teil worde vom «Dischtrikt Lieschtel», und däm syn nöi Vorsteher isch dr Unterstatthalter oder Dischtriktstatthalter gsi. I de Ortschafte so wie au z Lieschtel het en «Agänt» für d Amtsgschäft vo der «Munizipaliteet», wie d Ywoonergmeind sit 1799 gheisse het, glueget. Für gewüssi Gschäft isch drnäbe d «Gmeindikammere» zueständig gsi, wo spöter drus d Bürgergmeind worden isch. Das isch so ggange bis 1803, wo me unter der nöie schwiizerische Mediazionsverfassig d Munizipaliteet ufghobe und drfür dr Gmeindiroot ygfüert het, wo vo de Bürger gweelt woren isch. D Kantonsregierig z Basel het drno eine vo de Gmeindrööt zum Presidänt gweelt.

Im 19. Joorhundert, wo Lieschtel em anno 1832/1833 nöi bildete Landkanton sini Hauptstadt worden isch, und bis id Mitti vom 20. Joorhundert het s Amt vom Stadtvorsteher Gmeindpresidänt gheisse und es isch numen e Teilzytstell gsi. Sid 1963 heisst s Amt Stadtpresidänt und es isch als Vollamt usgstattet gsi, öppe 1990 het mes aber wider uf füfzg Prozänt reduziert. D Hauptufgab isch d Füerig vom Stadtroot, wo d Exekutive vo dr Stadt isch.

d Lüüt

• Niklaus Brodbeck (1740–1816), der letscht Schultheiss vo Lieschtel, vo 1791 bis 1798
• Johann Jakob Plattner, Vorsteher vo der Munizipalität Lieschtel, vo 1798 bis …
• …
• Wilhelm Hoch (1750–1826), Gmeindpresidänt vo 1808 bis 1811
• …
• Johann Jakob Brüderlin (1780–1838), Gmeindpresidänt vo 1825 bis 1828
• Johann Jakob Holinger (1785–1863), Gmeindpresidänt i dr Zyt, wo dr Kanton Baselland entstanden isch
• …
• Heinrich Brodbeck (1811–1886), Gmeindpresidänt vo ? bis 1863
• Johann Eduard Holinger (1825–1895), Gmeindpresidänt vo 1863 bis 1875
• Johann Jakob Stutz (1842–1913), Gmeindpresidänt vo 1875 bis 1908
• César Erb (1857–1931), Gmeindpresidänt vo 1908 bis 1917
• Oscar Stutz (1879–1960), Gmeindpresidänt vo 1917 bis 1923
• Heinrich Gysin (1848–1927), Gmeindpresidänt vo 1923 bis 1924
• Paul Brodbeck (1890–1959), Gmeindpresidänt vo 1924 bis 1959
• Ernst Mangold (1901–?), Gmeindpresidänt vo 1959 bis 1963
• Fritz Dettwiler (1911–1999), Stadtpresidänt vo 1963 bis 1975
• Hans Brodbeck (1920–1994), Stadtpresidänt vo 1976 bis 1987
• Jürg Wüthrich (1940–2016), Stadtpresidänt vo 1987 bis 1996
• Marc Lüthi (* 1953), Stadtpresidänt vo 1996 bis 2004
• Regula Gysin (* 1944), Stadtpresidäntin vo 2004 bis 2012
• Lukas Ott (* 1966), Stadtpresidänt vo 2012 bis 2018
• Daniel Spinnler (* 1976), Stadtpresidänt sid 2018