Sergius III.

Us der alemannische Wikipedia, der freie Dialäkt-Enzyklopedy
Hops zue: Navigation, Suech

Sergius III. († 14. April 911 z Rom) isch Gegepapscht anne 898 un Papscht vum 29. Jänner 904 bis zum 14. April 911 gsii.

Historische Hintergrund[ändere | Quälltäxt bearbeite]

S Papschttum isch im 10. Johrhundert zum Spilball vu italienischer – vor allem remische – Adelsfamilie wore, wu dr Stuel Petri entwäder mit eme aigene Familiemitglid hän welle bsetze oder sy Inhaber zmindescht fir di aige Bolitik hän welle yyspanne. Zue dr wichtigschte Konkurränten um d Macht z Italie hän d Herzeg vu Spoleto, d Markgrofe vu Friaul un d Grofe vu Tusculum ghert.

Dr Sergius isch villicht us em Huus Tusculum chuu un het zue dr wichtigschte Unterstitzter vum mit sällem verbindete Huus Spoleto. Acht Johr vor sy Pontifikat aagfange het, isch dr Stryt zwische dr Aahänger vum friejere Papscht Formosus – wu dr oschtfränkisch Chenig Arnulf vu Kärnten as Chenig vu Italie favorisiert ghaa het – un em Papscht Stephan VI., wie dr Sergius e Barteigänger vu dr Herzeg vu Spoleto, in dr sognännte Lyychesynod eskaliert.

Wahl zum Papscht[ändere | Quälltäxt bearbeite]

Wel s Bild vum Sergius III. in dr Hauptsach vum chaiserdreie Gschichtsschryber Liutprand vu Cremona iberliferet isch, leen sich historischi Wohret un Propaganda in dr Uussagen iber ihn nume schwär ussenanderhebe. Noch em Zygnis vum Liutprand isch dr Sergius urspringli Bischof vu Caere gsii. Anne 898 het en d Bartei vu dr Formosus-Gegener uf Bedrybe vum Herzog Alberich vu Spoleto as Gegepapscht zum Johannes IX. yygsetzt. D Formosianer hätte ne aber verdribe. Noch em Sturz vum Papscht Christophorus isch dr Sergius derno in Iberyystimmig mit em kanonische Rächt zum Papscht gwehlt wore.

Pontifikat[ändere | Quälltäxt bearbeite]

Noch em Liutprand vu Cremona het dr Sergius syni beede Vorgänger umbringe loo un het mit syre Mätresse Marozia ne Suhn zygt, dr speter Papscht Johannes XI.[1] Derwylscht e Dail Hischtoriker die Bricht as Propaganda gege d Hyyser Spoleto un Tusculum aaluege, halten anderi si duruus fir glaubwirdig. Vor allem ass dr Sergius d Bschliss vu dr Lyychesynod vu 897 wider in Chraft gsetzt ghaa het un d Aahänger vum Formosus verfolge loo het, wirft e arg uuginschtig Liecht uf en. Mit em Pontifikat vum Sergius het d Period vu dr sognännte „Pornokrati“, dr Mätresseherrschaft aagfange.

Ind Amtszyt vum Sergius isch au dr Widerufböu vu dr anne 897 dur e Ärdbidem zersterte Lateranbasilika gheit.

Konflikt mit dr Oschtchilche[ändere | Quälltäxt bearbeite]

Mit dr Orthodoxe Chilche isch er in Konflikt grote, wel dr in dr sognännt „Tetragamiestryt“ yygriffe het: Dr Patriarch vu Konstantinopel, dr Nikolaos I. Mystikos, het dr byzantinisch Chaiser Leo VI. baant ghaa, wel dää gege s Chilcherächt e vierti Eh yygangen gsii isch. Dr Sergius het em Chaiser dergege ne päpschtiligi Dispens derfir erdailt. Die Aktion het uf aire Syte kai große Yyfluss ghaa uf d Haltig vu dr Oschtchilche oder vum byzantinische Chaiser , het uf dr andre Syten aber d Beziehige zwische dr latynischen un dr griechische Chilche verschlächteret. Dr Patriarch het speter an ere Intrige gege dr Leo VI. mitgmacht un isch wäge däm fir fimf Johr in s Chloschter Galakrenai bi Chalkedon verbaant wore.

Literatur[ändere | Quälltäxt bearbeite]

  • Josef Gelmi: Die Päpste in Lebensbildern. Weltbild, Augsburg 2002, ISBN 3-8289-0547-1.
  • Hans Kühner: Lexikon der Päpste. Kirchengeschichte – Weltgeschichte – Zeitgeschichte, von Petrus bis heute. Aktualisierte Lizenzausgabe. Classen, Zürich 1977, ISBN 3-925037-59-4.
  • Karlheinz Deschner: Kriminalgeschichte des Christentums. 5. Band: 9. und 10. Jahrhundert. Von Ludwig dem Frommen (814) bis zum Tode Ottos III. (1002). Rowohlt, Reinbek 1997, ISBN 3-498-01304-1.
  • Rudolf Schieffer: Sergius III. In: Lexikon des Mittelalters. Band 7. (1995) Sp. 1787.
  • Bruno W. Häuptli: Sergius III. In: Biographisch-Bibliographisches Kirchenlexikon (BBKL). Band 22, Nordhausen 2003, ISBN 3-88309-133-2, Sp. 1255–1258.

Fueßnote[ändere | Quälltäxt bearbeite]

  1. Peter de Rosa: Päpstliche Pornokratie

Weblink[ändere | Quälltäxt bearbeite]

 Commons: Sergius III. – Sammlig vo Multimediadateie


Information icon.svg Dä Artikel basiert uff ere fräie Übersetzig vu dere Version vum Artikel „Sergius_III.“ vu de dütsche Wikipedia.

E Liste vu de Autore un Versione isch do z finde.