Raathuusbrugg

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
d Raathuusbrugg, wie si ane 1793 gsy isch

D Raathuusbrugg isch e Brugg über d Limet z Züri.

Me seit ere au Gmüesbrugg. Früener isch es die Underi Brugg gsy, zum se underschäide vo de Obere Brugg zwüschet em Grossmöischter und de Wasserchile uf de rächte Flusssyte und em Fraumöischter änedraa, daa wo jetz sit em 19. Jaarhundert d Möischterbrugg isch; die elter Ober Brugg isch aber na gar kei grossi Brugg, sondern numen en eifache Holzschtääg gsy.

A der Stell vo de Raathuusbrugg isch scho sit em Mittelalter e Brugg us Holz gsy, und es isch die eltischti Brugg z Züri gsy, wo me mit Fuerwèèrch hät chöne drüberfaare. Scho im 14. Jaarhundert hät men aagfange, d Brugg uf der Syte breiter z mache; so hät me druuf Mèèrt chöne haa, und vo de Gmüesmèèrt chunt de Brugg ire zwäit Naame.

Me cha vermuete, as uf dem Platz bim Hügel vom Lindehoof scho i der antike Zyt e Brugg vo de Röömer gsy isch; nume hätme daa schynts vo sonere alte Brugg bis jetz käini Spuure gfunde.

1881 isch statt der alte Holzbrugg en ysegi poue worde, wo dänn ane 1893 de Naame Raathuusbrugg übercho hät, wil si grad näbem Zürcher Raathuus duregaat. 1973 hätme die hütig Betonbrugg poue. Ane 2019 isch s Projäkt für die näschscht nöi Raathuusbrugg vorgstellt woorde.

Weblink[ändere | Quälltäxt bearbeite]

 Commons: Rathausbrücke Zürich – Sammlig vo Multimediadateie