Schwyzerlüt (Zeitschrift)

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
Dialäkt: Züritüütsch

D Schwyzerlüt (äigetli Schwyzerlüt. Zytschrift für üsi schwyzerische Mundarte und ab 1950 Schwyzerlüt. Schriftereihe für üses Schwyzerdütsch) isch es Heftli gsi, wo häd wele di schwiizertüütsche Dialäkt pflege. S isch vom Gotthold Otto Schmid 1939 z Friburg gründet und usegee worde. Di letschti Nummere isch im 1973i trukt worde.

D Schwyzerlüt sind uf Dialäkt gschribe gsi. Si händ über d Mundarte prichted, aber au vil Gschichte und Gedicht vo ziitgenössische Autore abtrukt. Au en Täil vo de Inseränte häd uf Mundart gschribe. De Schmid häd mit de Schwyzerlüt wele di alemanischi Literatur verbräite und eso d Mueterspraach vo de Tüütschschwiizer stärche. Vor allem i de eerschte Jaar isch es au wichtig gsi, de Schwiizergäischt (dozmol het me au öppe Landigäischt gseit) z pflege und de Zämehalt vo de Landestäil z fördere. D Schwiiz söll starch wärde, wämer s typisch schwiizerische, also i dem Fall d Mundart stärchi.

S Heftli isch vier bis sächs Mal im Jaar i Doppel- und Drüfach-Nummere usecho. Mängisch sind das Theme-Nummere gsi zu äim beschtimte Dialäkt oder au zu äim Autoor oder ere Autoorin. Under vilne andere, händ öppe de Ruedolf Hägni, de Traugott Meyer, de Traugott Vogel, d Sophie Haemmerli-Marti oder de Karl Grunder Tegscht i de Schwyzerlüt abtruke chöne. Wärtvoll sind au d Uufsetz vo Lüüt, wo d Spraachsituazioon i de Kantöön kännt händ, über d Literatur vo irere Regioon. So findt me i dene Heft vil Kwälematerial zu dr Schwiizerdütsche Literaturgschicht.

Weblink[ändere | Quälltäxt bearbeite]