Robert Dill-Bundi
Dr Robert Dill-Bundi (* 18. Novämber 1958 z Chippis, † 16. Septämber 2024) isch e Schwyzer Radsportler gsii, wu in dr Hauptsach im Bahnradsport erfolgrych gsii isch. Är isch Olympiasiiger in dr Ainerverfolgig un Wältmaischter im Keirin gsii. Är isch dr bishär ainzig Schwyzer Bahnradsportler gsii, wu Olympiasiiger woren isch.
Biografy
[ändere | Quälltäxt bearbeite]Internazional het dr Dill-Bundi zum erschte Mol anne 1975 uf si ufmerksam, wun er bi dr zum erschte Mol uusdraite UCI-Wältmaischterschafte vu dr Juniore z Lausanne Juniorewältmaischter in dr Ainerverfolgig woren isch. Dää Erfolg het er im Johr druf widerholt. In dr Mannschaftsverfolgig het er bi dr Wältmaischterschafte 1977 un 1978 je ai Bronzemedaille gwunne. Sy greschte Erfolg het er bi dr Olympische Summerspiil 1980 z Moskau gfyyrt mit eme Siig in dr Ainerverfolgig. Fir Ufsää gsorgt het er doodmoll bsundersch mit em wältwyt erschte maßgschnyderete Rännaazug in eaim Stuck un mit eme aerodynamisch gformte Fahrradhelm, wun er si vun eme tschechische Fahrer uusglehnt ghaa het. No sym Olympiasiig isch er zum Schwyzer Sportler vum Johr gwehlt wore. Vu 1978 bis 1983 het er all Johr di nazional Maischterschaft in dr Ainerverfolgig gwunne. Derzue sin Titel im 1000-Meter-Zytfahre 1982 un im Pinktfahre 1983 chuu. Au uf dr Stroß isch er erfolgrych gsii: Är het anne 1979 dr nazional Titel im Mannschaftszytfahre mit em VC Binnige gwunne.[1]
Noch em Olympiasiig isch dr Dill-Bundi zue dr Profi gwägslet. Är isch in dr Hauptsdach als Bahnränne gfahre, het aber au as Stroßefahre ainzelni Erfolg chenne fyyre. Bim Giro d’Italia 1982 het er ai Etappe gwunne un dr Prolog vu dr Tour de Romandie 1983. Bi dr Wältmaischterschaft 1983 isch er Zweete in dr Ainerverfolgig wore, ai Johr speter Wältmaischter in dr Disziplin Keirin.
Wel anderi Erfolg uusblibe sin, isch er anne 1988 vum Spitzesport zruggdrätte un het dru as Rebresäntant fir verschideni Sponsore gschafft. Ab 2002 isch er fir d Effetligkaitsarbet vu dr Radrännhalle am Hauptsitz vum Wältradsportverband UCI z Aigle zueständig gsii.[2] Im Johr 2006 isch byyn em noch eme epileptische Aafall en Hirnitumor diagnoschtiziert wore.[3] Im Mai 2010 isch er erfolgrych operiert wore.[4] Am 16. Septämber 2024 isch er no langer Chranket gstorbe. Är het drei Chinder ghaa un het zletscht im Wallis gläbt.[5]
Weblink
[ändere | Quälltäxt bearbeite]- Robert Dill-Bundi in dr Datebank vu Olympedia.org (änglisch)
- Robert Dill-Bundi in der Datebank vo Radsportseiten.net
Fueßnote
[ändere | Quälltäxt bearbeite]- ↑ Deutscher Radsport-Verband der DDR (Hrsg.): Der Radsportler. Nr. 33. Berlin 1979, S. 3.
- ↑ «Je pensais à l’adversaire, pas au titre olympique». In: Le Nouvelliste. 2. Augschte 2015.
- ↑ Marcel W. Perren, Hans-Peter Hildbrand: In den Krallen des Gehirntumors (Memento vom 12. Augschte 2015 im Internet Archive). In: Blick. 19. September 2006.
- ↑ Marcel Segessemann: Robert Dill Bundi hat Grund zur Freude (Memento vom 25. Dezämber 2015 im Internet Archive). In: radsportseiten.net. 29. Mai 2010.
- ↑ Olympiasieger von 1980 – Robert Dill-Bundi nach langer Krankheit gestorben. In: srf.ch. 16. September 2024, abgruefen am 16. September 2024.
|
Dä Artikel basiert uff ere fräie Übersetzig vu dere Version vum Artikel „Robert_Dill-Bundi“ vu de dütsche Wikipedia. E Liste vu de Autore un Versione isch do z finde. |