Schlacht bi Näfels

Us der alemannische Wikipedia, der freie Dialäkt-Enzyklopedy
Schlacht bei Näfels
Deil vo: Schwiizer Habsburgerchrieg

S Schlachtdänkmol z Näfels
Datum 9. April 1388
Ort Näfels im Kanton Glarus, Schwiiz
Usgang D Eidgenosseschaft het gwunne
Folge Habsburg het dr Zuegang zu de Alpepäss verlore.
Konfliktparteie
Habsburg:
Dr Albrecht III., Herzog vo Östriich
Die Schwiizerischi Eidgenosseschaft:

Glarus
Schwyz
Uri

Befählshaber
Donat vo Toggeburg
Hans vo Werdebärg
Truppesterki
ca. 6.000 ca. 650
Verlust
ca. 1.700 ca. 55

D Schlacht bi Näfels (Kanton Glarus/Schwiiz) hät am Dunnschtig, 9. April 1388 schtattgfunde. Sie isch di letscht Schlacht gsii im Konflikt zwüsched de Habsburger und de Eidgenosse.

Gschicht[ändere | Quälltäxt bearbeite]

Wenigi Wuche nach dr Schlacht bi Sempach sind d Eidgenosse vors öschterriichisch Schtädtli Weesen am Walesee zoge und händs bsetzt. Au d Glarner händ sich gege d Öschterriicher erhobe, wil die im Glarnerland no Recht bsässe händ. Am 11. März 1387 händ d Glarner ihres erschte eigene Landgsetz gschribe.

D Öschterriicher händ sich das nöd gfalle laa und händ im Februar 1388 d Schtadt Weese überfalle. I dr Nacht händ habsburgfründlichi Bürger öschterriichischs Chriegsvolch i d Schtadt glää. Di eidgenössischi Bsatzig isch im Schlaf überrascht und umbraacht worde (Mordnacht vo Weese).

S öschterriichische Heer vo 600 Maa zu Pferd und gege 6'000 Maa Fuessvolch, wo in Weese zämezoge gsii isch isch is Linthtal iibroche und hät am 9. April 1388 di vo nur 300 Glarner verteidigti Linie durbroche. D Öschterriicher sind druuf plündernd s Tal ufe drunge und händ Näfels, Mollis, Netstal und Glarus überfalle. D Glarner, verschtärcht dur einigi Urner und Schwyzer, wo trotz Schnee und Rege über de Pragelpass z Hilf choo sind, händ sich hinder Näfels am Rautiberg gsammlet. wo di habsburgische Hauptlüüt die chlii Schtriitmacht erblickt händ, händs ihre Truppe zämezoge, die bereits mit Plündere beschäftigt gsii sind, und händ die öppe 600 Eidgenosse aagriffe. Schtei und Felsblöck sind druuf i d Riitertruppe vo de Öschterriicher gsaust. D Glarner händ d Verwirrig bi de Finde uusgnützt und händs i d Flucht tribe; viili gfinded im Sumpf bi Weese de Tod.

Nach dr Schlacht händ beidi Parteie de Fride gsuecht, wo zerscht emal uf sibe Jahr feschtgsetzt worde isch. Bevor er abgloffe isch, isch er 1394 uf wiiteri zwänzg Jahr verlängeret worde. Habsburg hät uf alli Recht i de acht alte Orte verzichtet und hät eso de Zuegang zu de Alpepäss verlore.

hütigs Bruuchtum[ändere | Quälltäxt bearbeite]

Sitdem isch im Kanton Glarus jede erschti Dunnschtig im April en kantonale Fiirtig und es findet de Näfelser Fahrt schtatt, wo d Glarner und Glarnerinnen zu Fuess uf Näfels ziehnd und deet mit ere Fiir dr Schlacht gedenked.

Z Näfels stoot es Dänkmool wäge däm Ereignis.

Dä Artikel basiert uff ere fräie Übersetzig vum Artikel „Schlacht_bei_Näfels“ vu de dütsche Wikipedia. E Liste vu de Autore un Versione isch do z finde.