Rauriker

Us der alemannische Wikipedia, der freie Dialäkt-Enzyklopedy
Hops zue: Navigation, Suech
D Keltestämm im Gebiet vo dr Schwiiz im Römische Riich

D Rauriker (lat. Raurici) si ä Stamm vo Kelte gsi, wo um 400 vor dr Ziitwändi (d Latène-Ziit) us em Obere Donaugebiet noch Süddütschland und in d Schwiiz cho isch. Ihr Gebiet het sich vom Bodesee westwärts am Rhii noch bis in d Region vo Basel und em östlige Jura zoge. Im Norde hend si a d Triboker, im Südweste a d Sequaner und im Südoste a d Helvetier grenzt.

Gschicht[ändere | Quälltäxt bearbeite]

Z Basel het mä bi Bauarbeite bim Gaswärk Überräst von erä hoch entwicklete und strukturierte Stadt us dr Ziit vo öbbe 150 vor dr Ziitwändi gfunde. Mä het Nochwiis gfunde für Werkstett und Import us römische Gebiet (u.a. Wiiamphore) und än eigentligs Töpferviertel mit Räste vo zäh keltische Töpferöfe, wo zum Deil sehr guet erhalte si. Mä het au ä Gräberfäld gfunde mit riichhaltige Fünd, drunder zahlriichi menschligi Skelettdeil. Die löön an rituelli Begrabige dänke.

D Rauriker hai sich au uf em Münsterhügel vo Basel niiderglo, wos im Spoot-Latène D2 e Oppidum errichtet hend, d Römer hai däm Ort spöter „Oppidum Rauricum“, „Stadt vo de Rauriker“ gsait.

S römische Theater z Augusta Raurica

Im Johr 58 vor dr Ziitwändi hai sich d Rauriker de Helvetier aagschlosse, hai ihri Hüüser verbrennt, für ass es kei Grund meh gäb zruggzgoh und si in Richtig Gallie zoge. Dr Julius Caesar het aber die „Völkerwanderung“ nit welle noch Gallie lo, het sä verfolgt und in der Schlacht bi Bibracte gschlage. Noch dere Niiderlag si d Rauriker unter d Herrschaft vo de Römer cho und dr Cäsar het enä befohle, zrugg noch Basel z zieh. D Rauriker hai sölle die militärisch wichtigi Gegend am Rhiichneu gege Angriff vo de Germane schütze.

Wo im Cäsar si Kampfkumpan dr Lucius Munatius Plancus 44 vor dr Ziitwändi d Kolonii Augusta Raurica gründet het, hai sich d Rauriker gege d Römer ufglehnt. 1942 het mä z Basel ä Massegrab entdeckt und das het d Forscher überzüügt drvo, ass die keltischi Bevölkerig denn umbrocht worden isch.

Link[ändere | Quälltäxt bearbeite]

Dä Artikel basiert uff ere fräie Übersetzig vum Artikel „Rauriker“ vu de dütsche Wikipedia.

E Liste vu de Autore un Versione isch do z finde.