Triboker

Us der alemannische Wikipedia, der freie Dialäkt-Enzyklopedy

D Triboker (lat. Triboci; altgriechΤρίβοκοι, Tríbokoi) sind e germanische Stamm im Elsiss gsii. Im Süüde hend si a d Rauraker, im Weste a Mediomatriker und im Norde a Nemeter grenzt. Di östlich Grenze het de Rhii bildet.

Gschicht[ändere | Quälltäxt bearbeite]

D Triboker sind im Joor 71 v. Chr. zäme mit de Nemeter und de Vangione und andere Stämm mit em Ariovist öber de Rhii choo und i Gallie iigfale. Ahand vo de Archäologii hend si aber erst i de erst Hälfti vom 1. Jh.n. Chr. Land vo de Mediomatriker westlich vom Rhii iignoo. Eri wichtigste Stedt sind Brocomagus (hüt: Brumath) und Argentorate (hüt: Stroosburi) gsii.

Ane 70 n. Chr. hend si sich am Uufstand vo de Treverer bitailiget. Nochdem d Alemane de Limes broche hend und d Decumates agri bsetzt hend, sind die immer wider is Piet vo de Triboker iigfale. Abem 5. Joorhundert hend den d Alemane feste Woonsitz im Piet vo de Triboker gnoo.

Kultur[ändere | Quälltäxt bearbeite]

Im Gegesatz zu de Nemeter und de Vangione hend si sich nöd so starch a di gallorömischi Kultur aapasst und hend sich drum no lang vo de andere Stemm um si ume underschide. Bsundrigs Biwaffnig isch lang typisch germanisch blibe. Au i de Religion hend si sich underschide. Si sind Veezüchter und Ackerbuure gsii und i de Vogese hend si Staibrüch ghaa und Ise abbaut.

Quelle[ändere | Quälltäxt bearbeite]

  • Julius Cäsar: Gallische Chrieg 1,51
  • Cornelius Tacitus: Historie 4,70

Büecher[ändere | Quälltäxt bearbeite]

  • Der Neue Pauly, Bd.12/1 : »Triboci«