Robert Heck

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen

Dr Wilhelm Emil Robert Heck, wia-nr mit-em ganza Nama ghoißa hôt (* 25. April 1831 z Stuegert, wo-nr am 11. November 1889 au gschdôrba ischt), ischt a deitscher Kunschtmôler gwäa. Viele vo seine Gemälde lasset druff schliaßa, dass dr Carl Spitzweg oiner vo seine Vorbilder gwäa ischt.

Aus seim Leaba[ändere | Quälltäxt bearbeite]

Dr Robert Heck kommt am 25. April 1831 z Stuegert uff d Welt. Sei Vadder isch dr Geomeder Johann Jacob Heck ond sei Mueder d Rosine Caroline Mathilde Heck geborene Röhm. Em Neababeruaf betreibt em Robert sei Vadder noh a kloina Landwirtschaft ond hôt d Uffsicht ibr da Hobbalaufriidhof. Scho friah zeigt sich, dass sei Jonger a mordsmäßiga Begabong zom Zoichna hôt. Nôch seira Konfirmazioo macht seller Bua a Lehr zom Zemmermôler. [1]

Irgendwann während seira Ausbildong trifft dr Heck mit-em Pfarrer Gustav Werner zamma, wo z Reitlenga a Reddongshaus fir Woisakender mit-ma Babiirfabrikle ens Leaba gruafa hôt.[2] 1850 gôht dr Heck nôch Reitlenga ond wuud vom Gustav Werner zom Chef vo deam Gschäft ernannt. Drei Jôhr druff abr ibrwerfet sich dia zwoi mitnander. Drom kehrt em Herbscht 1853 dr Heck Reitlenga da Ricka ond gôht zruck en sei Geburtsstadt. Deet bsuecht’r endlich d Kunschtakademii ond nemmt Onderricht beim renomiirda Professr Heinrich Franz Gaudenz von Rustige. Dr sell hôt a guada Bezihong zom wirdabergischa Hof ond sorgt drfir, dass dr Keenich ond dr wirdabergisch Kunschtvorei emmer môl wiidr em Heck a Gemälde abkaufet. Au etliche Großkopfede vo Stuegert ond Omgebong lasset sich vo deam Môler porträdiira.

Em Jôhr 1854 kriagt dr Heck sein erschda Kunschtpreis. Der bewirkt, dass d Nôchfrôg nôch seine Bilder rasant ôôsteigt. S dauret au nemme lang, ond dr Heck ischt en dr Lag, ohne zo darba als freischaffender Kinschtler zo leaba. Viir Jôhr schbäder gôht’r uff Freiersfiaß ond heiradet am 18. Mai 1858 d Marie Therese Speidel, a Dechterle vom Schultes vo Aldasteig em Nordschwarzwald. Dui schenkt ihrem Môô em Lauf dr Zeit drei Kender: oi Mädle ond zwoi Buaba. Em Rôt vo seim Weib hôt’s dr Heck au zom Vordanka, dass’r Ausfliig machet zo ällerloi deitsche Kunschtmetropola: Dresden, Leipzig, Weimar, Eisenach, Frankfurt am Main, Darmstadt, Nirnberg ond Mincha. En schbätre Jôhr kô-nr sogar no greeßre Reisa macha: en d Provence ond ens geliibde Italia nôch Rom, Neapel ond uff d Insel Capri.

De ledschde Lebensjôhr, wo em Heck vorgennt send, bescheret-em grauße Schmerza; er leidet an-ra ooheilbara Magakranket. Zo seine ledschde Gemälde, wo-nr vor seim Dod no vollenda kôô, gheert s Bild Vater Werner[3] im Kreise seiner Kinder und Pflegebefohlenen[4] sowia d Porträäs vo de Professora Karl Josef Hefele ond Karl Georg von Wächter fir d Professora-Galerii vo dr Uni Diibenga ond schliaßlich noh s Kloschder Maulbronn, a Ufftragswerk vom Inschineer Gottlieb Daimler.

Am Martinsdag 1889 duet dr Robert Heck en seira Hoimetstadt Stuegert da ledschda Schnaufer. 58 Jôhr alt isch der Môô wôrra. Sei ledschda Ruah fendet’r uff-em Pragfriidhof; sei Grab kô-mr heit noh ôôgucka.

Nôchwirkonga[ändere | Quälltäxt bearbeite]

S berihmdeschde Bild vom Robert Heck: Empfang vo-ma nuia Pfarrers durch sei Gmoid em Schwarzwald, 1866

Em Heck sei berihmdeschdes Werk Empfang eines neuen Pfarrers durch seine Gemeinde im Schwarzwald hangt heit em Wirdabergischa Landesmuseum em Alda Schloss z Stuegert ondr dr Rubrik Legendäre Meisterwerke. Mit sellem Gemälde hôt sich s Keenigreich Wirdaberg em Jôhr 1867 uff dr Pariser Weltausstellong präsendiirt. Kauft wôrra isch des Moischderwerk vom Direktr vo dr Bridischa Oschtindien-Kompanii fir sei Villa en Sidney. Mit Middl us dr bada-wirdabergischa Todo-Loddo-Gsellschaft hôt’s wiider en sei Hoimet zruckkolt werra kenna. Greeße vo sellem Bild: 119 cm hoch ond 169 cm broid.[5]

D Kunschthischdorikere Ute Esbach hôt zom Ôlass vom Heck seim hondertschda Todesdag en Gerlenga 1989 a graußa Ausschdellong mit-ma Haufa Werk vo deam Môler ens Leaba gruafa.

A kloina Auswahl vo seine Werk[ändere | Quälltäxt bearbeite]

Quella[ändere | Quälltäxt bearbeite]

  • Gerhard Raff: Ein begnadeter, fast ganz vergessener Künstler, en dr Stuegerter Zeidong vom 11. Novembr 2014, Ausgab fir da Kreis Beblenga, S. 18
  • Lueg d Weblink

Weblink[ändere | Quälltäxt bearbeite]

Oinzlne Nôchweis ond Fuaßnoda[ändere | Quälltäxt bearbeite]

  1. Om da Kerle uff a Kunschtschuel schicka zo kenna, hôt s Geld vo seine Eltra et glanget.
  2. A baar Jôhr schbäder isch dui Eirichdong ombenannt wôrra en Bruaderhaus
  3. Der frihere Krach zwischem Heck onde m Werner hôt sich bald wiidr glegt.
  4. Dr Robert Heck selber hôt des Werk fir sei greeschts ond wichdigschts ghalda.
  5. http://www.museum-digital.de/bawue/index.php?t=objekt&oges=395