Pal Engjëlli

Us der alemannische Wikipedia, der freie Dialäkt-Enzyklopedy
Hops zue: Navigation, Suech

Dr Pal Engjëlli (* 1416 z Drisht; † 1470) isch dr katholisch Erzbischof vo Durrës ùn Kardinal vo Albanie gsi. Vo ihm isch dr erschti ùff Albanisch gschribeni Satz überliefert, nämli e Taufformel ussem Johr 1462. Engjëlli isch Albanisch für ‚Engel‘.

Dr Pal Engjëlli söll e enger Vertrauter vùm Skanderbeg gsi sy ùn isch als syn Botschafter oft im Ussland gsi, für ùm Hilf gäge d Osmane z bitte.

Derwyylscht eme Bsuech z Burrel im Matdaal het dr Pal Engjëlli Unregelmässigkeite im Glaube ùn Problem mit dr Taufi feschtgstellt. Zämme mit andre Aawysige het er e Taufformel imene Brief vùm 8. November 1462 hinterlo. Si het warschynts solle bruucht werde ùm d Taufi für die Albaner, wo kei Latiinisch verstande hen, verständliger z mache ùn demit d Buure ùffem Land, wo ihri Chinder nit hen chönne zur Taufi bringe, d Taufi selber hen chönne durefiere. Dr Brief isch sùnscht uf Latiinisch gschribe.

D Formel luutet: Un'te paghesont' pr'emenit t'Atit e t'Birit e t'Spirit Senit. (Ich tauf di im Name vùm Vater, vùm Sohn ùn vùm heilige Geischt). Dr Spruch isch im Gegische Dialekt vo Nordalbanie gschribe. D Formel isch 1462 vomene Konzil im Mat zueglo worde.

S Dokumänt mit dr Taufformel isch in dr Biblioteca Medicea Laurenziana z Florenz ùffghobe. Dört isch es 1915 vùm rumänische Forscher Nicola Jorga wiiderentdeggt worde.

Andri frieni albanischi Schriftzügniss sin e chùrzes Wörterbuech, wo vùm Arnold von Harff gschribe worde isch, emene Dütsche, wo dur Albanie greist isch, ùn s Perikopeja e ungjillit te pashkeve, wo z Mailand entdeggt worde isch, wo im Toskische Dialekt ùn im griechische Alphabet gschribe isch.

Literatur[ändere | Quälltäxt bearbeite]

  • Nicolae Iorga: Notes et extraites per servir à l'histoire des croissades au XV siècle. Bukarest 1915, S. 195.
  • Lorenzo Tacchella: Giorgio Castriota Skanderbeg e i romani pontefici nel sec. 15. Paolo Angeli arcivescovo di Durazzo e ambasciatore di Skanderbeg a Venezia nel 1467. Milano 2000.

Weblink[ändere | Quälltäxt bearbeite]


Download vu dr Sprochversion vu dem Artikel De Artikel gits au as Audiodatei
:
abelade | Informatione


Meh Informatione zum WikiProjekt Gsprocheni Wikipedia
.