Jochanan ben Sakkai

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
Dr Jochanan ben Sakkai uf dr groosse Knesset-Menora

Dr Jochanan ben Sakkai (hebräisch: יוחנן בן זכאי) isch e jüdische Gleerte us dr erste Generazion vo de Tannaite gsi und het im erste Joorhundert n. d. Z. gläbt.

Dr Rabbi Jochanan ben Sakkai isch dr füerendi Tannait im 1. Joorhundert gsi und gältet as dr Gründer vom Leerhuus z Jawne und as dr Iniziator vo dr Ernöijerig vom jüdische Glaube noch dr Zerstörig vom Tämpel z Jerusalem im Jüdische Chrieg 70 n. d. Z. Dank dere Ernöijerig het die jüdischi Religion chönne überlääbe und si isch d Basis vom rabbinische Juudedum worde. Dr Jochanan ben Sakkai isch usser de Noochkomme vom Hillel dr äinzig gsi, wo dr Eereditel Rabban, unsere Leerer, dräit. Witeri Eereditel von em si Lüüchti vo Israel, mächtigi Süüle und gwaltige Hammer.

Noch rabbinische Bericht häig er sich wääred dr Belaagerig vo Jerusalem für Friide mit de Römer iigsetzt und sig denn vor dr wüetige Bevölkerig im Joor 70 us dr Stadt gflüchtet. Er häig sich drbii dood gstellt und zwäi vo sine Schüeler häigen en us dr belagerete Stadt dräit. Vom Vespasian, wo denn nonig dr Kaiser vo Rom gsi isch, häig er d Erlaubnis überchoo, z Jabne en Akademii z gründe.[1] Es isch aber mööglig, ass er z Jabne interniert gsi isch. Spööter het er z Beror Chail vor de Door vo Jabne gwoont.

Witer verzelle die rabbinische Kwelle, ass er z Jabne anderi Gleerti um sich versammlet het. Zämme häi si sich draa gmacht, d Braxis vom Judedum nöi z definiere: Forme vom Gottesdienst dehäi oder in dr Sünagoge si entwigglet worde wie dr Seder am Oobe und as Uftakt vo Pessach, zum dr Tämpelkult z ersetze. Die rabbinischi Dradizion het denn dr historisch Chärn zun ere Gründigs-Legände usgstaltet.

Jedi jüdischi Gmäind, egal öb in Judäa oder sust nöime, isch schlussändlig autonom gsi. Es git Zwiifel dra, öb d Diasporagmäinde, wo Griechisch gschwätzt häi, überhaupt mit iire Glaubensgnosse in Judäa, wo Aramäisch oder Hebräisch gschwätzt häi, häi chönne kommuniziere.


Mä isch nid sicher, öb dr Jochanan vor em Joor 70 zur Schuel vom Hillel oder sogar zu de Farisäer ghört het. Scho früe het er as Müstiker gulte. Sini fümf wichdigste Schüeler si noch de Pirqe Abot dr Elieser ben Hyrkanos, dr Jehoschua ben Chananja, dr Jose dr Briester, dr Simeon ben Nataniel und dr Eleasar ben Arach gsi.[2]

Im ganze si nume wenig vo sine Schüeler im us Jerusalem gfolgt. Es isch mööglig, ass si gege si Flucht us dr belagerete Stadt gsi si. Ass er gegen e Sonderstellig für Briester gsi isch und er nit us em davidische Gschlächt gstammt het und sälber kä Briester gsi isch, isch woorschinlig dr Grund drfür gsi, ass sich d Briester vo sim Leerhuus distanziert häi. Jabne het sich aber äinewäg zum nöije Middelpunkt vom rabbinische Juudeuum entwigglet mit em Jochanan ben Sakkai as sim gäistige Füerer. Dr Ditel Nasi het er aber nid überchoo.

Fuessnoote[ändere | Quälltäxt bearbeite]

  1. Klagelieder Rabba zu Klgl 1,5; Babylonischer Talmud Gittin 56ab; Avot de-Rabbi Nathan A 4; Avot de-Rabbi Nathan B 6.
  2. Avot 2,10.

Litratuur[ändere | Quälltäxt bearbeite]

  • Gedaljahu Alon: Jews, Judaism and the Classical World. Studies in Jewish History in the Times of the Second Temple and Talmud. Magnes Press, Jerusalem 1977.
  • Margaret Cohen: Quelques observations au sujet de la personnalité et du rôle historique de Raban Yohanan ben Zakkay. In: RHR, Bd. 187 (1975), S. 22-25.
  • Anthony J. Saldarini: Johanan ben Zakkai's Escape from Jerusalem. Origin and Development of a Rabbinic Story. In: JSJ, Bd. 6 (1975), S. 189-204.
  • Peter Schäfer: Die Flucht Johanan b. Zakkais aus Jerusalem und die Gründung des 'Lehrhauses' in Jabne. In: ANRW, Bd. 19,2 (1979), S. 43-101.
  • Stephen Wald: Johanan ben Zakkai. In: Encyclopaedia Judaica. Second Edition. Volume 11 (2007), 373-377.

Weblingg[ändere | Quälltäxt bearbeite]

  • Alexander Dubrau: Jochanan ben Zakkai, Rabban. In: Michaela Bauks, Klaus Koenen, Stefan Alkier (Hrsg.): Das wissenschaftliche Bibellexikon im Internet (WiBiLex), Stuttgart 2006 ff., Zuegriffsdatum: 29. Mai 2012.
Information icon.svg Dä Artikel basiert uff ere fräie Übersetzig vum Artikel „Jochanan_ben_Sakkai“ vu de dütsche Wikipedia. E Liste vu de Autore un Versione isch do z finde.