St. Catharines

Us der alemannische Wikipedia, der freie Dialäkt-Enzyklopedy
St. Catharines
St. Catharines (Kanada)
St. Catharines (Kanada)
St. Catharines
St. Catharines
St. Catharines
Koordinate 43° 11′ N, 79° 14′ WKoordinate: 43° 11′ N, 79° 14′ W
Symbole
Wappe
Wappe
Wappe
Basisdate
Staat Kanada

Provinz

Ontario
Höchi 97,8 m
Flechi 96,1 km²
Iiwooner 131.989 (2006)
Dichti 1.373,3 Ew./km²
Poschtleitzahl L2M-L2W, L0S
Website www.stcatharines.ca
Politik
Burgermeischter Brian McMullan
d St. Paul Street, s Zentrum vum historische Downtown
d St. Paul Street, s Zentrum vum historische Downtown
d St. Paul Street, s Zentrum vum historische Downtown

St. Catharines (IPA: [ˌseɪ̯nt̚ˈkæθəɹɪns]) isch e Stadt z Kanada i dr Provinz Ontario. S isch d gröschti Stadt vum Niagarakreis un het (2006) chnapp 132.000 Ywohner; in dr Agglomeration läbe über 390.000 Mänsche. D Stadt leit am nördliche Ygang zum Welland Canal un am südliche Ufer vum Ontariosee aa einer vo de Hauptvercheersaggse zwüsche dr us-amerikanische Gränz wo numme 19 km entfernt isch, un Toronto wo 51 km nördlich leit.

Zwei grössri Hochschuele, d Brock Universität un s Niagara College sin z St.Catharines beheimatet.

Dr offiziele Spitznamme vo dr Stadt isch ufgrund vo de 4 km² vo öffentlichi Gärte un Parks „d Gartestadt“ (Garden City). Vo de Yheimische wird St. Catharines umgangssprochlich St. Kitts gnannt. Dr Mohawk-namme vo dr Stadt isch Teiotenonhsà:kton.

Geografi un Klima[ändere | Quälltäxt bearbeite]

Wyräbe im Süde vo dr Stadt

St. Catharines leit im Zentrum vo dr Niagara Halbinsel im üsserschte Süde vo Ontario. D Nochbarstädt sin Thorold, Niagara-on-the-Lake, Niagara Falls, Fort Erie, Welland, Pelham, Lincoln, Grimsby un Hamilton. Toronto isch uugfähr 100 km (51 km Luftlinie) vo St.Catharines eweg.

St. Catharines un Thorold lönn direkt näbenander un zwüsche de Lüt us St.Catharines un Thorold bstoht e gwüssi Animosität. D Bwohner vo Thorold befürchte vorallem irgetwenn uf St. Catharines ygmeidet z werre. Zum Teil wege dem isch Thorold 1975 als Stadt annerkannt worre, wird aber trotzdäm vo Fremdi oft numme als Vorort oder Stadtteil vo St. Catharines aagsehe.

D Umgebig het e einzigartigs Mikroklima wo uf d Nöchi zu zwee vo de Grossi See, em Ontariosee un em Eriesee, un uf de Niagarabhang zruggzfüere isch wo für e gmässigts Klima sorge. Dr Winter sin verglychswys mild, mitenere Durchschnittstermperatur vo -4C im Januar un d Sommer warm un feucht mit 22C im Juli[1] (zum Verglych het Montreal Durchschnittstemperature vo -10C un 21C). S warmi Wätter un dr Bode wo durch Gletschersediment prägt isch sin bsunders guet für s Aapflanze vo Obscht geeignet. D Niagara Halbinsel isch deswäge au für ihre Wy berüemt. Au Ahornsirup wird im Früelig gsammelt.

Dr Short Hills Provincial Park leit im Südweschte vo dr Stadt.

Dr Welland Kanal markiert d öschtlichi Gränz vo dr Stadt un isch dr neuscht vo insgsamt viir Kanäl. Spure vo de früeneri Kanäl wo zuegschütet worre sin sin hüt no z finde un zum Deil in öffentlichi Parks umgwandelt worre.

Gschicht[ändere | Quälltäxt bearbeite]

St. Catharines isch um 1780 vo amerikanischi Loyalischte gründet worre. D'erschti Siidler sin zwee früheri Soldate gsi wo sich dört agsiidelt hen wo sich zwee Bäch, Dick’s Creek un Twelve Mile Creek, chrüüzt hen. Als Strosse sin alti Indianerpfäd bnutzt worre wo hüt no d'Grundlag vum Strossesüschtem bilde. Vorher isch d'Gegend vo dä Irokese bsiidelt gsi. S'erschti Gschäft isch 1783 vum Robert Hamilton ufgmacht worre; 1786 isch Crown Mills, d'erschti Mühli, ufgmacht worre. Zwüsche 1787 un 1879 isch s'Land vermesse un verteilt worre. Zu derre Zit isch d'chlyni Siidlig als The Twelve bekannt gsi. 1797 isch d'erschti Beiz ufgmacht worre un het sich zumene örtlichi Treffpunkt un Chutschestation entwiggelt; 1798 isch dr Ort sogar noochem Bsitzer vo dr Beiz, Paul Shipman, i Shipman’s Corner umbnannt worre. D'zentrali Stross vo St. Catharines, St. Paul Street isch ebefalls nooch ihm bnannt.

Im Chrieg vo 1812 isch St. Catharines zwar nüt aagrife worre aber d'Laura Secord isch durchglofe um d'Brite voreme amerikanischi Aagriff z'warne. 1808 isch d'Bezeichnig St. Catharines zum erschti Mol ufenere Charte uftaucht; d'Stadt isch nooch dr Frau vum Robert Hamilton, dr Catharine Hamilton, bnannt. 1817 isch e Poschtamt mit dr Bezeichnig St. Catherines ufgmacht worre, aber dä Rächtschrybfehler het sich nüt durchgsetzt un d'Stadt heisst syt 1821 St. Catharines. 1876 isch St. Catharines als Stadt annerchannt worre.

Durch de Bau vum erschte Welland Chanal zwüsche 1824 un 1833 isch St. Catharines zum komerzielle un induschtrielle Zentrum vo dr Niagara Halbinsel worre.

Virtel[ändere | Quälltäxt bearbeite]

St. Catharines bstoht us de folgendi Gmeine, wobi d'“Gmeine” kei adminischtravi Funktion erfülle sundern numme durch d'Identität vo ihri Bwohner bstöhn. Öber d'Hälfti vur Stadt het so e Identität nüt.

d'Stadtteil vo St. Catharines
  • Barbican Heights
  • Burleigh Hill
  • Facer
  • Glenridge
  • Martindale
  • Merritton
  • Michigan Beach
  • The North End
  • Port Dalhousie
  • Port Weller
  • Power Glen
  • Rockway
  • Downtown St. Catharines
  • Secord Woods
  • St.George’s Point
  • Vansickle
  • Western Hill

Vo denne unterscheide sich vor allem Merriton, Port Dalhousie, Glenridge, un d'”Stadt” (Downtown) vum Rescht vur Stadt:

  • Merritton wird vo syni Bwohner mangmol als s'”Härz vo St. Catharines” gnannt. Allerdings isch dr Stadtteil e weng e schäbigs Plätzli vo St. Catharines un gilt als gfährlich. D'Ywohner vo Merritton gränze sich gern vum Rescht vo dr Stadt ab; dr Stadtteil het so zum Byschpiil au e eignes Denkmol für syni Chriegsgfalleni. Atraktione z'Merritton sin dr Welland Chanal un dr Merritton Tunnel (wo's aageblich spuukt). Usserdem het d'Houptstross vo Merritton e paar ältri Gschäft. Merritton isch früeher wie au Port Dalhousie e eigeständiger Ort gsi wo vo St. Catharines ygmeidet worre isch.
  • Port Dalhousie isch dr nördlichschti Stadtteil un leit direkt am Ontariosee. Dr Ort isch für syn historischs Virtel bekannt. Dr Strand vo Port Dalhousie isch im Summer e bliebts Usflugziil. Z'Port Dalhousie isch d'Mündig vo de drüü erschti Welland Chanäl gsi. Zur Zit wird plant e komerzielles Virtel z'Port Dalhousie z'baue. Dr erschti Vorschlag, e 30 Stock hohs Gebäude z'baue, het wege Protescht vo dr Bvölkrig müesse ufgä werre. Jetz wird vorgschlage e numme 17 Stock hohs Wohnhuus z'baue, e Hotel, e Theater un no meh Gschäft. Au vo dem Vorschlag sin d'Yheimische nüt bsunders begeischtert gsi un hen e Aktion gschtartet au dä Plan scheitre z'lo.
  • Glenridge gilt als de Stadtteil, wo am suuberschte un pflegteschte isch. Glenridge goht vum Zentrum vur Stadt bis zum Niagarabuckel. Durch d'Nähi zur Brock Universität wohne viili Studente am End vum Virtel. In de letschti Johr bechlage sich d'Yheimische deswege über e Überbevölkrig durch Studente.
  • Downtown, s'Zentrum vur Stadt, wird durch d'Strosse St. Paul Street, Geneva Street, Niagara Street, Welland Avenue un d'Autobahn begränzt. Downtown isch dr älteschti Teil vo St. Catharines. Dr Platz isch ursprünglich do gsi, wo e Irokesepfad de Twelve Mile Creek Bach überquert het. D'alti Irokesepfäd bstöhn hüt no in dr Form vo dr St. Paul Street; eini vo de ganz wenigi churvigi Houptstrosse vo Nordamerika. Durch d'relativ langi Gschicht het s'Zentrum vo St. Catharines mehreri Hüüser vo historischer Bedütig. D'Eröffnig vo Ychaufszentre het zum Verfall vo Downtown gführt un viili Gschäft hen zuegmacht gha. Hüt het's allerdings wiider über 120 Gschäft un 50 Reschtaurants. Usserdem isch dr einzigi Markt vo dr Stadt in Downtown. Trotzdem sehne viili Hüüser vo Downtown vor allem vo hinte immer no zimli schäbig us. D'zahlrychi Beize sin e bliebts Usfluegziil vo Studente un yheimischi Jugendliche. Im April 2006 isch vo dr Stadtverwaltig bschlosse worre, dass s'Zentrum kei Eibahnstross meh isch. Die Entscheidig soll Problem mitem Parke löse un d'Gschäft neu beläbe.

D'Gmeine im Süede vo St. Catharines sin in letschter Zit rasant gwaggse, vor allem d'Gmeine Vansickle un Martindale.

Politik[ändere | Quälltäxt bearbeite]

Wappe[ändere | Quälltäxt bearbeite]

St. Catharines het epaar offizieli Symbol: e Wappe, e Fahn, e Logo un e offiziels Bliemli.

S Wappe zeigt obe e Imbeschwarm, was für d Tüchtigkeit vo de Ywohner stoot. In de Mitti sin vier Chäschtli. Obe links un unte rächts wysi, wo e Schiff zeige, obe rächts e blaus Fäld mit eme wyse Füllhorn, un unte links e blaus Fäld mit eme wyse Mühlstei. S Füllhorn stoot für s rychi Ackerland, un de Mühlstei für d Mühle, wo zur Gründerzit verbreitet gsi sin. Ganz unte isch s Moto vo de Stadt Industry and Liberality. Es isch im Alltag vum Logo ersetzt worde[2].

S Logo isch 1972 entworfe worde. E zeigt uff eme wyse Grund e blau-wysi Zig-Zack Linie, wo für d vier Welland Kanäl stönn, un e griene Pfiil, wo für s Ackerland stoot.

D Fahn isch e grien-wys-grieni Trikolore, mit em Wappe im wyse Fäld. S Grien stoot für s fruchtbari Ackerland.

S Stadtbliemli isch d Chrysanthemen.

Stadtverwaltig[ändere | Quälltäxt bearbeite]

d seggs Wards vo de Stadt

D Verwaltigsstruktur vo St. Catharines isch die vumene Council-Manager Government. Des heisst, dass für d Legislative e gwäälte Root verantwortlig isch, di täägliche Regierigsgschäft un Umsetzig vo de Gsetzt aber vumene Chief Administrative Officer wargno werde. De wird vum Root ernannt, un isch also de mächtigscht Aagstellte vo de Verwaltig. De Root bestoot uss zwölf Mitgliider, je zwei für eine vo de seggs Wards, de Waalchreis vo de Stadt. D Wards sin Merritton, St. Andrew’s, St. George’s, St. Patrick’s, Grantham un Port Dalhousie.

De Bürgermeischter wird vo de Gsamtbevölcherig gwäält. Er het vorallem d Roll vum Vorsitzende vo de Rootsitzige. D Rööt nääme ihri Uffgabe numme Teilzit waar, was für e Stadt vo de gröössi vo St. Catharines änder e Ussnaam isch. Numme de Bürgermeischter het e Vollzitposition. D Rootsitzige finde öffentlich statt.

D Waale zum Root sin im Oktober (syt 2009) oder November. Bis 2006 sin alli drüü Joor Waale gsi. Syt däm isch d Amtsperiode vier Joor. D näägschti Waal isch im Oktober 2014.

Bürgermeischter vo St. Catharines:

Amtszit Amtsträger
? Mackenzie A. Chown
? Joe Reid
? Roy Adams
? Joe McCaffery
1997–2006 Tim Rigby
2006– Brian McMullan[3]

Verträtig in de Region, de Provinz un im Bund[ändere | Quälltäxt bearbeite]

St. Catharines wird im Regionalroot vo de Niagara Region vo seggs Rööt repräsentiert. E Bsunderheit vo de Niagara Region isch, dass d Regionalrööt nit glychzitig imene Stadtroot sitze. St. Catharines het eis vo de niidrigschti Bürger/Representante-Verhältnis vo ganz Ontario. Uff ei Repräsentant chömme numme 7.000 Lüt. Zum Verglych het d Stadt Oshawa, wo öbe glych gross isch, e Verhältnis vo eim Repräsentant für 13.500 Lüt un e Grossstadt wie Toronto sogar vo 55.000 Lüt. Plän vonere Reform vum Stadt – un Regionalroot lehnt dr Root ab.

St. Catharines wird bi Provinz- un Bundeswaale vo zwee Wahlchreis repräsentiert. E Grossdeil vo de Stadt ghört zum Wahlchreis St. Catharines, chlyni Stugg am Südrand vo dr Stadt au zum Wahlchreis Welland.

Uff de Provinzebeni werde z St. Catharines vilmool politisch sehr aktivi Verträter gwäält. Zur Zit isch es de Jim Bradley vo de Liberale, wo de Provinz-Waalchreis St. Catharines repräsentiert. De Waalchreis Welland wird vum Peter Kormos, vo de NDP repräsentiert.

Uff de Bundesebeni wird de Waalchreis St. Catharines syt 2006 vum Konservative Rick Dykstra repräsentiert. De Süde vo de Stadt wird als Deil vum Waalchreis Welland vum Malcolm Allen, vo de NDP repräsentiert.

Problem vo de Stadt[ändere | Quälltäxt bearbeite]

D Stadt St. Catharines het mit mehreri soziali un wirtschaftlichi Problem z kämpfe, wo mit em Niidergang vo de Industri zämmehänge. Mit enere Arbetlosigkeit vo 10,8 % (Stand Dez. 2009)[4] isch St. Catharines über em nationale Durchschnitt vo 8,5 % (Stand Dez. 2009)[5].

E wytres Problem sin wildi Müllablagerige, wo sich zitewys sogar im Stadtzentrum ufftürmt hen. Wäge de vile wilde Mülldeponie un Vandalismus isch St. Catharines im Joor 2005 vo de zweitgröösti Tagezitig vo Kanada, de „Globe and Mail“ als Garbage City bezeichnet worde,[6] e Wortspiil mit em Spitzname „Garden City“. So isch au kommentiert worde dass „di sicherschte Jobs in de Stadt sin die vo Droge-Dealer, Prostituierte un de Horde vo Sozialarbeiter wo versueche ihne z helfe“[7].

Usserdäm isch St. Catharines eini vo de Städt mit de meischte Dicke in ganz Kanada. 2001 sin luut em kanadische Statistikbüro 57,3 % vo de Ywohner extrem Übergwichtig gsi[8]. In de Medie isch d Stadt wäge däm zum Deil als „di fetteschti Stadt vo Kanada“ beschrybe worde[8][9][10][11]. Im Joor 2008 isch de Prozentsatz uff 69,3 % aagstige gsi. Wyl d Fettleibigkeit in andri Städt no mee gstiige isch (Hamilton mit 74,3 %, Kingston mit 70,1 % un St. John’s mit 70 %), isch St. Catharines inzwüsche nümmi uff Platz eis.[12]

Partnerschafte[ändere | Quälltäxt bearbeite]

St. Catharines het ei Partnerstadt, Port of Spain z Trinidad un Tabago. Die Partnerschaft bestoot syt Oktober 1968[13].

Verchehr[ändere | Quälltäxt bearbeite]

St. Catharines het e öffentlichs Verchehrsüschtem, wo Buslinie in dr ganzi Stadt un in dr Nochbarstadt Thorold betrybt. S'verchehre 24 Buslinie dagsüber un z'Obig un em Wucheend 16i. Usserdem fahre vo dr Brock-Universität us Büs in d'Nochbarstädt Welland un Niagara Falls. Ywohner vo mangi Stadtteil bschwere sich allerdings über schlechti Aschlüss a s'Busnetz. Usserdem sin mangi Büs üsserscht alt un nümm im beschte Zustand. Dr Busterminal stoht in dr Stadtmitti; vo dört us fahre usser de Stadtbüs au Greyhound- un Coach Canada-Büs uf Toronto, New York un Städt in dr Umgebig.

St. Catharines het au e Bahnhof vo de chanadischi Ysebahngsellschafte VIA Rail un Amtrak. Züg fahre uf Toronto un New York Stadt.

D'wichtigschti Strosse zu un vo St. Catharines eweg sin d'Autobahne Queen Elizabeth Way (vo Oschte nooch Weschte) un Highway 406 (vo Norde nooch Süde).

St. Catharines isch d'erschti Stadt uf dr Wält gsi mitenere Elektrischi Tram. D'Linie isch z'erscht zwüsche dr Stadt un em Stadtteil Merritton gfahre un spöter au uf Port Dalhousie un Thorold. S'Trämli isch in de 60er stillgleit wore un d'Linie in Pfäd un Parks umgwandelt worre.

Bevölcherig[ändere | Quälltäxt bearbeite]

Bi de kanadischi Volchszäälig vo 2006 hen 131.989 Mänsche z St. Catharines gläbt. Des isch e Waggstum vo 2,2 % im Verglych zue 2001 gsi, wo d Stadt 129.170 Ywohner gha het. S Durchschnittsalter isch 41,7 Joor gsi; des isch lycht über em kanadische Durchschnittsalter vo 39,5 Joor. S Durchschnittsykomme isch im Joor 2005 50.497 kanadischi Dollar im Joor gsi; de Provinzdurchschnitt isch im Verglych $60.455 gsi. Öbe 18 % hen en Universitätsabschluss gha, chnapp 29 % e sunschtigi post-sekundäri Ussbildig. Öbe 20 % vo de über 24-Jäärige hen kei Schuelabschluss gha[14].

St. Catharines isch primär änglischsproochig. Französisch isch au kei Amtsprooch vo de Stadtverwaltig; des isch z Ontario numme in gwüssi Gmeine mit enere grössre frankokanadische Minderheit de Fall. Numme in de Büros vo de Bundesverwaltig, wo sich in de Stadt befinde, het mer e Rächt druff, uff Französisch bedient z werde. In de Nochbarstadt Welland läbt allerdings eini vo de gröschte frankokanadische Gruppe vo ganz Ontario.

Im Joor 2006 hen 102.280 Lüt ihri Muettersprooch als Änglisch aagee. Französisch isch d Muettersprooch vo 2.975 Lüt gsi; 24.555 hen e andri Sprooch gschwätzt. Insgsamt isch Französisch vo 9.370 Lüt gschwätzt worde, also chnapp 7 %. D Ywandrer (mit kanadischem Pass) hen 27.405 ussgmacht; 7.000 sin Ussländer (kei kanadischi Staatsbürger) gsi[14]. D Sprooche vo de Ywander hen vorallem im Stadtdeil Facer e öffentlichs Profil, wo d Gschäft mangmool Schilder uff Ukrainisch oder Polnisch hen.

Di wichtigschte ethnische Abstammige vo de Bevölcherig sin nooch de Volchszäälig vo 2006 so (öbe d Hälfti hen Mehrfachantworte gee):

Abstammig [1] Aazaal %-Satz
Änglisch 40.430 31,09 %
Schottisch 28.645 22,03 %
Irisch 23.830 18,33 %
Dütsch 18.450 14,19 %
Französisch 15.120 11,63 %
Niiderländisch 9.070 6,98 %
Ukrainisch 8.570 6,59 %
Polnisch 7.605 5,85 %
Indianisch 3.585 2,76 %

Als Kanadier hen sich 29.685 bezeichnet. Was mer bi so Statistike in Kanada aber wisse muess, isch dass ethnischi Identität vilmool numme heisst, dass mer sich no errinret dass z. B. en Grossvater uss däm un däm Land cho isch.

Di verschidni Kulture un Ethnie sin s Thema vum jäärliche Folk Arts Festival, wo alli Kulturverein Veraastaltige mache. Zue de Verein wo d Bruuch vo de Ywandrer pflege ghöre zum Byspil de Club Roma (Italiener), de Club the Netherlands (Niiderländer), d Canadian Polish Society (Pole), de Club Heidelberg (Dütschi), oder de Club la Salle (Franko-Ontarier).

Mit 81 % sin d Mehrheit vo de Ywohner Chrischte. Proteschtante sin mit 42,9 % d grööschti Gruppe, deno Katholike mit 34,2% un chlynri Gruppe vo Orthodoxe un sunschtigi Freichilche. Usserdäm sin 1,5 % Muslimisch, 0,5 % Jüdisch un 0,5 % Buddhischte gsi. Die reschtlichi 16,5 % hen e andri, oder kei Religion aagee.

Wirtschaft[ändere | Quälltäxt bearbeite]

Dr wichtigschti Induschtrizweig vo St. Catharines sin Fabrike, vor allem Autofabrike; allerdings isch dä Zweig in de letschti Johr uf Choschte vum Dienschtleischtigsektor gschrumpft. Usserdem isch St. Catharines eini vo de wichtigschti Kommunikationsverbindige zwüsche Chanada un de USA.

D'Arbeitslosigkeit isch 6,5 %; s'Durchschnittsykomme $ 30.997. D'fümf gröschti Arbeitgeber sin:

  • S'Öffentlichi Schuelsyschtem vo Niagara: 5.000
  • General Motors: 3.700
  • S'Gsundheitsyschtem vo Niagara: 1.800
  • Brock Universität: 1.324
  • Sitel Corporation (e Telefonaabieter): 1.000

Kultur un Sehenswürdigkeite[ändere | Quälltäxt bearbeite]

Gschichtlichi Bauwercher un Musee[ändere | Quälltäxt bearbeite]

s Former Lincoln County Courthouse im Queen St. Heritage District

In de ältere Stadtdeil vo St. Catharines finde sich Gebäude uss de Mitti vum 19. Joorhundert un ussem Zitalter vo de Industrialisierig, wo historische Wärt hen. Durch s Downtown fiert de Heritage Corridor, wo mit Schilder alli historischi Bauwercher beschrybe sin. Bsunders uff de Yates Street un d Queen Street finde sich vili Hüüser uss de Viktorianische Era. Uff de Queen Street isch s alti Gericht vum Lincoln Country, wo 1848 noochem Vorbild vum Roothuus vo Perugia z Italie baut worde isch. Es isch e Byspil für d Georgianischi Architektur. En grosse Deil vo de Inneyrichtig isch erhalte, un hüt wird es als Konzertsaal bruucht.

D Salem Chapel vo de British Methodist Episcopal Church uff de Geneva Street, isch im Joor 1855 baut worde. D Chilch isch ursprüngli vo ehemooligi Sklave, wo uss em Süde vo de USA gflohe gsi sin, gründet worde.

S Welland House Hotel isch eis vo de wenige Hüüser uss dr Zit, wo St. Catharines e Kurort gsi isch. Hüt beherbergt s Huus e Studentewohnheim un de Radiosänder vo de Brock Universität.

Im Stadtdeil Merritton isch s alti Roothuus erhalte. Es isch 1879 baut worde un isch bis 1960 de Sitz vo de Stadtverwaltig vo Merritton gsi. In de Nööchi findet sich e Denkmool für die Bürger vo Merritton, wo als Soldate für s britischi Empire gfalle sin.

historischi Fassade z Port Dalhousie

De alti Chern vum Stadtdeil Port Dalhousie am Ontario See isch als e Heritage Conservation District deklariert. S historischi Viirtel stammt zumene grosse Deil ussem spööte 19. un friene 20. Joorhundert, un gruppiert sich um d Lakeport Road, Lock Street un Hogan's Alley. Zue de historische Bauwercher ghört zum Byspil d Port Mansion, wo 1860 baut worde isch un friener e Hotel gsi isch. Hüt befindet sich derte e Bar. Usserdäm befindet sich z Port Dalhousie eis vo de älteschte Gfängniss vo Kanada. Es isch 1845 baut worde un isch glychzitig mit unter 4 Quadratmeter[15], eis vo de chlynscht vum Land (es wird nümm als Gfängniss ygsetzt). Architektonisch sehenswärt isch au de Lüüchturm, wo aber nit zuegänglig isch. Es isch einer vo numme vier acht-eckigi Lüüchturm aa de Grosse See, un isch 1898 baut worde un bis 1988 in Betrieb gsi[16].

Syt 2004 plant e Unternääme, en grosse Deil vum Stadtchern vo Port Dalhousie abzrysse, un aa dere Stell e Hochhuus z baue. Es het am Aafang sölle 326 Fuess (öbe 100 m) hoch sy, des isch spööter uff 207 Fuess (öbe 63m) abegsetzt worde. Des Projäkt isch vo Aafang aa uff starche Wiiderstand vo de Ywohner gstoosse, wo meine, das mit däm Bau de architektonisch Charakter vo Port Dalhousie zerstört wird[17]. Im Februar 2010 isch de Bau entgültig bewilligt worde, einewäg isch no nit klar ob un wenn de Port Tower baut wird.

In mehreri Musee isch d Gschicht vo de Stadt dokumentiert. S St. Catharines Museum isch s Stadtmuseum, un lait aa einer vo de Schleuse vum Welland Kanal. Es het Usstellige über d Gschicht vo St. Catharines un em Welland Kanal. Bsuecher chönne vonere Platform uss d Schiff beobachte wo durch de Kanal dure faare.

Zum Stadtmuseum ghört au d Ontario Lacrosse Hall of Fame & Museum. Dört wird über s Lacrosse, eini vo de Nationsportarte vo Kanada, berichtet.

Am Bruce Trail befindet sich s Morningstar Mill and Mountain Mills Museum, e Mühli wo über 130 Joor alt isch. Es isch eini vo de älteschte Mühle vo Kanada un wird hüt no mit Wasserchraft aatrybe.

Grienaalage[ändere | Quälltäxt bearbeite]

D'Stadt het e umfangrychs Netzwerk vo Pfäd, mitenere Längi vo über 90 Kilometer. Zwee Pfäd vo 9 bzw. 11 km füehre am hütige un aa früheri Welland Chanäl vorbi. Usserdem führt dr Bruce Trail (dr älteschti un längschti Wanderweg vo Chanada) durch St. Catharines.

Dr Montebello Park isch 1887 vum Frederick Law Olmsted entworfe worre un ghört zum historischi Erbe vo Ontario.

Ychaufsmöglichkeite[ändere | Quälltäxt bearbeite]

s Pen Centre vo usse

Z St. Catharines befindet sich s grööschti Ychaufszentrum vo de Niagara Region, s Pen Centre. Es isch 1958 eröffnet worde un zitewys s viertgrööschti Ychaufszentrum vo Kanada gsi[18]. Es het über 180 Gschäft. D Fairview Mall isch mit 60 Gschäft s zweitgrööschti Ychaufszentrum vo de Stadt.

In de historische Stadtviertel, Downtown-St. Catharines un Port Dalhousie, finde sich chlyneri Gschäft. Downtown isch au de Märt vo St. Catharines, de Farmers' Market. Es isch eine vo de älteschte Märkt vo Ontario un goot uff s früeni 19. Joorhundert zrugg. Gnau wie vor übereme Joorhundert wird de Märkt jede Zischtig, Dunschtig un Samschtig abghalte.

Medie[ändere | Quälltäxt bearbeite]

Fümf Zitige erschyne z'St. Catharines: dr St. Catharines Standard, d' The Niagara News – St. Catharines Edition, d' Niagara This Week, dr Pulse Niagara un d' Local Sports Report. Usserdem d' Brock Press, d'Schüelerzitig vur Brock Universität.

St. Catharines het fümf verschidni Radiosänder.

St. Catharines het kei eignene Fernsehsänder, Statione us Toronto, Hamilton un Buffalo chönnet aber empfange werre. 2003 isch dr Aatrag gschtellt worre e Regionalsänder, TV Niagara z'gründe. E Sendeerlaubnis isch aber nüt erteilt worre.

Persönlichkeite us St. Catharines[ändere | Quälltäxt bearbeite]

Musiker[ändere | Quälltäxt bearbeite]

  • Dr Grossteil vo dr Band Alexisonfire chunnt us St. Catharines. Eis vo ihre Videos isch dört gfilmt worre.
  • Dr John Crossingham, dr Trommler vur Band Broken Social Scene, isch vo St. Catharines.
  • Dr Raine Maida, dr Sänger vo Our Lady Peace, het am Ridley College z'St. Catharines studiirt.
  • Dr James McCollum vo The Philosopher King un Prozzak isch ebefalls us St. Catharines.
  • Dr Walter Ostanek, e Grammy Gwinner, isch als Bueb uf St. Catharines zoge un läbt dört. Er unterhält e Musikgschäft.
  • Dr Neil Peart, dr Trommler vo Rush, isch z'Port Dalhousie ufgwaggse un eis vo syni Lieder isch vo dem Stadtteil inschpiriirt.
  • Dr Ron Sexmith, e Gwinner vum Juno Award, isch z'St. Catharines ufgwaggse.
  • D'Band The Trews hen langi Zit z'St. Catharines gläbt.

Politik[ändere | Quälltäxt bearbeite]

  • Dr Robert Stanley Welch het syn Läbelang z'St. Catharines gwohnt. Er isch vo 1977 bis 1985 dr stellvertretendi Premier vo Ontario gsi un isch mehrmols im Bundeskabinet gsi.
  • Dr Stuart Garson isch z'St. Catharines uf d'Wält cho. Er isch vo 1943-1948 Premier vo Manitoba gsi un vo 1948-1957 im Bundeskabinet gsi.

Fernsehe[ändere | Quälltäxt bearbeite]

  • D'Anna Olson, e Bäckeri un Moderatori vonere Chochshow het e Bäckerei z'Port Dalhousie.
  • Dr Dave Thomas, e Schauspiiler, isch vo St. Catharines.
  • Dr Hume Cronyn het em Ridley College studiirt.
  • D'Jennifer Hollet, e früheri Moderatorin bim chanadische Musiksänder MuchMusik, isch vo St. Catharines.
  • Dr Mike Beaver, e Schauspiiler, isch z'St. Catharines uf d'Wält cho.
  • Dr Rick Campanelli, e früehere Moderator un momentan Reporter, het aa dr Brock Universität studiirt.

Sportler[ändere | Quälltäxt bearbeite]

  • Dr Brian Bellows, e Hockeyspiiler chunt us St. Catharines.
  • Dr Gerry Cheevers, e erfolgrycher Hockeyspiiler, isch ebefalls us St. Catharines.
  • Dr Alan Eagleson, e Hockeyagent, Anwalt un Politiker, isch vo St. Catharines.
  • Dr Tim Horton, e Hockeyspiiler un Gründer vum chanadischi Bäckerei- un Chaffegschäft Tim Horton's, isch z'St. Catharines durch e Autounfall um s'Läbe cho.
  • Dr Bryan McCabe, ebefalls e Hockeyspiiler, isch us St. Catharines.
  • Dr Andrew Peters, no e Hockeyspiiler, isch ebefalls us St. Catharines.
  • Dr Dick Pound, früherer Vizepräsi vum Internationale Olympische Komitee un momentan dr Vorsitzendi vo dr World Anti-Doping Agency, isch z'St. Catharines ufgwaggse.
  • D'Buffy-Lynne Williams, e Ruedereri, wo mehreri Bronzemedalie bi de Olympischi Spiil vo 2000 gwunne het, isch us St. Catharines.

Sunschtigi[ändere | Quälltäxt bearbeite]

  • Dr Autor Richard B. Wright wohnt z'St. Catharines. Dr Wright het 2001 de Giller Prize (e Uszeichnig für englisch-sprochigi chanadischi Autore), de Trillium Book Award (e Prys, wo vo Ontario a chanadischi Autore vergä wird) un de Governor General's Award (eini vo de höggschti literarischi Uszeichnige vo Chanada) für syn Roman Clara Callan gwunne.
  • Dr Peter Gzowski, e Reporter un Schriftsteller, het am Ridley College studiirt.
  • D'Linda Evangelista, e Model, isch z'St. Catharines uf d'Wält cho un dört ufgwaggse. E Abteilig vum Chrankehuus vo St. Catharines isch nooch ihr bnannt worre.
  • D'Karla Homolka, e Seriemörderi, wo zamme mit ihrem Maa für d'Ermordig vo mehreri jungi Fraue verantwortlich gsi isch (z'St. Catharines un anderschwo), isch z'St. Catharines ufgwaggse.

Weblink (alli uf Englisch)[ändere | Quälltäxt bearbeite]

Quälle[ändere | Quälltäxt bearbeite]

  1. http://www.climate.weatheroffice.ec.gc.ca/climate_normals/results_e.html?Province=ALL&StationName=St%20Catharines&SearchType=BeginsWith&LocateBy=Province&Proximity=25&ProximityFrom=City&StationNumber=&IDType=MSC&CityName=&ParkName=&LatitudeDegrees=&LatitudeMinutes=&LongitudeDegrees=&LongitudeMinutes=&NormalsClass=A&SelNormals=&StnId=4683&
  2. http://www.stcatharines.ca/en/governin/OfficialEmblemsSymbols.asp?_mid_=9980
  3. http://www.stcatharines.ca/en/governin/resources/certified2010results.pdf
  4. http://www.stcatharines.ca/en/investin/Labour.asp
  5. http://www.statcan.gc.ca/daily-quotidien/100108/dq100108a-eng.htm
  6. https://web.archive.org/web/20051020081445/http://www.theglobeandmail.com/servlet/story/LAC.20051015.STCATHARINES15/TPStory/TPEntertainment/
  7. http://www.wc-info.com/GarbageCity.html
  8. 8,0 8,1 St. Catharines tops list of Canada's 'fattest' cities. W-Five, July 21, 2001 Archivlink (Memento vom 28. März 2007 im Internet Archive)
  9. CBC.ca, National Population Health Survey 1998, Statistics Canada
  10. CBC.ca, Obese Nation: Statistics, November 8, 2006
  11. Fattest & Fittest, St. Catharines leads the fat parade. The Globe and Mail, July 21, 2001 Archivlink (Memento vom 2. Februar 2007 im Internet Archive)
  12. Regional differences in obesity, Statistics Canada
  13. http://www.stcatharines.ca/en/governin/TwinCity.asp?_mid_=9981
  14. 14,0 14,1 http://www12.statcan.gc.ca/census-recensement/2006/dp-pd/prof/92-591/details/page.cfm?Lang=E&Geo1=CSD&Code1=3526053&Geo2=PR&Code2=35&Data=Count&SearchText=St.%20Catharines&SearchType=Begins&SearchPR=01&B1=All&GeoLevel=&GeoCode=3526053
  15. Archivierte Kopie. Archiviert vom Original am 14. April 2008; abgruefen am 12. Juli 2010.
  16. http://www.stcatharines.ca/en/experiencein/PortDalhousieInnerRangeLighthouse.asp
  17. Heritage Building in Grave Danger. Uff de Syte vo SOS- Save our Seaport. Abgruefe am 12/07/10 vo Archivierte Kopie. Archiviert vom Original am 14. April 2008; abgruefen am 12. Juli 2010.
  18. Archivierte Kopie. Archiviert vom Original am 18. Februar 2007; abgruefen am 8. Februar 2007.


Niagara Chreis
Städt: Niagara Falls · Port Colborne · St. Catharines · Thorold · Welland
Ört: Fort Erie · Grimsby · Lincoln · Niagara-on-the-Lake · Pelham
Gmeinde: Wainfleet · West Lincoln