Sanhedrin

Us der alemannische Wikipedia, der freie Dialäkt-Enzyklopedy

Dr Sanhedrin oder Hoochi Root isch im Alterdum die obersti jüdischi religiösi und politischi Instanz gsi und glichzitig s oberste Gricht. D Instituzioon isch öbbe im 4. Joorhundert ufgee worde. Dr hebräisch Naame chunnt vom griechische Synhedrion (Versammlig, Root).

Dr Sanhedrin zur Zit vom Jerusalemer Tämpel[ändere | Quälltäxt bearbeite]

Die ersti historischi Erwäänig vom Sanhedrin findet mä bim Flavius Josephus. Er brichdet, wie im Joor 57 v. d. Z. dr Aulus Gabinius s Land in fümf synedria oder synodoi iidäilt het. Im Drakdat Sanhedrin im Talmud isch d Reed vom ene groosse Sanhedrin mit 71 Mitgliider und vom ene chliinere mit 23 Mitgliider. Nochdr Dradizion sige si vo Moses iiberüeft worde und e Fortsetzig vo dr Groosse Versammlig (Knesset Gedola), wo 200 v. d. Z. erwäänt wird. Die 71 Mitgliider vom Hooche Root si Briester gsi, jüdischi „Eltisti“ und Schriftgleerti. Abgsee von e baar farisäische[1] Schriftgleerte si d Mitgliider woorschinlig hauptsächlig Sadduzäer gsi, wo die mäiste von ene zu de aadlige Volksgrubbe ghöört häi. Dt Vorsitz het dr Hoochibriester gha, noch 191 v. d. Z. dr Nasi.

Dr Sanhedrin het si Sitz zerst z Jerusalem gha. No wääred dr römische Herrschaft über Judäa het d Versammlig e bedütende Iifluss und e gwüssi Autonomii gha, aber vermuetlig nüme s Rächt, über Dood und Lääbe z entschäide.

Im Nöije Testamänt chunnt d Bezäichnig Synhedrion in de Evangelie und in dr Apostelgschicht 22 Mol vor. Noch nöitestamäntliger Überliiferig het dr Hoochi Root e wichdigi Rolle bim Dood vom Jesus gspiilt. Er het zwar s Doodesurdäil nit sälber chönne vollstrecke, het dr Jesus aber mit dr Aachlaag vom ene Messiasaaspruch an dr römisch Statthalter Pontius Pilatus überstellt, won en denn zum Dood verurdäilt het.[2]

Dr Sanhedrin noch dr Zerstöörig vom Tämpel[ändere | Quälltäxt bearbeite]

Im Joor 70 isch Jerusalem samt em Tämpel vo de Römer noch eme jüdische Ufstand zerstört worde. Dr Rabbi Jochanan ben Sakkai wo no vor dr Zerstöörig us dr Stadt gflüchdet isch, het vo de Römer d Erlaubnis überchoo, dr Sitz vom Hooche Root uf Jawne z verlege und dört e jüdischi Schuel ufzdue. Wil dr Tämpel zerstört gsi isch, het e Patriarch und nid dr Hoochibriester dr Hoochi Root gläitet; und gliichzitig het die früeneri Opposizion, d Grubbe vo de Farisäer, d Füerig vo dr Versammlig übernoo.

Litratuur[ändere | Quälltäxt bearbeite]

Zum napoleonische Sanhedrin:

Weblinks[ändere | Quälltäxt bearbeite]

Fuessnote[ändere | Quälltäxt bearbeite]

  1. Jens Schröter: Jesus von Nazaret. Evangelische Verlagsanstalt, Leipzig 2006, S. 113 (ISBN 3-374-02409-2)
  2. PDF bei www.fba.uni-wuppertal.de Archivlink (Memento vom 12. Juni 2007 im Internet Archive)
Dä Artikel basiert uff ere fräie Übersetzig vum Artikel „Sanhedrin“ vu de dütsche Wikipedia. E Liste vu de Autore un Versione isch do z finde.