Zum Inhalt springen

Schloss Umkirch

Us der alemannische Wikipedia, der freie Dialäkt-Enzyklopedy
s Schloss Umkilch

S Schloss Umkirch, au Hohenzollernschloss oder Königlich Rumänisches Schloss gnännt, isch e Schloss vu dr schwebischen Hohenzollern z Umkirch im Landchrais Brysgau-Hochschwarzwald z Bade-Wirttebärg.

Gschicht

[ändere | Quälltäxt bearbeite]
Dr rumänisch Chenig Karl I. uf em Schlossguet Umkirch

Im 14. Johrhundert isch an dr Stell vum hitige Schloss d Wasserburg vu dr Herre Geben. Unter dr verschidene Adelsgschlächter, wu im Mittelalter ihre Sitz z Umkirch ghaa hän, wären au d Herre vu Dibenga vermuetet, wu anne 1474 im Schloss hän solle gläbt haa. Mitglider vu dr Familie Roggenbach un Beroldingen isch s glunge, ihre Bsitz z vergreßere, voreb dää 1740 an s Majorat vu dr Kageneck ibergangen isch.[1] Wu anne 1743 s alt Schloss abgrisse woren isch, isch dr Mitteldail nei böue wore,[2] zwische 1788 und 1789 derno di beede Sytefligel.[2]

Anne 1785 isch dr Bsitz in en Allod fir d Flora vu Kageneck (1779–1857) umgwandlet wore.[1] Si isch e Dochter vum Friedrich vu Kageneck un dr Maria Theresia von Salm-Reifferscheidt gsii un e Kusyne zum eschtrychische Staatsmann Metternich.[3] D Flora vu Kageneck het am 20. Juni 1798 dr Grof Eugen vu Wrbna ghyrote.[3] 1816/17 isch s Schloss unter ihre im italienische Landhuusstil uusböue[4] un s Belvedere ufgsetzt wore.[2] Im Gibel het s hite no s Woobe vu dr Kageneck-Wrbna.[5]

Anne 1827 isch s Schloss vu dr Großherzogi Stéphanie vu Bade fir 345.000 Gulde gchauft wore. S Gebei het in dr Monet Juli un Augschte as Summerresidänz dient. D Großherzogi het im Erbverdrag vum 29. Juni 1860 verfiegt, ass ihri Dochter, d Brinzässi Josephine vu Bade s Schlossguet het solle iberchuu. D Brinzässi isch d Frau vum Karl Anton vu Hauezollre gsii. D Josephine het am 3. Mai 1887 Umkirch zum Stammguet gmacht, des haißt zum Vermege, wu nit het derfe verchauft wäre. Dr Bsitz isch am 19. Juni 1900 an ihre Suhn Karl chuu, wu rumänische Chenig gsii isch. Dr Chenig isch anne 1914 gstorbe. S Schloss isch derno Ändi 1916 an dr Firscht Friedrich Victor vu Hauezollre-Simmerenga gange, wu s as Summerresidänz bruucht het. Dr Aafang vum Erschte Wältchrieg het d Vererbig verzegeret ghaa.

Näb em Friedrich Wilhelm vu Hauezollre (1924–2010) isch im Schloss 1943 di beede Brinze Ferfried vu Hauezollre und Leopold vu Bayern uf d Wält chuu.

Im Zweete Wältchrieg, vu Septämber 1944 bis April 1945, isch di firschtli Familie zwangswys uusquartiert un uf Schloss Wilflinge interniert wore. Noch em Chrieg isch dr Side vu Bade zue dr franzesische Bsatzigszone chuu un dr General Pierre Pène het as Gouverneur fir s Land Bade im Ufdrag vu dr franzesische Bsatzigsmacht vu 1946 bis 1952 im Schloss residiert, dr Friedrich Wilhelm het dailwys im Landhuus-Schlessli vu syre Schweschter näbedra gwohnt.[2]

Noch em Dod vum Friedrich Victor anne 1965 het sy Suhn Friedrich Wilhelm s Schlossguet iberchuu, wu hit no dr schwebische Hauezollre ghert. Bsitzer isch syter anne 2010 dr Karl Friedrich vu Hauezollre.

Parkaalage

[ändere | Quälltäxt bearbeite]
s Schloss Umkirch im Park
dr Schlosspark z Umkirch

Dr Fürstlich-Hohenzollern'sche Schlosspark Umkirch, wu zum Schloss ghert, isch e rund elf Hektar große Landschaftspark. Im Side vum Schlosspark git s no ne andere Park, wu zruggoht uf e Schänkig vun eme uugfehr acht Hektar große Grundstuck vum Friedrich vu Hauezollre an d Brinzässi Auguste Viktoria vu Hauezollre. Si isch d Frau vum letschte Chenig vu Portugal, em Manuel II. Si het dert e neobarock Landhuus böue loo[6] un het s Fulwell-Park gnännt, no ihrem Exilsitz Fulwell im London Borough of Richmond upon Thames.[2]

Noch em Dod vu dr Auguste Viktoria isch Fulwell-Park retuur an dr Friedrich Wilhelm vu Hauezollre gange, wu dr Park un s Schloss verchauft het. Di in dr Zwoschezyt au rund elf Hektar groß Aalag wird hit Queen-Auguste-Victoria-Park gnännt.[2] Dr Park ghert syter anne 1974 em Verleger Werner Semmler un isch anne 2002 mit em Europäische Gartekultur-Schepfigsbryys uuszaichnet wore.[7]

Literatur

[ändere | Quälltäxt bearbeite]
  • Vinzenz Kremp, Josef Spinner: Umkircher Ortsgeschichte. 1984
  • Stefan Auer: Erstellung eines Parkpflegewerkes für das Schloß des Fürstenhauses Hohenzollern in Umkirch bei Freiburg. Diplomarbeit. Universität Hannover, Studiengang Landschafts- und Freiraumplanung, 2003

Fueßnote

[ändere | Quälltäxt bearbeite]
  1. ↑ 1,0 1,1 Franz Xaver Kraus: Die Kunstdenkmäler des Grossherzogthums Baden: Die Kunstdenkmäler der Amtsbezirke Breisach, Emmendingen, Ettenheim, Freiburg (Land), Neustadt, Staufen und Waldkirch (Kreis Freiburg Land), Mohr, Tübingen u. a. 1904, S. 360
  2. ↑ 2,0 2,1 2,2 2,3 2,4 2,5 Historie des Schlossgutes Umkirch, queen-auguste-victoria-park.de, abgruefen am 15. Mai 2013
  3. ↑ 3,0 3,1 Constantin von Wurzbach: Wrbna-Freudenthal, Flora Gräfin. In: Biographisches Lexikon des Kaiserthums Oesterreich.  Bd 58. Verlag L. C. Zamarski, Wien 1856–1891, S. 187 (uf Wikisource).
  4. ↑ Umkirch im Ortslexikon Baden-Württemberg Archivlink (Memento vom 4. März 2016 im Internet Archive)
  5. ↑ Kati Wortelkamp: Umkirch: Der Erbprinz kocht auch selbst, Badische Zeitung, 6. Septämber 2008, abgruefen am 15. Mai 2013
  6. ↑ Stefan Tolksdorf: Kultur: Ein Kunstwerk in Grün. Badische Zeitung, 20. August 2008, abgruefen am 15. November 2016.
  7. ↑ Auszeichnungen: Europäischer Kulturpreis für Parkschöpfer Werner Semmler. queen-auguste-victoria-park.de, abgruefen am 15. November 2016.
[ändere | Quälltäxt bearbeite]
 Commons: Schloss Umkirch – Sammlig vo Multimediadateie
Dä Artikel basiert uff ere fräie Übersetzig vu dere Version vum Artikel „Schloss_Umkirch“ vu de dütsche Wikipedia. E Liste vu de Autore un Versione isch do z finde.

Koordinate: 48° 1′ 50″ N, 7° 45′ 37″ O

Vun "https://als.wikipedia.org/w/index.php?title=Schloss_Umkirch&oldid=911843"