Dr spootrömisch Wachdurm in dr Muttezer Hard
| Dialäkt: Baseldütsch |
Dr spootrömisch Wachdurm in dr Muttezer Hard isch Däil vo de Gränzbefestigunge gsi, wo d Römer um 370 uf dr lingge Site vom Rhii baut häi. Vom Durm si nume no d Fundamänt und die underste baar Laage vo de Stäimuure übrig. D Ruine isch dänggmolgschützt.
Gschicht
[ändere | Quälltäxt bearbeite]In dr zwäite Helfti vom vierte Joorhundert het dr römisch Kaiser Valentinian im Rhii und dr Donau nooch Wachdürm us Stäi lo baue, zum s Gebiet gege d Raubzüüg vo de Alamanne z verdäidige. In dr erste Helfti vom fümfte Joorhundert häi d Röömer, zämme mit iire Alliierte no die mäisti Zit d Kontrolle über d Rhiigränze gha, aber noch 450 isch die römischi Herrschaft nördlig vo de Alpe verfalle und iir Ändi isch choo, wo d Franke dr Syagrius 486/87 besigt häi. Vo de Gränzbefestigunge häi non e baar Kastell meereri Joorzäänt noch em Fall vom weströmische Kaiserdum in dr zwäite Helfti vom fümfte Joorhundert no existiert.
In dr Nöizit isch d Ruine im Joor 1751 widerentdeggt worde. Dr Mooler Emanuel Büchel het sä abzäichnet und beschriibe und sithär isch si e baar Mol undersuecht worde. 1975 het sä d Archäologie Baselland wider freigläit und denn konserwiert.
Im Kanton Baselland wäiss mä nume no vo äim andere Römerdurm us dere Zit, däm bim Stärnefäld z Birsfälde. Dä isch aber zerstöört worde, wo mä 1938 dr Auhaafe erwiteret het. Mä nimmt aa, ass zwüschen em Kastell uf em Baasler Münsterhüügel und däm vo Kaiseraugst öbbe alli anderthalb Kilometer e Wachdurm gstande isch, am ene Blatz, wo d Sicht uf die rächtsrhiinischi Site frei gsi isch und d Wachdürm flussuf und flussab sichtbar bliibe si. Gfunde het mä aber bis jetz nüt.
Kwelle
[ändere | Quälltäxt bearbeite]- Archäologie Baselland: Jahresbericht 2012 (Site cha nüme abgrüeft wärde; Suche im Webarchiv) , abgrüeft am 2. Mai 2014
Koordinate: 47° 32′ 23″ N, 7° 39′ 30″ O; CH1903: 616541 / 265480