Rönessansmuusig

Us der alemannische Wikipedia, der freie Dialäkt-Enzyklopedy
Muusiker um 1600

As Rönessansmuusig bezäichnet mä d Muusig us em Aafang vo dr Nöizit, das häisst us em 15 und 16. Joorhundert. Si isch öbbe am Aafang vom 17. Joorhundert vo dr Barockmuusig abglööst worde. Wo genau d Gränze vo dr Epoche lige und was genau iiri musikalische Merkmol si, doodrüber git s in dr Forschig kä Konsens.

Merkmol und Forme[ändere | Quälltäxt bearbeite]

Die hooche middelalterlige Spaltkläng, also die nit vermischte Kläng, won e seer durchsichtigs und klars Klangbild vom Instrumentalsatz gäbe, si dur e Vollklang ersetzt worde, d Kwinte- und Kwarteharmonik dur Terze und Sexte. D Entwigglig vo dr Dreiklangharmonii het iigsetzt, wo mä statt Stimmiisetz, wo früener äine noch em andere choo si, d Ziile jetz gmäinsam aagfange het. Komplizierti Forme vo dr Isorhütmii, won e rhüthmischi Struktur Abschnitt für Abschnit widerholt worde isch und d Doonhööchine drbii vilmol gwäggslet häi, si veräifacht worde.

In dr Florentiner Camerata isch d Monodii, dr solistisch Gsang mit akkordischer Instrumentalbegläitig, entwigglet worde; und vo dört het sich in dr öiropäische Muusig duuregsetzt, ass menschligi Affekt in musikalische Figure mitdäilt wärde. Dr subjektivi Usdruck von ere Komposizioon het e seer vil gröössere Spiilruum überchoo als im Middelalter. In äinzelne Komposizioone isch e Doonsümbolik gsteckt, wo nume vo dene verstande worde isch, wo sich uskennt häi.

In dr Epoche vo dr Rönessans isch d Iidäilig vo de Stimme in Sopran, Alt, Tenor und Bass abgeschlosse worde. Mit dr Bassstimm im Chorsatz, wo drzuechoo isch, het sich s Klangideal gänderet, und dr vierstimmig Chorsatz isch zum Standard worde. Die musikalischi Satztechnik vom Fauxbourdon, wo bin em dr Cantus firmus, das häisst d Hauptmelodii, mäistems um en Oktave hööcher dransponiert worde und im Superius (Sopran) glääge isch und en dr Contratenor e Kwarte und dr Tenor e Sexte diefer begläitet häi, isch e witers Kennzäiche für d Rönessansmuusig worde. Eso si d Teggst liichter zum Verstoo gsi.

Weblingg[ändere | Quälltäxt bearbeite]

Dä Artikel basiert uff ere fräie Übersetzig vum Artikel „Renaissancemusik“ vu de dütsche Wikipedia. E Liste vu de Autore un Versione isch do z finde.